Read tetala 2 Koreto 9 Bible Online

2 Koreto 9 - tetala bible

2 Koreto 9

¹Dimi kema la dikambu dia nyufundela dia nkambela ekilami.

²Ne dia dimi mbeyaka ukalanganu anyu, wakamanyutumbula le asi Makedoniya nti: Asi Akaya wambuyalongosolaka eleku kʼutundu. Ukalanganu anyu ambosemanela la amotshi efula.

³Keli dimi lambutuma anyasu, dia ndjatumbula kasu lu dikambu dianyu tayalaki uyalayala. Uku akamati, dimi nangaka nyu nongoswama.

⁴Naka antu amotshi wayuya kame la mi uma la Makedoniya, wayunyutana nyatayalongosola, ku shu — hatulangi mvuta shati: Nyu — tayutshama sonyi lu elungamelu kene.

⁵Okone dimi lakakani nti: Ololo nsengasenga anyasu, vo watateli la ntundu utsha le nyu. Vo watasanganyisha eshasha wakanyalaki ntundu, ne dia diango diku diayali uku ushasha, aha la khudu.

⁶Dimi lambunyutela dikambu ne nti: Untu lune diango tshitshe, ayuna diango tshitshe; untu lune diango efula, ayuna diango efula.

⁷Untu lʼuntu akimo uku akandati lʼutema andi, aha la lunyangu, aha la khudu, ne dia Unyashungu nangaka untu latukimoka lʼongenongeno.

⁸Unyashungu mbeyaka nyufudiya ngandji ka mamba tshe, ne dia nyu nyatuyalaka la diango kambi nshi tshe, ku nyuyafudiya lu elimu wʼololo tshe.

⁹Uku akafundama ati: One lakadianganyaka diango, Ndi akashaka akanga a weula eshasha; Ololo andi atutshikalaka pundju.[24]

¹⁰One latushaka umbuki wuhu la ma dia nde,[25] ndi ayunyusha wuhu anyu wa mune, ayuwufudia, ayuhamia elua wʼakambu anyu wʼololo.

¹¹Nyu nyambongonyama lu akambu tshe, ne dia lukahu lone la mamba! Lukahu lako layukundjiya Unyashungu lusaka uma le su.

¹²Ne dia ekambelu kʼulimu one aha paka dia nkutsha yediko yʼehumba wʼekilami tshu, keli ambufudia ndu lusaka efula le Unyashungu.

¹³Lu ehimbelu kʼulimu one, vo wayutumbula Unyashungu, ne dia ukitanyia anyu wa mbetawo ka lu lukumu lʼololo la Kristu, la dia lukahu lanyu le wo ndu le antu tshe.

¹⁴Ndu vame watunyolombelaka Unyashungu, wambunyukumbula wulu, ne dia ngandji ka mamba kʼutamanya ka Unyashungu keli lʼetema anyu.

¹⁵Lusaka le Unyashungu, ne dia ushasha andi waheyana mvuta.