Read tetala Ngalatiya 2 Bible Online

Ngalatiya 2 - tetala bible

Ngalatiya 2

¹Lʼokongo diku, lamʼaketi deku dikumi la nei, dimi lakatshu ntu la Jerusalema,[5] kame la Baranaba la Tito.

²Dimi lakatshu leko lu enyelo. Ku dimi lakakitsha lukumu lʼololo la ntundu kawo (keli lu usheshe la ntundu ka wane waki la lukumu), lako latumusambishaka lʼatei wʼasi wedja. Dimi kunanga ndjala uku untu lasaka, kana lakasaki luwangu usakasaka.

³Keli vo kumbahemia Tito laki lam uhekeli, kuyanga mbakindi usi Ngirika.

⁴Dikambu so diakayangi ndja, ne dia anyasu wa kashi wakayaotshiya lʼatei asu lu ushesne, dia monga ndiadjasela kasu le Kristu Jesu, ne dia ntudja lu fumbi —

⁵Keli shu kumbasha dihuli dia mbalembela nduku etenyi ka unya otoi, ne dia mete ka lukumu lʼololo kayali le nyu.

⁶La uma le waku wakaleki nemiama, dia ndjala dikambu dimotshi (kuyanga mbakiwo wuhu akona, dikambu so hadiumbete wuhu omotshi. Unyashungu kema la shonodi yʼantu[6]) — vo ako mbatami nti: Vo tawaki nduku la dikambu le mi.

⁷Keli aha osoku, lamʼakawenyi vati: Dimi la dikambu dia mvutela wane wahahema ehekeli lukumu lʼololo, uku aki Petero la dikambu dia mvutela wane wahema ehekeli lukumu lʼololo

⁸(ne dia one lakadji Petero lʼutumami a wane wahema ehekeli kakambidji ndu dimi lʼutumami wʼasi wedja);

⁹ndu lamʼakawenyi ngandji ka mamba kakawambisha, Jakoba, Kefasi la Joani, wane wakalema uku dikundji, wakashanya la su lunya la pami lʼekesanelu, dimi la Baranaba, dia shu ntsho le asi wedja, la dia vo ntsho le wane wahema ehekeli.

¹⁰Dikambu otoi, vo wakalangi shu mbuho akanga a weula. Dikambu diako mbakamaleki ntsha.

¹¹Keli lamʼakayi Kefasi lʼAtiyoka, dimi lakamanya la ndi lu ashu, ne dia ndame akayamia.

¹²Ne dia la ntundu akina watayi uma le Jakoba, ndi akalekaka kame lʼasi wedja. Keli lamʼakawayi, ndi akamo, akangana uma le wo, ne dia ndi akuki ambahemi wʼehekeli woma.

¹³Ndu asi Juda wakatshikala, wakatshi lukesu kame la ndi. Ndu Baranaba akakutwama lu lukesu lawo.

¹⁴Keli lamʼakamenyi nti: Vo hawusimbo lu mbuka ka mete ka lukumu lʼololo, dimi lakatela Kefasi la ntundu kawo vo tshe nti: Naka we leli usi Juda, ndjalaka uku asi wedja, aha uku usi Juda, ukundi atshutshiyaye asi wedja dia vo ndjala uku asi Juda?

¹⁵Shu shame teko asi Juda umaka eutwelu, taha antu wa kolo wʼasi wedja,

¹⁶keli shu mbeyaka shati: Untu hayindjama ne dia etsha wʼelembe, keli paka dia mbetawo le Jesu Kristu, uku akatetawo Kristu Jesu, dia shu nyindjama dia mbetawo kasu le Kristu,[7] aha dia etsha wʼelembe. Ne dia nduku untu ayuyindjama[8] dia etsha wʼelembe.

¹⁷Keli lamʼakatayangi nyindjama le Kristu, ku shu shame takatanema atshi wa kolo, undi Kristu eko ukambi wa kolo? Aha osoku!

¹⁸Ntu naka dimi layuhika diango diakamahandjula ntundu, ku layuyaedika uku undjaki wʼelembe.

¹⁹Ne dia elembe, dimi lakavwela elembe, dia dimi ndjala la lumu le Unyashungu.

²⁰Dimi lakadiakema lʼutamba a mpeketanya kame la Kristu. Dime kema la lumu, keli Kristu keli la lumu lʼutema ami. Lumu leli la mi kakiane lu dimba leko uma lu mbetawo le Onʼa Unyashungu, ako lakanangi, ndu lakayakimo dikambu diami.

²¹Dimi halonyola ngandji ka mamba ka Unyashungu; ne dia naka akambu wʼololo wambuya uma lʼelembe, keti Kristu akavu uvovo.