Read tetala Efeso 3 Bible Online

Efeso 3 - tetala bible

Efeso 3

¹Dia dikambu ne, dimi Paulu, usi lukanu la Kristu Jesu dikambu dianyu nyu asi wedja —

²naka nyu nyambuka lukumu lʼulimu wa ngandji ka mamba ka Unyashungu, kakawambisha dikambu dianyu,

³uku akenyama dikambu diaki lu usheshe, mbakamanyufundela aui tshitshe ntundu.

⁴Okone lamʼalanyu, nyu mbeyaka nimbitela ewu kami lu dikambu dia usheshe dia Kristu.

⁵Dikambu diako kumbeyama le ana wʼantu lu nonga kina, uku ambudieyama kakiane le atumami andi wʼekila la amvutshi lu Nyuma.

⁶Nyeyi nyati: Asi wedja weli ekito, beke dia dimba ndu elungudi wa daka le Kristu Jesu uma lu lukumu lʼololo.[10]

⁷Uma lu lukumu lʼololo mbakawambete ukambi alo, uku ushasha wa ngandji ka mamba ka Unyashungu kakawambisha uku ulimu wa wulu andi.

⁸Dimi ako luleki ekilami tshe nkitakita, kakawasha ngandji kene ka mamba dia nsambisha asi wedja ongonyi wa Kristu waheyama mbedika,

⁹ndu dia menya antu tshe uku eli ulimu wa dikambu dia usheshe diakashama deku la deku le Unyashungu, lakatungi diango tshe.

¹⁰Ne dia ekelizia wenya antu wa lu waulelu lʼambahemedi wa lu ahuli a wulu wa lʼulungu weyi yimba ya Unyashungu,

¹¹uku esangweyu kandi ka pundju kakandasanguya le Kristu Jesu Khumesu.

¹²Shu teko la dihunga la elungamelu ka shu mboto le ndi uma lu mbetawo kasu le ndi.

¹³Uma lu dikambu so, mbalombami nti: Tanyuhekoki dia asui ami wanyusuwelami, wako weli lutumbu lanyu.

¹⁴Dia dikambu ne, mbakhuselami Shesu adui.

¹⁵Khumbu tshe ya lʼulungu ndu ya la kete yambolema kumbu uma le ndi,

¹⁶dia ndi nyusha uku eli ongonyi a lutumbu landi, dia nyu nkikitshama la wulu wʼuma le Nyuma kandi lʼutema wʼuntu,

¹⁷dia Kristu mbidjase lʼetema anyu uma lu mbetawo, dia nyu ndjala la ediu ndu munema lu ngandji.

¹⁸Nyuyali la wulu, nyu la ekilami tshe, wa nshihudia okone eli wekeki, utali, dungulungu la ohongo,

¹⁹ndu dia mbeya ngandji ka Kristu kuleki yimba, dia nyu ndudiama la eludiamelu tshe ka Unyashungu.

²⁰Le one leya ntsha akambu wuleki akambu tshe walombasu kana wakanasu, uku weli wulu watukambaka lʼetema asu,

²¹lutumbu layali le ndi, le ekelizia, ndu le Kristu lu nonga tshe! Ayali osoku!