Read tetala Filipi 1 Bible Online

Filipi 1 - tetala bible

Filipi 1

¹Paulu la Timote, ekambi wa Kristu Jesu. Le ekilami tshe wa lu Kristu Jesu weli la Filipi,[1] kame la amendji wa lʼekelizia la esambisha:

²Ngandji ka mamba kayali la nyu, ndu ki kʼuma le Unyashungu Shesu la uma le Khumadiondjo Jesu Kristu!

³Dimi latukaka Unyashungu lusaka tena tshe lamʼatumunyuhoka.

⁴Lu alombelo ami tshe watumunyolombelaka tena tshe, dimi latolombaka la ongenongeno,

⁵ne dia ekimanyelu kanyu ka mbudia lukumu lʼololo uma lu lushi la ntundu edja ndu kakiane.

⁶Dimi latulungamelaka dikambu ne nti: One lakatatela ulimu wʼololo lʼetema anyu, ayuluwanyaka edja ndu lu lushi la Jesu Kristu.

⁷Eko ololo le mi, dia dimi nyukanela nyu tshe osoku, ne dia nyu nyeko lʼutema ami. Okone, ndu lu kanu yami ndu lu angunelu la eshikikadielu ka lukumu lʼololo, nyu tshe nyeko elungudi wa ngandji ka mamba kame la mi.

⁸Ne dia Unyashungu eko omenyi ami uku anyukumbulami nyu tshe, uku eli ketshi ka Kristu Jesu.

⁹Dimi lambunyolombela dia ngandji ka mamba kanyu katamanya mbula lu bewu la yimba tshe,

¹⁰ne dia nyu mbedika akambu wʼololo; la dia nyu ndjala la etema wa pudipudi, aha la akambu wa ntakanya antu, edja ndu lushi la Kristu;

¹¹la dia nyu ndudiama la elua wʼakambu wʼololo weli uma le Jesu Kristu, ne dia lutumbu la diandu dia Unyashungu.

¹²Anyasu, dimi nangaka nyu mbeya nyati: Akambu wakayala le mi, wakayala dia nfudia lukumu lʼololo.

¹³Okone kanu yami[2] yambenama le alami tshe wa lu luudu lʼelumbwelu la le akina tshe ati: Yo yeko dikambu dia Kristu.

¹⁴Anyasu vuleki efula le Khumadiondjo, wambukikitshama ne dia kanu yami, wambuleka mvuta diui dia Unyashungu la dihunga, aha la woma.

¹⁵Mete, amotshi watusambishaka Kristu la kandjema la utshanu, keli akina la memakana.

¹⁶Amotshi watusambishaka la ngandji. Vo mbeyaka vati: Wakankitsha dia mangunela lukumu lʼololo.

¹⁷Keli akina watusambishaka Kristu la utshanu, aha la etema wa mete. Vo wambuyanga nsuyami lamʼemi lu lukanu.

¹⁸Ku ukundi? Paka dikambu ne nti: La wehu tshe, kana la lukesu kana la mete, watusambishaka Kristu. Lu dikambu ne mbangenangenami, ee, dimi layongenangenaka.

¹⁹Ne dia dimi mbeyaka nti: Dikambu ne diayuyala uku panda kami, ne dia dombelo dianyu ndu ekimanyelu ka Nyuma ka Jesu Kristu.

²⁰Dimi lambutetemala nungamela nti: Dimi halutshama sonyi lu nduku dikambu. Keli ne dia dihunga diami, dimi nangaka Kristu atumbwami lu dimba diami, kana la lumu, kana lu nyoi.

²¹Ne dia Kristu keli lumu lami, nyoi keli waho ami.

²²Keli naka dimi lambuyala la lumu lu dimba, keti elua wa ulimu ami weko, ku dimi haleyi kayumosonola.

²³Keli dimi leko lʼatei atei wʼakambu ahendi. Dimi leko la saki ka mumo, la ntuyala la Kristu, dikambu so mbuleki ololo efula.

²⁴Keli dia dikambu dianyu, mbuleki ololo dia dimi ntshikala la dimba.

²⁵Dimi la elungamelu kene. Dimi mbeyaka nti: Layutshikala, ee, layutshikala la nyu tshe, ne dia nyudia la nyongenyangenya lu mbetawo.

²⁶Dia ndjatumbula kanyu kafuli le Kristu Jesu dia dikambu diami lamʼayumuyala la nyu ntu.

²⁷Dikambu otoi, wuhu anyu wa lumu wasungani la lukumu lʼololo la Kristu. Okone kuyanga dimi layuya dia ndjunyenda, kuyanga handji, dimi nangaka mbuka okone wenyu, ati: Nyu nyambushikikala lu Nyuma otoi, la utema otoi; nyambutetemala lu mbetawo ka lukumu lʼololo.

²⁸Tanyutshanyaki woma uma le atunyi. Dikambu so dieko le wo, djimbitelu yʼesambishelu; keli le nyu, djimbitelu ya panda, keli uma le Unyashungu.

²⁹Ne dia wakanyusha dikambu ne dia Kristu, aha dia nyu mbetawo tshu, keli dia nyu nsuwa dikambu diandi,

³⁰ne dia nyu nyeko la ta lʼetema anyu uku akanyenyi lʼutema ami,[3] ndu uku ukanyu kakiane nyati: Dio dieko lʼutema ami.