Read tetala Filipi 3 Bible Online

Filipi 3 - tetala bible

Filipi 3

¹Anyasu, diui diami dia ndjihelu ne nti: Nyongenengene le Khumadiondjo. Dikambu dia nyufundela akambu pupu, hadiumpekuya, keli dio diambunyukimanyia.

²Nyewo fo, nyewo atshi wʼakambu wa kolo. Nyewo ambahemi wʼehekeli lʼalimba.

³Shu teli ambahemi wʼehekeli, shu wane watotemolaka Unyashungu la Nyuma ka Unyashungu, la watuyatumbulaka lu dikambu dia Kristu Jesu, waha la elungamelu lʼalimba.

⁴Dime mbeyaka ndjala la elungamelu lu akambu wa dimba. Naka untu ukina ambukana ati: Dimi la elungamelu lu akambu wa dimba, keti dimi mbuleka.

⁵Wakambahemia uhekeli lushi lʼenanei, laki usi Isariyele a lu diuhu dia Bendjamina,[6] usi Heberu a lʼatei wʼasi Heberu. Lu dikambu diʼelembe, dimi laki Ufarise;[7]

⁶lu dikambu dia wangasanu, dimi lakasuyaka ekelizia;[8] lu akambu wʼololo weli lʼelembe, dimi kundjala la unungu.

⁷Keli akambu waki waho le mi, akambu aso lambuwaete anyanya dikambu dia Kristu.

⁸Mete, dimi lambete diango so tshe anyanya dia ololo wa nimbitela Kristu Jesu Khumemi. Dimi lakashisha diango tshe dikambu diandi, lambudiala uku diango dia mbikadja, dia dimi kundja Kristu,

⁹la dia menama le ndi, aha la ololo ami weli uma lʼelembe, keli la ololo weli uma lu mbetawo le Kristu, ololo ako wambuya uma le Unyashungu dia mbetawo;

¹⁰dia dimi mbeya, ndu wulu wʼeulwelu kandi, la nsuwa la ndi lu asui andi; dia ndjala uku ndi lu nyoi kandi,

¹¹naka nkukaka dia dimi nkuma lʼeulwelu kʼuma lu nyoi.

¹²Dimi latakundja, ndu latayala ololo tshe. Keli lakatakolamela ntsho wulu, ne dia dimi nungula engo kakankitshiya Kristu Jesu.

¹³Anyami, dimi hayadia uku untu lakalungula. Keli dikambu otoi mbatumutshaka: dimi lambuhela akambu wa lʼokongo, lambokolamela utsha lu akambu weli la ntundu.

¹⁴Dimi lambusamanya utsha lu dihuli diatamatshu, dia nungula difutu dia leta lʼuma lʼulungu, lakambeti Unyashungu le Kristu Jesu.

¹⁵Okone shu wane weli tutshundju, tukani yimba osoku. Naka nyu nyambukana yimba kina, Unyashungu ayunyenya ndu dikambu diako.

¹⁶Dikambu otoi, lu dihuli diambutukuma, tokendekende loko.

¹⁷Anyasu, nyumbukuyaki,[9] nyendaki waku watokendakendaka uku yediko yakatanyenya,

¹⁸ne dia efula watokendakendaka uku akamanyutela tena efula. Ku kakiane dimi lambunyutela la asoi lu ashu nti: Vo weko atunyi wa utamba a mpeketanya wa Kristu.

¹⁹Ekumelu kawo eko elanyelu, etemolatemola kawo eli dikundju. Vo watuyatumbulaka lu akambu wa sonyi yawo, watukanaka akambu wa la kete.

²⁰Ne dia lakasu eko lʼulungu, uma leko kalungamelasu Ushimbedi, Khumadiondjo Jesu Kristu.

²¹Ndi ayuhiluya alimba asu wukitshikitshi, dia vo nfana la dimba dia lutumbu landi, uku weyandi mbete diango tshe lʼokongo andi.