Read tetala Jashua 10 Bible Online

Jashua 10 - tetala bible

Jashua 10

¹Lamʼakuki Adoni-Zedike, khumʼekanga ka Jerusalema, okone aka-lembia Jashua Ai, ndu akandakilanya tshe, okone akandatshela Ai la khumʼekanga kawo, uku akandatshela Jeriko la khumʼekanga kawo; ndu okone ambokota asi Ngibiyona Isariyele lusalu, ndu ambuwudjase lʼatei awo.

²Ndi akuki woma efula, ne dia Ngibiyona aki usumba a wuki, uku usumba omotshi wa khumi ya dikanga wuleki Ai wuki, la apami tshe leko waki akanga a dihunga.

³Okone Adoni-Zedeke, khumʼekanga ka Jerusalema, akatumi diui le Hohama, khumʼekanga ka Heberona, le Pirame, khumʼekanga ka Jaramuta, le Jafiya, khumʼekanga ka Lakishi, la le Debiri, khumʼekanga ka Engelona, ati:

⁴Nyuyi, nyuyunkimanyia dia ntolo la Ngibiyona, ne dia vo wambokota la Jashua la asi Isariyele lusalu.

⁵Khumi ya dikanga tshanu yʼasi Amora: ka Jerusalema, ka Heberona, ka Jaramuta, ka Lakishi, la ka Engelona, wakamote kame. Vo wa-kunela, vo la elui awo tshe wʼalimbi, wakatuhanga lasuki la Ngibiyona, wakalo la wo.

⁶Asi Ngibiyona wakatumela Jashua diui lu pangu kandi ka la Ngilingala vati: Tuhukamaki ekambi aye. Yaka esadi, uyutukimanyia, uyutushimbeli, ne dia khumi ya dikanga tshe yʼasi Amora, yudjashi lu leke lʼakuna, yambomota dia ndo la su.

⁷Okone Jashua akunela uma la Ngilingala, ndi la andoshi wa ta, ndu la apami a wulu tshe,

⁸Latuyalaka akatela Jashua ati: Tuwaukaki woma, dimi lambakimo la anya aye, nduku otoi ayeya memala la ntundu kaye.

⁹Jashua akunela uma la Ngilingala, akakendakenda utshu tshe, okone ndi akatatumbela shashimuya.

¹⁰Latuyalaka akakasakasha la woma la ntundu ka Isariyele. Ku asi Isariyele wakadiaki efula la Ngibiyona, wakawatshanya lu mbuka kʼutsha la Beteriorona, ku wakatolo la wo lʼAzeka ndu la Makeda.

¹¹Lamʼakawatalawoka asi Isariyele, ndu lamʼakawatahuloka lʼuhulula wa Bete-Horona, Latuyalaka akaloshiya mboko ya waki uma lʼulungu pulu ndu lʼAzeka, ku vo wakavu. Wane wakavu la mboko ya mvula, wakaleki wane wakadiaki asi Isariyele la tombo efula.

¹²Lu lushi lakakimo Latuyalaka asi Amora lʼanya wʼasi Isariyele, Jashua akati lu ashu wa Isariyele ati: Unya li, emali ladiku dia Ngibiyona, Ndu we Ngondo, lʼukidi wa Aidjalona!

¹³Ku unya akemala, la ngondo konkendakenda ntu, Edja ndu lamʼakasomboya asi Isariyele atunyi awo. Dikambu ne kunfundama lu buku dia Jashara[19] (kitshimudi ati: Lusimbwi)? Unya akemala kʼatei wʼulungu, kunsamanya dia mbidja lasuki la yanyi tshe.

¹⁴Nduku lushi lakayala uku lushi loso la ntundu kana lʼokongo alo, lakukela Latuyalaka untu; ne dia Latuyalaka akalwela asi Isariyele ta.

¹⁵Ku Jashua akakalula, ndi la asi Isariyele tshe utsha lu pangu ka la Ngilingala.

¹⁶Khumi ya dikanga tshanu yakalawo, yakatushama lu wuku wa la Makeda.

¹⁷Ku wakayutela Jashua lukumu vati: Khumi ya dikanga tshanu yambutushama lu wuku wa la Makeda.

¹⁸Jashua akati ati: Nyutungituli ave a waki lʼunyo a wuku, ndu nyutukitsha apami leko dia mbalama.

¹⁹Tanyemalaki, keli nyuyelani lʼatunyi anyu, nyutolo la wo uma lʼokongo. Tanyakimoki dia vo nkalula lʼusumba awo, ne dia Latuyalaka, Unyashungu anyu, akakimo lʼanya anyu.

²⁰Lamʼakashili Jashua la asi Isariyele mbadiaka efula, efula, edja ndu lamʼakawawaomombia, ndu lamʼakatoto atshikadi wakatshikala lʼesumba wakadingami kumbu ya wulu,

²¹wudja tshe wakaka-lula ki utsha le Jashua, lu pangu ka la Makeda. Nduku untu akahula diui lu dikambu diʼusi Isariyele.

²²Ku Jashua akati ati: Nyutudihuli unyo a wuku. Nyututumbia khumi ya dikanga nye tshanu, nyuyi la wo le mi.

²³Ku vo wakatshi osoku, wakayi la khumi ya dikanga yako tshanu yakawatundja uma lu wuku: khumʼekanga ka Jerusalema, khumʼekanga ka Heberona, khumʼekanga ka Jaramuta, khumʼekanga ka Lakishi, la khumʼekanga ka Engelona.

²⁴Lamʼakawayi la khumi ya dikanga nye tshanu la ntundu ka Jashua, ndi aketi asi Isariyele tshe, akatela ewandji wʼandoshi wa ta wakatatshokaka kame la ndi ati: Nyusukani, nyuyahe khumi ya dikanga nye akaka lu kotshi yawo. Vo wakasukana, wakawahe akaka awo lu kotshi.

²⁵Jashua akawatela ati: Tanyukaki woma, kuyanga mbate asulu. Nyukikitali, nyuyali la dihunga, ne dia okone mbayu-tshelaka Latuyalaka atunyi anyu tshe wayolokaka la nyu ta.

²⁶Lʼokongo diku Jashua akakomola, akadiaki. Ndi akahane lu etamba etanu, ku vo wakatshikala wuhanemi lu etamba edja ndu dikolo.

²⁷Lamʼakayangi unya mbidja, Jashua akati dia vo mbahanula uma lʼetamba, la mbakadja lu wuku wakawashami, ku wakakitsha ave a waki lʼunyo a wuku. Ave ako weko leko edja ndu elo.

²⁸Jashua akalembia asi Makeda lushi lako, akadiaki la yombo. Ndi akalanya usumba, akadiaki khumʼekanga la wane tshe waki loko. Ndi kumpandja nduku untu, akatshela khumʼekanga ka Makeda uku akandatshela khumʼekanga ka Jeriko.

²⁹Jashua aketi, ndi la Isariyele tshe, uma la Makeda utsha la Libina. Ku ndi akatolo la asi Libina.

³⁰Latuyalaka akakimo ndu vo la khumʼekanga kawo lu anya wa Isariyele, akadiaki la yombo, vo la wane tshe waki leko. Ndi kumpandja nduku otoi, akatshela khumʼekanga kawo uku akandatshela khumʼekanga ka Jeriko.

³¹Ku Jashua aketi, ndi la Isariyele tshe uma la Libina utsha la Lakishi. Ndi akatuhanga la ntundu kawo, akalo la wo.

³²Latuyalaka akakimo Lakishi lʼanya wa Isariyele. Ku vo wakalembia lushi la hendi, wakalanya, wakadiaki wane tshe waki loko la yombo, uku akawatshela Libina.

³³Horama, khumʼekanga ka Ngezere, akayi dia ndjukimanyia asi Lakishi. Ku Jashua akudiaki, ndi la wudja andi, aha ntshika nduku untu.

³⁴Jashua aketi, ndi la Isariyele tshe, uma la Lakishi utsha la Ngelona. Vo wakatuhanga lu wlelo awo, ku wakalo la wo.

³⁵Vo wakalembia lushi lako, wakalanya, wakadiaki wane waki loko tshe la tombo. Jashua akashili ushiki, uku akandatshela asi Lakishi.

³⁶Jashua akunela, ndi la asi Isariyele tshe, uma la Engelona utsha la Heberona, ku vo wakatolo la wo.

³⁷Vo wakalembia usumba ako, wakulanya kame la ngelu tshe ya lʼokongo awo. Vo wakadiaki khumʼekanga kawo la wane waki loko tshe la yombo. Jashua kumpandja nduku untu uku akindi kumpandja asi Engelona. Ndi akalanya usumba, akashili wane waki loko tshe ushiki.

³⁸Jashua akelela, ndi la asi Isariyele tshe, utsha la Debire, akatolo la wo.

³⁹Ndi akalembia, vo la khumʼekanga kawo la esumba tshe waki lʼokongo awo. Vo wakadiaki wane tshe waki loko la tombo, kumpandja nduku untu. Jashua akatshela asi Debire la khumʼekanga kawo uku akandatshela asi Heberona, ndu uku akandatshela asi Libina la khumʼekanga kawo.

⁴⁰Jashua akalo la kete tshe, lu leke lʼakuna, lu Nengebe, lʼukidi ndu lʼuhulula, akadiaki khumi ya dikanga yawo tshe, kumpandja nduku untu. Ndi akadiaki dikendakenda tshe diaki la lumu, uku akawudjangela Latuyalaka, Unyashungu wa Isariyele.

⁴¹Jashua akatalokaka la wo uma la Kadeshe-Baranea pulu ndu la Ngaza. Ndi akalo la kete tshe ya Ngoshena edja ndu la Ngibiyona.

⁴²Jashua akalembia khumi ya dikanga nye tshe la kete yawo etena otoi, ne dia Latuyalaka, Unyashungu wa Isariyele, akatalwelaka Isariyele ta.

⁴³Jashua akakalula ndi lʼasi Isariyele tshe utsha lu pangu ka la Ngilingala.