Read tetala Jashua 16 Bible Online

Jashua 16 - tetala bible

Jashua 16

¹Ulelu wa etenyi kakandama lʼuwali le tukanula ta Josefu, waketi uma la Jorodana lasuki la Jeriko, lu leke lʼehutwelu, lʼashi wa Jeriko, ku vo mbeta uma la Jeriko lu leke lʼakuna utsha la Betele.

²Vo waketi uma la Betele utsha la Luza, ku vo ndjeta lu kete yʼasi Araka, edja ndu lʼAtarota.

³Ku vo wakahulo lu leke lʼedjelu lu kete yʼasi Jafelete pulu ndu lu kete ya la ngele a Bete-Horona. Ku vo ndjeta la Ngezere, ku vo ntukume lʼashi a waki.

⁴Ana wa Josefu, Manase la Efarayima, wakalungula etenyi kawo kʼukito.

⁵Kete yʼasi Efarayima, uku khumbu yawo nye. Ulelu wa etenyi kawo lu leke lʼehutwelu waki la Atarota-Adana pulu ndu la Diku dia Bete-Horona.

⁶Ulelu lu leke lʼedjelu waketi uma la Mikimetate la ngelʼa kushi, ku vo ndjukadimo lu leke lʼehutwelu utsha la Tanata-Silo, ku vo ndjelela lu leke lʼehutwelu utsha la Janoa.

⁷Vo wakahulo uma la Janoa, utsha la Atarota, Nara; ku vo ntutumba la Jeriko; ku ntukume la Jorodana.

⁸Uma la Tapua, ulelu waketi utsha lʼedjelu lu okedi wa Kana. Vo waketi loko edja ndu lʼAshi a Mediteraneya. Oso aki etinyi kʼukito kʼasi Efarayima uku khumbu yawo.

⁹Asi Efarayima waki la esumba ekina wakawose uma lʼetenyi kʼukito kʼasi Manase. Esumba ako tshe waki kame la ngelu yawo.

¹⁰Vo kumbitshanya asi Kanana wakadjashi la Ngezere.[34] Okone asi Kanana ako wakadjase kame la asi Efarayima edja ndu elo. Ku vo wakayala lʼokongo awo, wakalambulaka elambu.