Read tetala Jashua 2 Bible Online

Jashua 2 - tetala bible

Jashua 2

¹Jashua, onʼa Nuna, akatumi atop ahendi lu usheshe uma la Shitime, akawatela ati: Nyutshu, nyutushishimi kete, djekaleka ku Jeriko. Vo wakatshu, wakatukuma lu luudu la Rahaba,[5] umuntu kanga luseka, wakatudjase loko.

²Wakatela khumʼekanga ka Jeriko vati: Ulungi, apami amotshi wʼasi Isariyele, wakayi lʼutshu wʼelo dia ndjukemba kete.

³Ku Khumʼekanga ka Jeriko akatumela Rahaba diui ati: Utundja apami wakayi lakaye, weli lu luudu laye, ne dia vo wakayi dia ndjukemba kete tshe.

⁴Ku umuntu akose apami ako ahendi, akawashe. Ku ndi akati ati: Mete, apami ako wakayi le mi, keli dimi kumbeya uma lene akiwo.

⁵Ku lʼutshu, lamʼakakuki etena ka ndjiha asuku wa ngelu, antu ako wakatumbi. Ku dimi haleyi lene utshwiwo. Nyusamanya dia mbayela, nyayutuwanda.

⁶Keli ndi akawadiya lʼote a luudu, akawashe lʼesi a tutamba ta linene takandalonge lʼote a luudu.

⁷Ku antu wakatayangaka, wakatshu lu mbuka kʼutsha la tehu dia Jorodana. Ku lamʼakawatumbi uma lʼusumba, vo wakadihi lukuki la wuki.

⁸Ntundu atopi watetama, Rahaba akambela utsha le wo ladiku dia luudu.

⁹Ndi akawatela ati: Dimi mbeyaka nti: Latuyalaka ambunyusha kete nye. Woma wa mamba wanyukasu wambutunda, etema tshe wʼakanga a kete nye wambuyala ashi atu la ntundu kanyu.

¹⁰Shu takuki uku akumia Latuyalaka ashi wʼUduwa a Tilili[6] la ntundu kanyu lamʼakanyatumbi uma lʼEdjibitu. Ndu takuki uku akanyatshela khumi ya dikanga hyendi yʼasi Amora, Sihona la Onga, la wedi wa Jorodana, la uku akanyashili ushiki.[7]

¹¹Kamʼakatuki lukumu loso, alimba asu wakakomo, ndu etema asu tshe wakayala ashi atu lu dikambu dianyu, ne dia Latuyalaka, Unyashungu anyu, eli Unyashungu a lʼulungu ndu a la kete.

¹²Ku kakiane, lambunyosengasenga nti: Nyuntshibeli le Latuyalaka, dia nyu ntshela luudu la papa ololo, uku amumunyutshela. Nyumbisha djimbitelu ya mete,

¹³ya ntshika papa, nyomi, analingu wʼapami ndu wʼamantu, la wane tshe weli la wo la lumu, ndu ya ntushimtsla uma lu nyoi.

¹⁴Ku apami ako wakûkaluya diui vati: Ndu shu tayukimo nyumu yasu lu dikambu dianyu. Naka nyu hanyushudi dikambu diasu, shu tayunyutshela akambu wʼololo la kolamelu lamʼayutusha Latuyalaka kete.

¹⁵Rahaba akahuluya lʼokodi uma lu didishi, ne dia luudu lakandadjashi lakahikami lu eheli ka lukumbu lʼusumba, ku ndi akaladi lu eheli.

¹⁶Ndi akawatela ati: Nyutshu utsha lʼakuna ne dia wane watanyuyeli watukuhumana la nyu. Nyutushami leko nshi shatu, edja ndu wane watanyuyeli wambukalula. Lʼokongo diku, kanyukimeli mbuka.

¹⁷Apami ako wakawutela vati: Shu hatuyala la unungu wa etshibelu kene kambuyututshibia.

¹⁸Ku lamʼayutukuma lu kete yanyu, kuhane okodi one wa tilili lu didishi diambuyutuhuluya. Kotshiya sho, nyo, ananyo la wa lu khumbu ka sho tshe lu luudu kame la ye.

¹⁹Naka untu omotshi uma lʼatei awo ayutumba uma lu luudu laye utsha lʼosese, dikila diandi diayuyala lʼote andi, ku shu hatuyala la unungu wa dikila diandi. Keli naka usikasu omotshi ayahe untu leli lu luudu laye lunya, dikila diandi diayuyala lʼote asu.

²⁰Keli naka we ayushula dikambu diasu ne, shu hatuyela etshibelu kambuyututshibia.

²¹Ndi akakaluya diui ati: Diayali uku aui anyu. Ndi akalakana la wo, ku vo wakunela. Ndi akahane okodi ako wa tilili lu didishi.

²²Vo wakakimela mbuka, wakatukuma lʼakuna, lene akawatushama nshi shatu, edja ndu lamʼakakalula wane wakatayelaka. Andjedi awo wakatayangaka lu mbuka tshe, keli vo kumbaena

²³Ku apami ako ahendi wakahulo uma lʼakuna, wakateho, wakakumi le Jashua, onʼa Nuna. Ku wakawutela akambu tshe wakayala le wo.

²⁴Vo wakatela Jashua vati: Mete, Latuyalaka ambukimo kete tshe lʼanya asu. Dikambu dikina, etema wʼantu ako tshe wambuyala ashi atu dikambu diasu.