Read tetala Jashua 21 Bible Online

Jashua 21 - tetala bible

Jashua 21

¹Ete wa khumbu yʼasi Lewi wakasukana le olombedi Eleazara, Jashua, onʼa Nuna, la ete a wauhu wʼasi Isariyele

²la Shilo, lu kete ya Kanana. Vo wakawatela vati: Latuyalaka akadjangela Mose dia ntusha esumba wa shu mbidjase, kame la etshimba awo, wa ndesha dungalunga diasu.[40]

³Asi Isariyele wakasha asi Lewi esumba ene la etshimba awo uma lʼatei wa etenyi kawo kʼukito, uku aki olembe wa Latuyalaka.

⁴Vo wakukela khumbu yʼasi Kohata uwali. Ku asi Lewi, tukanula ta olombedi Arona, wakalungula esumba dikumi la esatu uma lu wauhu wa Juda, Simeyona, la Bendjamina.

⁵Ku ana akina wa Kohata wakalungula esumba dikumi uma lu diuhu dia Efarayima, uma lu diuhu dia Dane la etenyi ka hendi ka diuhu dia Manase.

⁶Asika Ngereshona wakalungula esumba dikumi la esatu uma lu diuhu dia Isakara, uma lu diuhu dia Ashere, uma lu diuhu dia Nafetali, la etenyi ka hendi ka diuhu dia Manase wa la Bashana.

⁷Asika Merari, uku khumbu yawo, wakalungula esumba dikumi la ehendi uma lu diuhu dia Rujena, diuhu dia Ngada, la diuhu dia Zebuluna.

⁸Asi Isariyele wakasha asi Lewi esumba ene la etshimba awo lu eukelu kʼuwali, uku akadjangela Latuyalaka Mose.

⁹Vo wakakahanya esumba ene wayangasu mvuta kumbu uma lʼatei wa diuhu dia Juda la diuhu dia Simeyona.

¹⁰Esumba ene wakayala le tukanula ta Arona lʼatei wa khumbu yʼasi Kohata, ana wa Lewi, ne dia vo mbakakundja etenyi kawo ntundu.

¹¹Vo wakawasha Kiriyate-Areba (ketawo vati: Heberona) lʼakuna wa Juda kame la utshimba ato. Areba ako kaki shi Anaka.

¹²Keli vo wakasha Kaleba, onʼa Jefune, kete ya lʼutshimba wʼusumba, kame la ngelu yawo, etenyi kandi kʼukito.

¹³Vo wakasha ana wa olombedi Arona Heberona, usumba wʼeshamelu kʼandjakanyi, kame la utshimba awo, Libina la utshimba awo,

¹⁴Jatina la utshimba awo, Eshitemoa la utshimba awo,

¹⁵Holona la utshimba awe, Debire la utshimba awo,

¹⁶Aina la utshimba awo; Juta la utshimba awo, la Bete-Shemeshe la utshimba awo: esumba divwa uma lu wauhu ane ahendi;

¹⁷ndu uma lu diuhu dia Bendjamina: Ngibiyona la utshimba awo, Ngeba la utshimba awo,

¹⁸Anatota la utshimba awo, Alamona la utshimba awo: esumba enei.

¹⁹Esumba tshe wʼelombedi, tukanula ta Arona, waki dikumi la esatu, kame la etshimba awo.

²⁰Asi Lewi wʼuma lu khumbu kina yʼasi Kohata wakalungula etenyi kawo kʼukito uma lu diuhu dia Efarayima.

²¹Vo wakawasha ndu Shekeme usumba wa eshamelu kʼandjakanyi, kame la utshimba awo, lu akuna wa Efarayima, Ngezere la utshimba awo,

²²Kibizayima, la utshimba awo, Bete-Horona la utshimba awo: esumba enei.

²³Uma lu wudja wa Dane: Eleteke la utshimba awo, Ngibetona la utshimba awo,

²⁴Aidjalona la utshimba awo, la Ngata-Rimona la utshimba awo: esumba enei.

²⁵Uma lʼetenyi ka hendi ka diuhu dia Manase: Tanaka la utshimba awo, Ngata-Rimona la utshimba awo: esumba ehendi.

²⁶Esumba tshe wa khumbu yako yʼasi Kohata waki esumba dikumi la etshimba awo.

²⁷Vo wakasha asika Ngereshona, uma lu khumbu otoi kʼasi Lewi, okone: uma lʼetenyi ka hendi ka diuhu dia Manase: Ngolana ka la Bashana, usumba wa eshamelu kʼandjakanyi, la utshimba awo, la Beshitera la utshimba awo: esumba ehendi.

²⁸Uma lu diuhu dia Isakara, Kishiyona la utshimba awo, Daberate la utshimba awo,

²⁹Jaramuta, la utshimba awo, la Ene-Nganima la utshimba awo: esumba enei.

³⁰Uma lu diuhu dia Ashere: Mishala la utshimba awo, Abi-duna la utshimba awo,

³¹Helekate la utshimba awo, la Rehobe la utshimba awo: esumba enei.

³²Uma lu diuhu dia Nafetali: Kedeshe ka la Ngalili, usumba wʼeshamelu kʼandjakanyi la utshimba awo, Hamota-Dora la utshimba awo, la Karatana la utshimba awo: esumba esatu.

³³Esumba tshe wa khumbu efula yʼasi Ngereshona waki dikumi la esatu, kame la etshimba awo.

³⁴Vo wakasha asi Lewi akina, wa lu khumbu yʼasi Merari, okone: Uma lu diuhu dia Zebuluna, Jokineame la utshimba awo, Karata la utshimba awo.

³⁵Dimina la utshimba awo, la Nahalala la utshimba awo: esumba enei.

³⁶Uma lu diuhu dia Rubena: Bezere la utshimba awo, Jahaza la utshimba awo,

³⁷Kedemote la utshimba awo, la Mefate la utshimba awo: esumba enei.

³⁸Uma lu diuhu dia Ngada: Ramota ka la Ngiliyade, usumba wa eshamelu kʼandjakanyi la utshimba awo, Mahanayima la utshimba awo,

³⁹Heshibona la utshimba awo, la Jazera la utshimba awo: tshe kame esumba enei.

⁴⁰Esumba wakandama uwali le asika Merari efula, uku khumbu yawo, khumbu yʼasi Lewi yakatshikala, waki esumba dikumi la ehendi.

⁴¹Esumba tshe wʼasi Lewi, lʼatei wa tenyi diʼekito diʼasi Isariyele, waki esumba akumi anei la enanei, kame la etshimba awo.

⁴²Usumba lʼusumba waki la utshimba awo wudingi. Osoku mbaki esumba ako tshe.

⁴³Ku Latuyalaka akasha Isariyele kete tshe yakandatshibi dia mbisha wa-shewo. Vo wakayikiti, wakadjase loko.

⁴⁴Latuyalaka akawasha mumuya lʼutshimba tshe, uku akandatshibela washewo. Nduku utunyi awo otoi akeyi memala la ntundu kawo, ne dia Latuyalaka akakimo, vo tshe lʼanya awo.

⁴⁵Uma lʼaui tshe wakatela Latuyalaka khumbu ka Isariyele, nduku diui diakayala uyalayala. Vo tshe wakashidiyama.