Read tetala Jashua 22 Bible Online

Jashua 22 - tetala bible

Jashua 22

¹Jashua aketi asi Rubena, asi Ngada la etenyi ka hendi ka diuhu dia Manase.

²Ndi akawatela ati: Nyu nyakalami kene tshe kakanyutela Mose, ukambi wa Latuyalaka; ndu nyakakitanyia diui diami lu akambu tshe wakama-nyudjangela.[41]

³Nyu kunkale anengenyu nshi tshe edja ndu elo. Nyu nyakalamaka adjangu la elembe wa Latuyalaka, Unyashungu anyu.

⁴Ku kakiane, Latuyalaka, Unyashungu anyu, ambusha anengenyu mumuya uku akandawatela. Nyukaluli, nyutshu utsha lu ngelu yanyu lu kete yanyu, yakanyusha Mose, ukambi wa Latuyalaka, la wedi wa Jorodana.

⁵Dikambu otoi, nyulamaki, ndu nyutshaki adjangu la elembe wakanyudjela Mose, ukambi wa Latuyalaka, ololo! Nyuki Latuyalaka, Unyashungu anyu, ngandji. Nyokendakendaki lu mbuka yandi tshe. Nyulamaki elembe andi. Nyumamemi, nyukambeli ulimu lʼetema anyu tshe, ndu la nyumu yanvu tshe.

⁶Ku Jashua akatshokola, akadianganya. Ku vo wakatshu utsha lu ngelu yawo.

⁷Mose akatasha etenyi ka hendi ka diuhu dia Manase ukito la Bashama, ku Jashua akayusha etenyi ka hendi kekina ukito lasuki lʼanangu la wedi one wa Jorodana, lu leke lʼedjelu. Okone lamʼakakaluya Jashua utsha lu ngelu yawo, ndi akatshokola;

⁸akawatela ati: Kanyukaluli utsha lu ngelu yanyu la ekundji efula, ngombe efula, fesa, paunyi, ehotela, mbulu, la ahondo efula. Kanyu-kahani la anengenyu diango dia dimbu diʼuma le atunyi anyu.

⁹Asi Rubena, asi Ngada, la etenyi ka hendi ka wudja wa Manase wakunela uma la Shilo ka la Kanana, wakatshiki asi Isariyele. Vo wakakalula utsha lu kete ya Ngiliyade, lu kete yʼukito awo. Vo wakayikiti, uku akatela Latuyalaka Mose.

¹⁰Lamʼakakumi asi Rubena, asi Ngada, la etenyi ka hendi ka diuhu dia Manase lu leke la Jorodana lu kete ya Kanana, vo wakahiki wima ediakelu leko lʼumamu wa Jorodana.

¹¹Asi Isariyele wakuki lukumu vati: Asi Rubena, asi Ngada, la etenyi ka hendi ka diuhu dia Manase wambuhika ediakelu lu kete ya Kanana, lu leke la Jorodana, lu wedi wʼasi Isariyele.

¹²Lamʼakuki ului wʼasi Isariyele tshe dikambu so, vo wakasangana kame la Shilo dia ntsho la ntolo la wo.

¹³Asi Isariyele wakatumela asi Rubena, asi Ngada, la etenyi ka hendi ka diuhu dia Manase Finehasi, onʼa olombedi Eleazara, lu kete ya Ngiliyade.

¹⁴Ndi la ewandji dikumi, uwandji uma lu luudu la luudu la washi, lu diuhu la diuhu dia Isariyele. Vo tshe waki ewandji wa mvudu ya washewo lʼatei wa nunu diʼasi Isariyele.

¹⁵Vo wakatshu le asi Rubena, asi Ngada, la etenyi ka hendi ka diuhu dia Manase lu kete ya Ngiliyade, wakatuwatela vati:

¹⁶Ului tshe wa Latuyalaka wambuta vati: Na wuhu wʼuhendudi one wambunyuhendwela Unyashungu wa Isariyele. Okoko wana wambunyukadimo kakiane uma le Latuyalaka lu ndjahikela ediakelu ka nyu mbotombokwela elo?[42]

¹⁷Kolo ka Pere dikambu dia tshitshe mbakito le su uka? Kuyanga mbakayi sui le ului wa Latuyalaka, shu takayaedia uma lu kolo Kako edja ndu elo?[43]

¹⁸Ku elo nyambukadimo uma le Latuyalaka ntu? Naka nyu nyambotombokwela latuyalaka elo, lui ndi ayuka ului tshe wa Isariyele kele.

¹⁹Naka kete yanyu yʼukito yeko mindu, kanyuteho utsha lu kete ya Latuyalaka, lene emadi etemwelo ka dipema ka Latuyalaka. Kanyutudjase lʼatei asu, keli tanyo-tombokwelaki Latuyalaka. Tanyatanaki la su, dia nyu ndjahikela ediakelu kekina ladiku diʼediakelu ka Latuyalaka, Unyashungu asu.

²⁰Kele ka Latuyalaka kundjala le ului tshe wʼasi Isariyele lamʼakashe Akana, onʼa Zera, diango diakakimwama le Latuyalaka uka? Aha ndi ndame utu kakavu lu kolo kandi.[44]

²¹Ku asi Rubena, asi Ngada, la etenyi ka hendi ka diuhu dia Manase wakakaluya ete wa khumbu ya Isariyele diui vati:

²²Unyashungu Kanga Wulu, Latuyalaka! Unyashungu Kanga Wulu, Latuyalaka! Ndi mbeyaka, ndu asi Isariyele vame weyi! Naka dikambu ne dieli uhendudi, kana dia ntombokwela Latuyalaka, tanyutushimbelaki elo.

²³Naka shu takayahikela ediakelu dia nkadimo uma le Latuyalaka, kana dia nambula elambu wa lutshumba, elambu wa shima kana elambu wa ki loko, Latuyalaka ndame asomboya.

²⁴Aha osoku, keli shu takakani dikambu ne edja shati: Lu nshi yayayi, anʼanyu wukumbula anʼasu vati: Lusambi lakona lenyu la Latuyalaka, Unyashungu wa Isariyele?

²⁵Ne dia Latuyalaka akadji Jorodana ulelu lʼasasu la nyu, nyu asi Rubena lʼasi Ngada; nyu nduku la ema le Latuyalaka. Okone anʼanyu wayunya woma wa Latuyalaka uma le anʼasu.

²⁶Diako mbakatati shati: Tuyahikeli ediakelu, aha dia nambula elambu kana elambu wa lutshumba.

²⁷To kayali omenyi lʼasasu la nyu, ndu lʼasa anʼasu la anʼanyu, dia shu ntshela Latuyalaka ulimu lʼelambu, elambu wa lutshumba, la elambu wa ki, ne dia anʼanyu watukutela anʼasu lushi lukina vati: Nyu kema la ema le Latuyalaka.

²⁸Okone shu takati shati: Lamʼayuwututela, shu kana anʼasu aui aso, shu tayakaluya diui shati: Nyendi wuhu wʼediakelu ka Latuyalaka kakahiki wa-shesu. To kema lʼelambu kana kʼelambu wa lutshumba, keli to keli omenyi lʼasasu la nyu.

²⁹Kanyi ya ntombokwela Latuyalaka yeko etali uma le su kuyanga nkadimo elo uma le ndi, dia mpika ediakelu kekina ne dia ulambu, ulambu wa lutshumba, kana ulambu wa shima, ladiku dia ediakelu ka Latuyalaka, Unyashungu asu, keli Ja ntundu ka etemwelo kandi ka dipema!

³⁰Lamʼakuki olombedi Finehasi, ewandji wʼelui wʼantu la ete wa khumbu yasi Isariyele waki la ndi aui wʼasi Rubena, asi Ngada la etenyi ka hendi ka diuhu dia Manase, vo wakangenangena efula.

³¹Finehasi onʼa olombedi Eleazara, akatela asi Rubena, asi Ngada la asi Manase ati: Shu tambulimbitela kakiane shati: Latuyalaka eko lʼatei asu, ne dia nyu kumpedia Latuyalaka lu dikambu ne. Okone nyu nyambuhandja asi Isariyele uma lu lunya la Latuyalaka.

³²Finehasi, onʼa olombedi Eleazara, la ewandji wakunela uma le asi Rubena, asi Ngada, lu kete ya Ngiliyade, wakayi le asi Isariyele lu kete ya Kanana. Vo wakiyasanyia akambu ako tshe.

³³Asi Isariyele wakangenangena, wakatumbula Unyashungu. Ku vo kunsanguya ntu dia ntolo la asi Rubena la asi Ngada, dia nanya kete yawo.

³⁴Asi Rubena, la asi Ngada wakole ediakelu kako vati: Ede, (kitshimudi ati: Omenyi), ne dia to keli omenyi lʼasasu la nyu ati: Latuyalaka keli Unyashungu.