Read tetala Jashua 24 Bible Online

Jashua 24 - tetala bible

Jashua 24

¹Jashua aketi dihangamendi dia Isariyele ete wa khumbu, embadi awo, la elombodi awo wa ta. Ndi akasanganya wauhu tshe wa Isariyele la Shikeme. Ku vo wakamote la ntundu ka Unyashungu.

²Jashua akatela antu tshe ati: Latuyalaka, Unyashungu wa Isariyele, kata ati: Watshenyu Tera,[47] la anʼandi Abarahama la Nahora wakadjase la wedi wa ndjali ka Efarate, wakatemolaka ditemolatemola.

³Dimi lakose tshenyu Abai thama uma la wedi wa ndjali.[48] Dimi lakolombola lu kete ya Kanana tshe. Lakawusha Isaka,[49] lakafudia tuka-nula tandi.

⁴Ku lakasha Isaka, Jakoba la Esau,[50] ku lakasha Esau leke lʼakuna la Seire ukito,[51] keli Jakoba la anʼandi wakatshu utsha lʼEdjibitu.[52]

⁵Dimi lakatumi Mose la Arona, lakasuya Edjibitu lu akambu wa mamba tshe wakamatshi lʼatei awo.[53] Ku lʼokongo diku dimi lakanyutundja uma leko.

⁶Dimi lakatundja washenyu uma lʼEdjibitu. Ku lamʼakanyakumi lʼUduwa a Tilili asi Edjibitu wakayelana la nyu la pusupusu ya ta, la ambahemi wa falasa pulu ndu lʼuduwa.

⁷Ku lamʼakawalelela Latuyalak, ndi akakitsha udjima lʼasanyu lʼasi Edjibitu, akaditsha lʼuduwa, akakhukume lʼashi. Nyu nyakenyi akambu wakamatshi lʼEdjibitu lʼashu anyu.[54] Ku nyu nyakatsnikala lʼusui wa shenga nshi efula.

⁸Dimi lakanyolombola lu kete yʼasi Amora, wakadjashi la wedi wa loudana. Vo wakalo la nyu. Keli dimi lakakimo lʼanya anyu, ndu lakalanya la ntundu kanyu. Ku nyu nyakakiti kete yawo.[55]

⁹Balaka, onʼa Zipore, khumʼekanga ka Moaba, akunela, akalo la Isariyele. Ndi aketi Balama, onʼa Beore, dia ndi ndjunyudja mananu.

¹⁰Keli dimi kunanga mbukela Balama, diako mbandanyotshokola.[56] Osoku mbakamanyuhandja uma lʼanya wa Balaka.

¹¹Nyu nyakateho Jorodana,[57] nyakakumi la Jeriko. Ku asi Jeriko wakalo la nyu,[58] vo lʼasi Amora, asi Perizi, asi Kanana, asi Hiti, asi Ngiringase, asi Hiwi la asi Jebuse. Keli dimi lakakimo lʼanya anyu.

¹²Dimi lakatumi ahuma[59] dia vo mbatshanya uma la ntundu kanyu, uku akamatshela khumi ya dikanga hyendi yʼasi Amora, aha la tombo tanyu kuyanga lʼeta anyu.

¹³Dimi lakanyusha kete yakinyu kunkamba, la esumba wakinyu kumpika, ku nyu nyambudjase loko. Nyu nyole elua uma lu dikambo diʼelua, la mbeli uma lʼetamba wakinyu kumune.[60]

¹⁴Okone nyukaki Latuyalaka woma. Nyukambelaki ulimu lu mete ndu la kolamelu. Nyunya ditemolatemola diakatemolaka washenyu la wedi wa Efarate, ndu lʼEdjibitu. Nyukambelaki Latuyalaka ulimu.

¹⁵Naka nyu hanyongenangena ntemola Latuyalaka elo, nyosonole kene kalanganyu ntemola, kana ditemolatemola diakatemolaka washenyu la wedi wa Efarate, kana ditemolatemola diʼasi Amora, akanga a kete yudjashinyu. Keli dimi la wa lu luudu lami tayotemolaka Latuyalaka ndame.

¹⁶Ku antu wakûkaluya diui vati: Kanyi ya ntuna Latuyalaka la ya ntemola ditemolatemola yeko etali uma le su,

¹⁷Ne dia Latuyalaka, Unyashungu asu, kakatutundja, shu la washesu, uma lu kete ya Edjibitu, lu luudu la lohombo. Ndi kakatshi tulimbitelu ta mamba lu ashu asu. Ndi kakayatulamaka lu mbuka tshe yakatayayakaka ndu lʼatei a wedja tshe wakatayalekanaka.

¹⁸Latuyalaka kakatutshanyia antu tshe, ndu asi Amora wakadjashi lu kete nye. Okone ndu shu, tayotemolaka paka Latuyalaka, ne dia ndi keli Unyashungu asu.

¹⁹Jashua akatela antu ati: Nyu hanyukuka nkambela Latuyalaka ulimu, ne dia ndi eli Unyashungu wʼekila, Unyashungu a kandjema. Ndi hunyudimanyia ehedia anyu la kolo yanyu.

²⁰Naka nyayoseka Latuyalaka, dia ntemola ditemolatemola diʼasi wedja, ndi ayukadimo, ayunyutshela kolo uku akandanyutshela ololo, ayunyudiaka.

²¹Ku antu wakakaluya Jashua diui vati: Kema, shu tayukambelaka paka Latuyalaka ulimu.

²²Ku Jashua akawatela ati: Nyu nyame nyambuyayalela emenyi. Ku vo waketawo vati: Elu, shu shame tambuyayalela emenyi lu dikambu ne.

²³Jashua akawatela ati: Kakiane, nyunya ditemolatemola diʼasi wedja dieli lʼatei anyu. Nyusha Latuyalaka, Unyashungu wa Isanyele, etema anyu.

²⁴Ku antu wakûkaluya diui vati: Shu tayotemolaka Latuyalaka, Unyashungu asu, tayukitanyiaka diui diandi.

²⁵Okone Jashua akadji lʼantu sheki lushi lako la Shekeme, akawadjela elembe la adjangu.

²⁶Jashua akafundi aui ane lu buku diʼelembe wa Unyashungu. Ndi nkose dive dia wuki, akadieme lʼesi utamba wʼulungu waki lu etemwelo ka Latuyalaka.

²⁷Jashua akatela antu tshe ati: Nyendi, dive ne diayuvala omenyi lu dikambu dianyu. Dio diambuka aui tshe wambututela Latuyalaka, ne dia nyutukutsha lukesu le Unyashungu anyu.

²⁸Ku Jashua akadianganya antu, untu lʼuntu utsha lʼetenyi kandi kʼukito.

²⁹Lʼokongo wʼakambu aso, Jashua, onʼa Nuna, akavu. Ndi aki la deku lu-kama la dikumi.

³⁰Ku wakukhunde la Timinate-Sera, lu kete yaki etenyi kandi kʼukito[61] keli lu akuna wa Efarayima, lu leke la ngelʼa kushi kʼukungu wa Ngashe.

³¹Asi Isariyele wakatemolaka Latuyalaka nshi tshe yaki Jashua la lumu, ndu nshi ya lumu tshe ya dihangamendi diakatshikala lʼokongo wa Jashua ndu diakeyi akambu tshe wakatshi Latuyalaka dikambu dia Isariyele.

³²Asi Isariyele wakakhunde weka wa Josefu wakawayembaka uma lʼEdjibitu la Shekeme, lu etenyi ka kete kakasumbi Jakoba le ana wa Hamora, shi Shekeme, lʼushinga wa tenyi dia fesa lukama. Ana wa Josefu mbakayala akanga ato.

³³Eleazara, onʼa Arona, akavu. Ku wakukhunde la Ngibeya, usumba wa onʼandi Finehasi, wakawawusha lu leke lʼakuna wa Efarayima.