Read tetala Jashua 5 Bible Online

Jashua 5 - tetala bible

Jashua 5

¹Lamʼakuki khumi ya dikanga tshe yʼasi Amora ya lu leke lʼedjelu ka Jorodana, la khumi ya dikanga tshe yʼasi Kkanana, ya lʼumamu washi a waki lukumu vati: Latuyalaka akumia ashi wa Jorodana la ntundu kʼasi Isariyele edja ndu lamʼakawashili nteho, etema awo wakayala ashi atu. Vo kundjala la dihunga ntu lu dikambu diʼasi Isariyele.

²Etena kako, Latuyalaka akatela Jashua ati: Utshuli kuwa yʼave, ahemia asi Isariyele uhekeli ntu etena ka hendi.

³Okone Jashua akatshi kuwa yʼave, akahemia asi Isariyele uhekeli la Ngibeyate Haralota (kitshimudi ati: Dikuna dia toto).

⁴Dikambu diakahumbi Jashua mbahemia asi Isariyele uhekeli ne: apami tshe wʼasi Isariyele wakayi uraa lʼEdjibitu andoshi wa ta tshe, wakayuvo lu mbuka, lʼusui lamʼakawayayakaka uma lʼEdjibitu.

⁵Apami aso tshe wakatahemi uhekeli lʼEdjibitu. Keli apami tshe wakayuto lu mbuka lʼusui lamʼakayayakaka asi Isariyele uma lʼEdjibitu, kumbahema uhekeli.

⁶Asi Isariyele wakatakendakendaka lʼusui wa shenga deku akumi anei, edja ndu lamʼakavu apami tshe, andoshi wa ta, wakatumbi uma lʼEdjibitu, ne dia vo kunkitanyiaka aui wa Latuyalaka. Diako mbakandatshibi diaha mbaenya kete yuludi too lʼawele la usanga, yakandalaki washewo dia mbasha.[8]

⁷Keli anʼawo wakikitsha Latuyalaka lu ahuli awo, mbakahemia Jashua uhekeli, ne dia vo kuntahemi uhekeli lamʼakawayayakaka lu mbuka.

⁸Lamʼakawashidiya mbahemia apami tshe uhekeli, vo wakatshikala lu ahuli awo lu pangu, edja ndu lamaʼkawakono.

⁹Ku Latuyalaka akatela Jashua ati: Elo kamumunyombela sonyi ka lʼEdjibitu dia nyunyiato. Diako mbatuwetaka dihuli diako edja ndu elo vati: Ngilingala (kitshimudi ati: Momba).

¹⁰Asi Isariyele wakahangi la Ngilingala. Vo wakadama elekanelu[9] la dikolo dia lushi la dikumi lʼanei la ngondo kako, lu mandja ya la Jenko.

¹¹Ku la wedi a pindju, vo wakali ekama wa ma diaha la edya, la nanula.

¹²La wedi a pindju wa elekanelu, lushi lako, vo wakali diango dia lu kete ku, mana komenama ntu.[10] Keli vo wakalekaka diango dia lu kete ya Kanana eleku kako.

¹³Lamʼaki Jashua lasuki la Jeriko, ndi akedia ashu, enyi ku pami kemotshi kene kemadi la ntundu kandi ukimedi yombo lu lunya, Jashua akatshu le ndi, akawumbula ati: Lu leke lasu keye, kana lu leke lʼatunyi asu?

¹⁴Ku ndi akakaluya diui ati: Kema; keli olombodi wʼului wʼalimbi wa Latuyalaka mbemi, kamʼa-yamayi aku. Jashua akayakosha ekhukhumadi la kete, akotemola; akawumbula ati: Khumemi, kayangaye mvutela ukambi aye na?

¹⁵Ku olombodi wʼului wʼalimbi wa Latuyalaka akatela Jashua ati: Ukululi sabata uma lʼekulu aye, ne dia dihuli diemadiye dieko ekila. Ku Jashua akatshi osoku.