Read tetala 2 Timote 2 Bible Online

2 Timote 2 - tetala bible

2 Timote 2

¹We onʼami, ukikitshami lu ngandji ka mamba keli le Kristu Jesu.

²Akambu wakayuki le mi lʼatei emenyi efula, uwakimo le akanga a kolamelu, weya lama mbetsha ndu akina.

³Usuwi ndu we uku dimbi diʼololo dia Kristu Jesu.

⁴Nduku dimbi dieya ndjadingitanya lu akambu akina wa lumu lone lamʼatshandi ulimu andi, ne dia ndi ayanga ngenyangenya lakawudji lu dimbi.

⁵Naka untu ambedika wulu andi lu tokenyo, ndi hose dembo dia kusu dia lutumbu, tshikima ndi ambukitanyia elembe wa tokenyo.

⁶Ukambi latukambaka wulu, atutatelaka nde diango dia lʼekambo.

⁷Ukani yimba dia akambu wakutelami, ne dia Khumadiondjo ayukusha ewu lu akambu tshe.

⁸Uho Jesu Kristu, lakulo uma lu nyoi, leli kanula ya Davidi, uku wata lukumu lʼololo lami.

⁹Dia dikambu dialo, mbasuwami ndu lu kanu uku utshi wʼakambu wa kolo. Keli diui dia Unyashungu hadiukelekama.

¹⁰Okone dimi lambetawo akambu tshe ne dia esonami, dia vo walunguli panda uma le Kristu Jesu, ndu lutumbu la pundju.

¹¹Diui dia kolamelu ne ati: Naka shu tambuvo kame la ndi, Keti tayuyala kame la ndi la lumu.

¹²Naka shu tayutetemala, Ku shu tayulela la ndi. Naka tayuwanguna, Ndu ndi ayutanguna.[4]

¹³Naka shu kema la kolamelu, Ndi atuyalaka la kolamelu — Ne dia ndi heyi ndjanguna.

¹⁴Uhuli antu akambu ako tshe, uwateli lu ashu wa Khumadiondjo diaha vo ntshana lu aui waheyi mbakimanyia, ndu wanganyia wane wawauka.

¹⁵Utetemali dia ndjakimo le Unyashungu uku untu lambuluwana, uku usi ulimu laha la dikambu dia mbutshama sonyi. Enya antu aui wa mete wʼusimbwi atu.

¹⁶Keli utuni aui wʼoteketateketa, ne dia antu ane wayuhama lu akambu wa dionyo.

¹⁷Aui awo wayufula uku puta ka lokengo. Humenaya la Fileto weko lʼatei awo.

¹⁸Vo wakanganela uma lu mbuka kʼakambu wa mete. Watutaka vati: Eulwelu kʼantu uma lu nyoi kambetaka, ndu wambunyukula mbetawo kʼantu amotshi.

¹⁹Keli etshina ka Unyashungu kambushikimala wulu, keko la djimbitelu nye ati: Khumadiondjo mbeyaka wane weli wandi. La diui dikina ati: Untu tshe latetaka lukumbu la Khumadiondjo, angani uma lu akambu wa kolo.

²⁰Lu luudu la wuki kema diango dia paunyi la fesa tu, keli ndu diʼetamba ndu dia kete; dikina dia nemo, dikina diaha nemo.

²¹Okone naka untu ambuyaedia ndame uma lu kolo sho, ndi ayuyala uku engo ka nemo, kukidiami, kakalongoswama lʼulimu wʼololo tshe, kakuka ntsha ulimu wʼuwandji a luudu.

²²Keli we, ulawo saki ya kolo yʼelongo wʼapami. Uyeli akambu wʼololo la mbetawo la ngandji, la ki, kame lʼantu weta lukumbu la Khumadiondjo uma lʼetema wa pudipudi.

²³Keli utuni embula waha la yimba ndu wahakuki, ne dia vo ntungaka tamu.

²⁴Ukambi wa Khumadiondjo hahumbi ndjala la tamu, keli ayali la memakana le antu tshe, lama mbetsha antu, ayali la wolamu.

²⁵Ewuli atunyi wa dikambu la memakana, kana Unyashungu ayukadimula etema two dia vo mbeya akambu wa mete,

²⁶dia vo ndjatundja uma lu djunga ya uhimbanyi, wane wakandandi uma lu lulangu landi.