Read tetala Heberu 11 Bible Online

Heberu 11 - tetala bible

Heberu 11

¹Mbetawo keli tshina dia akambu walungamelasu, keli uluwanyi wʼakambu wahatatenyi.

²Ne dia wakatela watshesu dia dikambu ne.

³Dia mbetawo, mbeyasu shati: Kete yakatungama la diui dia Unyashungu,[70] okone diango dienama kuntungama uma lu diango dienama.

⁴Dia mbetawo, mbakalambula Abele Unyashungu ulambu wuleki wa Kena ololo. Lu dikambu so mbakawawuti vati: Untu ololo kendi, Unyashungu kakati osoku lamʼakandalungula eshasha andi. Lu mbetawo kako, mbakandateketa, kuyanga ndi ambuvokaka.[71]

⁵Dia mbetawo, mbakasekwama Enoka, dia ndi tenaki nyoi; ndi kuntanema, ne dia Unyashungu akosekola La ntundu kʼesekwamelu kandi, wakawuti vati: Ndi akangenyangenya Unyashungu.[72]

⁶Untu laha la mbetawo, heyi mbongenyangenya. Ne dia dieli la one layuya le Unyashungu mbetawo ati: Ndi eko, la ndi keli ufutshi a wane watuyangaka.

⁷Dia mbetawo, mbakenyama Noa akambu wahatayi uma le Unyashungu; dia woma a Unyashungu, mbakandalongosola watu a luudu dia nshimbela khumbu kandi[73] Dia dikambu ne, mbakandamia wa la kete, mbakandayala ukito wʼakambu wʼololo wa lu mbetawo.

⁸Dia mbetawo, lamʼaketama Abarahama, ndi akakitanyia diui dia ntsho lu dihuli diakandayangi nungula ukito andi. Ndi akunela, kumbeya utsha lene atandatshu.[74]

⁹Dia mbetawo, mbakandayala ongendangenda lu kete yakawulaki, uku lu kete yaha yandi, akadjaseka lu tumbu, kame la Isaka la Jakoba, ekito waki la ndi lu daka diame.[75]

¹⁰Ne dia ndi akalungamelaka usumba weli la tshina dia wulu, Unyashungu keli umbiki la olongosodi awo.

¹¹Dia mbetawo, ndu Sara ndame akalungula wulu a ntsho diemi lamʼakindi usumbi[76] ne dia ndi aketawo ati: One lakandaki eko la kolamelu.

¹²Okone untu otoi, laki uku untu ambuvo, ana efula wakayala uma le ndi uku toto ta lʼulungu, la uku lokongo la lʼumamu wʼashi a wuki, laheyama mbalema.[77]

¹³Wane tshe wakavu lu mbetawo la ntundu watalungula alaka, keli vo wakawaenyi uma lʼetali, wakalemia; waketawo vati: Antu wa kana la angendangenda mbesu la kete nye.[78]

¹⁴Ne dia waku watutaka osoku, wambutenya vati: Ayangi wa kete yawo mbewo.

¹⁵Mete, utunduyala vo wakakanaka dia kete sho yakawamo, tshiki wakeyi nkalula loko.

¹⁶Keli kakiane vo nangaka kete yuleki ololo, yeli lʼulungu. Okone Unyashungu hawaukela sonyi dia vo mbeta vati: Unyashungu asu, ne dia ndi akalongoswela usumba.

¹⁷Dia mbetawo, mbakakimo Abarahama Isaka lamʼakandahimbama. One lakalungula alaka lʼongenongeno, akayangi nkimo onʼandi etoi lakanduti.[79]

¹⁸Ndʼako kakawati vati: Le Isaka, kayuweta tukanula taye.[80]

¹⁹Ndi aketawo ati: Unyashungu eko la wulu wa mbulula kuyanga wane wakavu; uma loko mbakandulungula uku djimbitelu.

²⁰Dia mbetawo, mbakatshokola Isaka Jakoba la Esau dia akambu wahatayi[81]

²¹Dia mbetawo, mbakatshokola Jakoba ana wa Josefu ahendi lamʼakandayangi mvo. Ndi akatemola Unyashungu, ekami lu danga diandi.[82]

²²Dia mbetawo, lamʼakayangi Josefu mvo, ndi akati dia etumbelu kʼasi Isariyele, akawadjangela dia weka andi.[83]

²³Dia mbetawo, lamʼakuto Mose, ambutshi andi wakawushe ngondo shatu, ne dia vo wakenyi vati: Ona a dimena kendi. Vo kumbuka olembe a khumʼekanga woma[84]

²⁴Dia mbetawo, lamʼakuli Mose, ndi akaseke mbetama ati: Onʼa ona umuntu a Farayo.[85]

²⁵Ndi akaleki nanga nsuwa la antu wa Unyashungu, aha ngenangena lu akambu wa kolo tshenyitenyi.

²⁶Ndi akakani ati: Lotengo ne dia Kristu lambuleka diango tshe dia lʼEdjibitu ongonyi, ne dia ndi akalungamelaka difutu diayayi.

²⁷Dia mbetawo, mbakandamo uma lʼEdjibitu,[86] kumbuka kele ka khumʼekanga woma; ne dia ndi akatetemala, uku untu lena one lahenamaka.

²⁸Dia mbetawo, mba-kandatatela dambu diʼElekanelu, la emongelo ka dikila, ne dia undjaki wʼana wa nundu atukuwananda.[87]

²⁹Dia mbetawo, mbakawateho Uduwa a Tilili uku lu kete yambuma. Asi Edjibitu, lamʼakawahimbi osoku, vo wakaditama lu ashi.[88]

³⁰Dia mbetawo, mbakanyuko kumbu ya Jeriko lamʼakawayitshimbi nshi esambeli.[89]

³¹Dia mbetawo, Rahaba, umuntu kanga luseka, kumvo kame la waku waki la uhedia,[90] ne dia ndi akalungula atopi la ki.[91]

³²Ukundi ayumuta ntu? Dihuli ha diukuki dia dimi mvuta dikambu dia Ngidiyona,[92] Baraka,[93] Samisona,[94] Jefeta[95] dia David[96] la Samuele[97] la amvutshi —

³³Dia mbetawo kawo, mbakawalembia waulelu, wakatshaka akambu wʼololo, wakalungula alaka, wakadihi enyo wa tambwe,[98]

³⁴wakadimi dja ya wulu,[99] wakahandi pemo ka yombo. Uma lu weodu mbakawayala la wulu wakayala wulu lu ta, wakatshanya alimbi la angendangenda.

³⁵Amantu wakalungula asikawo wakavu, wakulwama uma lu nyoi.[100] Akina wakakomwama wulu, kumbetawo ntshungwama, ne dia vo nungula eulwelu kuleki ololo.

³⁶Akina waki la dikambu dia ntengama ndu dia nkomwama, ndu diʼekodi, ndu dia kanu.[101]

³⁷Vo wakukama ave,[102] wakahimboma pi la nso, wakahimbama, wakadiakema la tombo. Vo wakakendakenda wolotshikuhu diʼekoko la dia mbudi; wakahumbi, wakasuyama, wakatshamela kolo —

³⁸wa la kete kombedima la wo ololo. Vo wakakendakendaka lu ahuli wa tosenga ndu ln ekungu ndu lu weuku, ndu lu afuku wa lu kete.

³⁹Wane tshe wakeyama dia mbetawo kawo, kunungula daka.

⁴⁰Unyashungu akatolongoswela dikambu diuleki ololo, dia vo watukuluwana aha uma le su.