Read tetala Heberu 13 Bible Online

Heberu 13 - tetala bible

Heberu 13

¹Anyasu, nyutetemali mbukana ngandji.

²Tanyuhelaki menya ange-ndangena ketshi, ne dia amotshi wakahangia andjelo lamʼakiwo kumbalimbitela.[116]

³Nyuhoki wane weli lu kanu, uku ndu nyu mbukelekami la wo; ndu waku wambusuyama, uku ndu nyu mbasuyama lu alimba.

⁴Diwala dialemiami le antu tshe, dia antu tawunanaki, ne dia Unyashungu ayulumbuya akanga a munanyi la luseka.

⁵Tanyuyalaki la saki ya diango. Nyuyali la ongenongeno lu diango dieli la nyu, ne dia Unyashungu ndame kakati ati: Dimi hakoseke, halakutshiki.[117]

⁶Okone shu tambuta shati: Khumadiondjo keli ukimanyidi ami; haluki woma. Kayuntshela untu?[118]

⁷Nyuhoki elombodi anyu, wakanyutelaka diui dia Unyashungu. Nyukani yimba ya ditshelu diawo, nyukuya mbetawo kawo.

⁸Jesu Kristu eko pupu lui ndu elo, ndu pundju.

⁹Tanyunganyiamaki la wetshelu wa wehu la wehu wʼantu. Ndeka ololo dia utema nshikikala lu ngandji ka mamba, aha lu mbu ya nde, yahasha watuyiyangaka waho.

¹⁰Shu teko la ediakelu, kaheyi wane watutshaka ulimu wa luudu la dipema nde loko.

¹¹Ne dia etundu wa nyama ku yatelaka olombedi a ladiku dikila diayo lu etemwelo uku ulambu wʼakambu wa kolo, yatutshumbamaka lʼandja a pangu.[119]

¹²Okone ndu Jesu akasuwi lʼandja a suku dia lukumbu, ne dia nkidia antu lu dikila diandi.

¹³Okone tutshu le ndi lʼandja a pangu, totengami la ndi.

¹⁴Ne dia shu kema la usumba wa pundju lindu, keli tatuyangaka usumba wayayi.

¹⁵Dia dikambu diandi, tukimoki ulambu wa mandulaka Unyashungu nshi tshe, uku elua uma lu elomo watetawoka lukumbu landi.

¹⁶Keli tanyuhelaki ntshanela ololo la nkimanyanyiana, ne dia Unyashungu atongenangenaka lʼelambu wa wuhu oso.

¹⁷Nyukitanyia aui wʼelombodi anyu, nyuyali lʼokongo awo, ne dia vo watosenaka dia etema anyu, uku antu wayedika la Unyashungu diango Vo watutshaka dikambu so la ongenongeno, aha la lunyangu, ne dia dikambu diako hadiunyusha nduku waho.

¹⁸Nyutolombelaki, ne dia shu tambeya shati: Teko la khumʼutema kʼololo, shu nangaka ndjala la kenemo lu akambu tshe.

¹⁹Dimi lambutamanya nyokokomiya dia nyu ntsha wuhu oso, dia dimi nkalula le nyu esadi.

²⁰Unyashungu a ki, lakâkaluya ulami a wuki wʼekoko uma lu nyoi la dikila dia sheki ya pundju, Khumesu Jesu,

²¹anyuluwanya lu elimu wʼololo tshe dia nyu ntsha lulangu landi, dia ntsha akambu weli la kenemo lu ashu andi, dia Jesu Kristu! Lutumbu layali le ndi pundju pundju! Ayali osoku!

²²Anyasu, dimi lambunyokokomiya nti: Nyetawo diui diakamanyewula, ne dia lakanyufundela paka aui tshitshe.

²³Nyeyi nyati: Unyasu Timote akatshungwama uma lu lukanu. Naka ndi ndja esadi, keti dimi layuya kame la ndi dia ndjunyenda.

²⁴Nyusha elombodi anyu tshe moyo, ndu ekilami tshe. Wa lʼItaliya wambunyutumela moyo.

²⁵Ngandji ka mamba kayali la nyu tshe! Ayali osoku!