Read tetala Heberu 2 Bible Online

Heberu 2 - tetala bible

Heberu 2

¹Okone dieli la su dia ndeka nkana akambu wakatuki, shu tatukangana uma le wo.

²Na dia naka diui diakati andjelo ntakashikikala, ndu kolo tshe la uhediu wakalungula difutu diedimi la etsha uko,

³ukundi ayutuhanda, naka tambukale panda kene ka wuki? To kukatutela Khumanioadjo ntundu, ndu kakashikikala le su uma le wane wakakiuki.

⁴Ndu Unyashuagu kukati diui kume la wo lu tulimbitelu la akambu wu mamba, lu akambu wa wulu wu wehu efula, ndu lu eshushu wu Nyuma kʼOlolo, uku lulungu landi.

⁵Ne dia ndi kumbete wa la kete yayayi yatasu la tshina diʼandjelo wa Unyashungu.

⁶Keli untu omotshi akatutela lu dihuli dikina ati: Untu akona luwuhwe? Kana onʼa untu, akona lakendelaye?

⁷We kakutungi yema tshitshe la tshina dia andjelo; We akulimbe dembo dia kusu la lutumbu ndu la kenemo, Akûkitsha ladiku dia elimu wa anya aye.

⁸Ndi akete diango tshe la tshina diʼekulu andi.[8] Ne dia ndi akete diango tshe lʼokongo andi, nduku engo kakandatshiki, kaha lʼokongo andi. Keli kakiane, shu hatenyi diango tshe dietema lʼokongo andi.

⁹Keli shu menaka Jesu, one lakawaete lʼokongo wa andjelo yema, ulimbi dembo dia kusu la lutumbu ndu la kenemo ne dia asui wa nyoi, ne dia ndi mvwela antu tshe, dia ngandji ka mamba ka Unyashungu.

¹⁰Diango tshe diakatungama dikambu diandi, diango tshe diakatungama uma le ndi. Okone ndi akela ana efula lu lutumbu, dia nduwanya utungi wa panda kawo uma lʼasui.

¹¹Ne dia one latukidiaka la wane wambukidiama weko tshe kame. Okone ndi huki sonyi dia mbaeta ati: Anyasu;

¹²ata ati: Dimi layutela anyasu lukumbu laye, Layukimbela esambu wa nkandula lʼatei wa lusanganya.[9]

¹³Ndu ntu ati: Dimi layuwekama.[10] Ndu ntu ati: Dimʼone, dimi la ana wakambisha Unyashungu.[11]

¹⁴Okone, ne dia ana weko la emunyi la dikila, ndu ndame akayala uku vo; dia ndi nembia laki la wulu a nyoi, letawo vati: Uhimbanyi, uma lu nyoi kandi;

¹⁵la dia ndi ntshungula wane tshe wakatshungama uma lu fumbi ka woma a nyoi.

¹⁶Mete, ndi hakimanyia andjelo, keli ndi atukimanyiaka tukanula tʼAbarahama.

¹⁷Okone diaki la ndi dia nfanyema la anyandi lu akambu tshe, dia ndi ndjala olombedi a ladiku a ketshi la wa kolamelu lʼulimu a Unyashungu, ne dia nambwela antu ulambu wa kolo yawo.

¹⁸Ne dia ndame akasuyama ndu akahimbama, mbeyandi nkimanyia wane wambuhimbama.