Read tetala Jakoba 3 Bible Online

Jakoba 3 - tetala bible

Jakoba 3

¹Anyami, tanyuyalaki embetsha efula; nyeyi: Shu tayuyala la elumbwelu kuleki wuki,

²ne dia shu tshe tatutakanaka lu akambu efula. Naka untu hatakana lu diui diandi, keti ndi ambuluwana, ndi mbeyaka nshimba dimba diandi tshe.

³Shu tatudjaka ashingu lu enyo wa falasa ne dia yo nkitanyia diui diasu, okone tambusikisula alimba ayo tshe.

⁴Nyendi ndu mashua wʼashi, kuyanga mbewo waki, vo watokendjakendjamaka la pepe ya wulu, keli watusikiswamaka la djenda ya tshitshe, uku alanga kanga djenda.

⁵Okone ndu lulimi leko leke la tshitshe la dimba, ku lo latosemaka lu akambu a waki. Nyendi uku atohetshamaka kunyi efula la shasi ya dja!

⁶Lulimi leko uku dja. Lulimi leli utundu wʼakambu wa kolo lʼatei a beke diʼalimba asu. Lo latulanyaka dimba tshe, latohetshaka nyumu tshe la dja yakahetshama uma lu Luwinga la dja.

⁷Ne dia wehu tshe wa nyama, la wa fudu, la wa diango diayakutula ndu wa diango dia lʼashi a wuki diatekiyamaka, ndu diakekiyama le antu,

⁸keli nduku untu leya mbekiya lulimi! Lo leko engo ka kolo, katuhasahasaka, lambulula too la lolengo la nyoi.

⁹La lulimi mbatutotemolaka Khumesu Shesu; la lo mbatutudjaka antu wakatungama lu efanelu ka Unyashungu[10] mananu.

¹⁰Diui diʼotshoko la dia mananu diatutumbaka lʼunyo otoi. Anyami, kema ololo akambu aso ndjala osoku.

¹¹Eteko kʼashi mbeyaka ntundja ashi wʼololo la ashi wʼululu lu ushu otoi kame uka?

¹²Anyami, undi, utamba a fingu mbeyaka nto mbeli, kana okodi wa vinyo nto fingu? Okone ashi wa leho heyi ntundja ashi wʼololo.

¹³Untu akona eli la ewu la yimba lʼatei anyu? Ndi enya antu akambu andi wʼololo la etsha andi wʼololo la memakana ka yimba yandi.

¹⁴Keli naka nyambuyala la kandjema la tamu lʼetema anyu, tanyuyatumbulaki, tanyutaki kashi lu akambu weli mete.

¹⁵Yimba nye kumpulo uma lʼulungu, keli yo yeko ya la kete, yeko ya dimba, yeko ya Uhimbanyi.

¹⁶Ne dia lamʼeli kandjema la tamu, laawo keli ufutanu la akambu wa kolo tshe.

¹⁷Keli yimba yakahulo uma lʼulungu, ntundu yeko pudipudi, lʼokongo yeli ki, la memakana, la osengosengo. Yo yambulula too la ketshi la elua wʼololo, yaha la tamu, yaha la lukesu.

¹⁸Elua wʼakambu wʼololo wambunema lu ki le antu watuyangaka ki.