Read tetala 1 Petero 4 Bible Online

1 Petero 4 - tetala bible

1 Petero 4

¹Ne dia Kristu akasuwi lu dimba, ndu nyu nyuyalotsha la tukanyi pupu. Ne dia untu lakasuwi lu dimba, ambushila nkimo kolo,

²diaha nyu ndjela saki yʼantu lamʼekinyu la lumu lu alimba, keli dia ndjela lulangu la Unyashungu.

³Ne dia nshi yakanyayelaka saki yʼasi wedja yakakuki, lamʼakanyakendakendaka lu akambu wa kolo, la songu ya munanyi, la dinwelo dia wanu, la engenongeno wa kolo, la mindju yakanyadjoka wanu, la ditemwelo dia dikishi dia wononyi.

⁴Vo wambamba, ne dia nyu hanyutshu la wo pulu lu akambu wa kolo ako ntu; vo watunyotendaka.

⁵Keli vo wayutela one lakayalongosola dia numbuya weli la lumu ndu wakavu akambu awo.

⁶Dia dikambu ne, mbakawasambisha ndu wakavu lukumu lʼololo, dia vo numbuyama uku antu wasena, keli dia vo ndjala la lumu lʼetema uku eli Unyashungu.

⁷Keli ekumelu kʼakambu tshe kaya suki, okone nyuyali la yimba yʼololo, nyolembohali, nyolombaki.

⁸Ladiku dia akambu tshe, nyutamanya mbukana ngandji, ne dia ngandji atukumbaka akambu wa kolo efula.[24]

⁹Nyulungwanilu mvudu yanyu lʼongenongeno, aha lʼungunungunu.

¹⁰Uku akalungula untu lʼuntu ushasha, nyuwushani, uku alami wʼololo wa wehu efula wa ngandji ka mamba ka Unyashungu.

¹¹Naka untu atutaka diui, ati uku atandi aui wa Unyashungu; naka untu atukambelaka akina ulimu, atshi la wulu watuwushaka Unyashungu, ne dia Unyashungu atumbwami lu akambu tshe uma le Jesu Kristu. Lutumbu la diulelu wayali le ndi pundju pundʼiu! Ayali osoku!

¹²Elangimi ami, tanyambaki dia akambu wa wulu weli lʼatei anyu, wambuya le nyu dia nyuhimba, nyati: Dikambu dʼuyuyu diambuya le su.

¹³Keli nyongenengene, ne dia nyu nyambusuwa la Kristu, ne dia nyu mbeya ngenangena lʼongenongeno utamanya lʼenyelo ka lutumbu landi.

¹⁴Naka nyu nyambotengama dia lukumbu la Kristu, nyu nyeko la otshoko, ne dia nyuma ka lutumbu ndu ka Unyashungu, keko la nyu.

¹⁵Keli omotshi lʼatei anyu tasuyamaki uku tomboki, kuyanga uku uvi, kuyanga uku utshi a kolo, kuyanga uku kanga esaku lu akambu wa kana.

¹⁶Keli naka untu omotshi ambusuyama uku usika Kristu, ndi tukaki sonyi, keli ndi atumbuli Unyashungu lu lukumbu lone,

¹⁷ne dia etena kambukuka dia elumbwelu ntatela le wa lu luudu la Unyashungu. Naka to kambutatela le su, ukundi ayuyala ekumelu ka waku wahakitanyia lukumu lʼololo la Unyashungu?

¹⁸Ku Naka untu ololo ambushimbamela, Lendi ayenama omonyodi la untu a kolo?[25]

¹⁹Okone wane wasuwa uku lulangu la Unyashungu, wakimo etema awo lu akambu wʼololo le utungi leli la kolamelu.