Read tetala 1 Petero 5 Bible Online

1 Petero 5 - tetala bible

1 Petero 5

¹Dimi lambokokomiya dikumanyi dia lʼatei anyu, ndu dimi keli ekumanyi, ndu omenyi wʼasui wa Kristu, ndu ulungudi a lutumbu layanga menama, nti:

²Nyulamaki ekoko wa Unyashungu[26] weli lʼatei anyu. Nyuwalami, aha la khudu, keli la etema wʼongenongeno, uku eli lulangu la Unyashungu, aha dikambu diʼukundji, keli la yimba yolongoswami.

³Tanyahamelaki wane weli lʼokongo anyu, keli nyuyali tulimbitelu tʼololo le ekoko.

⁴Lamʼayene Ulami a wuki, nyu nyayulungula Jembo dia kusu dia lutumbu, diahalana.

⁵Okone nyu akenda, nyetawo aui wa dikumanyi. Ee, nyu tshe nyuyalotsha la ndjakitshakitsha, ne dia nkambanela, ne dia Unyashungu atutunaka akanga wʼutaku, keli atushaka wane wayakitshakitsha ngandji ka mamba.[27]

⁶Okone nyuyakitshakitsha la tshina dia lunya la wulu la Unyashungu, dia ndi nyumbiya lamʼayukuka etena kanyu.[28]

⁷Nyukitsha ukananu anyu tshe le ndi, ne dia ndi atunyukanelaka.

⁸Nyuyali ki, nyendaki. Utunyi anyu uhimnanyi atokendakendaka uku tambwe kadikita kayanga walendi.

⁹Nyutetemali mbutuna lu mbetawo kanyu; nyeyi nyati: Anyanyu wa la kete watusuwaka pupu.

¹⁰Unyashungu a ngandji ka mamba tshe lakanyeti lu lutumbu landi la pundju le Kristu, lamʼayunyusuwa etenyi ka tshitshe, ndame ayunyuluwanya, ayunyushikike, ayunyukikitsha.

¹¹Diulelu diayali le ndi pundju pundju! Ayali osoku!

¹²Dimi lambunyufundela aui tshitshe ane le Silivano,[29] latami nti: Unyasu la kolamelu; lambunyokokomiya dia nyenya nti: Ngandji ka mamba ka Unyashungu a mete kene; nyuyashikike loko.

¹³Ekelizia wa la Babilona, wambosonama la nyu, wanyutumela moyo. Ndu Mako[30] onʼami anyutumela moyo.

¹⁴Nyononani la ngandji. Ki kayali la nyu, nyu tshe weli le Kristu!