Read tetala 2 Petero 1 Bible Online

2 Petero 1 - tetala bible

2 Petero 1

¹Simona Petero, ukambi la utumami a Jesu Kristu. Le antu wakalungula mbetawo kʼololo pupu uku keli la su lu ololo a Unyashungu asu Ushimbedi Jesu Kristu:

²Ngandji ka mamba la ki waludiami le nyu lu nimbitela Unyashungu le Jesu Khumesu!

³Wulu wa Unyashungu ambutusha diango tshe dieli kame la lumu la ololo andi, ne dia shu tambulimbitela one lakateti dia lutumbu landi la ololo andi.

⁴Lu akambu ane, mbakandatusha alaka wa ushinga a wulu la wa waki otekoya. Lu dikambu diawo, mbayuwunyete elungudi wʼakambu wʼololo weli lʼutema a Unyashungu. Nyu nyakahandi uma lʼehondelo keli le wa la kete uma lu saki ya kolo.

⁵Dia dikambu ne, nyutetemali dia nsanganya ololo wʼutema lu mbetawo kanyu; lu ololo wʼutema nyusanganya yimba;

⁶lu yimba, nyusanganya ndjakimela; lu ndjakimela, nyusanganya ndu etetemalu; lu etetemalu, nyusanganya ndu ololo a Unyashungu;

⁷lu ololo a Unyashungu, nyusanganya ketshi le anyanyu; lu ketshi le anyanyu, nyusanganya ngandji.

⁸Naka akambu ane wambuhama lu etema anyu, vo hawunyete tusuasua kana uku antu wahato elua dia nimbitela Khumesu Jesu Kristu.

⁹Naka untu laha la akambu aso, keti kanga tshungu kendi, latenaka diango dieli lasuki tu. Ndi ambuhela ati: Dimi lakediama uma lu akambu ami wa kolo wʼedjedja.

¹⁰Okone anyasu, nyutetemali dia nshikimala lu leta lanyu la lu osonamelu anyu. Naka nyu nyayutsha akambu aso, ku hanyutakana pundju.

¹¹Okone wayunyusha eotwelo ka lu diulelu dia pundju dia Khumesu, Ushimbedi Jesu Kristu.

¹²Okone dimi layuhoka dia nyuhula akambu ane nshi tshe, kuyanga nyu mbaeyaka, ndu nyambushikikala lu akambu wa mete weli la nyu.

¹³Dimi lambukana nti: Dikambu ne dieko ololo lamʼekimi lu dimba ne, dia dimi ntshutshiya etema anyu, dia nyuhula;

¹⁴nedia dimi mbeyaka nti: Etena ka dimi mumo lu dimba diami kayukuka esadi, uku akamenya Khumesu Jesu Kristu.

¹⁵Okone dimi layutetemala lu akambu ane, ne dia nyu mbeyaka mbauho tena tshe lamʼayumuvo.

¹⁶Ne dia shu kundjela ekondo wʼuma lu yimba yʼantu, lamʼakatanyutela dia wulu la dia eyelu ka Khumesu Jesu Kristu, keli shu taki emenyi wa lutumbu landi lu ashu.

¹⁷Ne dia ndi akalungula kenemo la lutumbu uma le Unyashungu, Shesu, lamʼakayi diui ne le ndi uma le Lutumbu la Khumadiondjo ati: Onʼami la ngandji one, ndi atongenyangenyaka.

¹⁸Shu takuki diui so diakayi uma lʼulungu, lamʼakisu kame la ndi lʼukungu wʼekila.[1]

¹⁹Shu teko la diui ne diʼamvutshi, diuleki nshikimala. Okone nyu nyayutsha ololo lamʼayunyewo, uku ewonyu tala diaheta lu dihuli dia udjima edja ndu lamʼayuhuto unya, ndu lamʼayuhanema yoto ya loheto lʼetema anyu.

²⁰Nyuteyi dikambu ne nyati: Diui diʼefundelu hadiukadimwama le untu lʼuntu.

²¹Ne dia nduku diui diʼamvutshi diakayi uma lu lulangu la antu, keli antu wakati diui uma le Unyashungu, wakasukuyama uma le Nyuma kʼOlolo.