Read tetala 1 Joani 2 Bible Online

1 Joani 2 - tetala bible

1 Joani 2

¹Anʼami wa tshitshe, dimi lambunyufundela akambu ane dia nyu nyatukutsha kolo. Naka untu ayutsha kolo, shu teko la oteketedi lasuki la Shesu, ndi keli Jesu Kristu, kanga akambu wʼololo.

²Ndi keli ulambu wa ntulambwela dia kolo yasu, aha ulambu asu shame atu, keli weko ndu wa antu tshe wa la kete.

³Dia dikambu ne mbeyasu mete shati: Shu mbeyaka naka shu tatulamaka elembe andi.

⁴Untu lata ati: Dimi mbeyaka, ku halami elembe andi, keti kanga kashi kendi. Akambu wa mete kema lʼutema andi.

⁵Keli, untu latulangaka diui diandi, mete, ngandji ka Unyashungu kambufula lʼutema andi. Dia dikambu ne mbeyasu shati: Shu teko lʼutema andi.

⁶Untu lata ati: Dimi leko lʼutema andi, dieli la ndi dia nkendakenda uku akandakendakendaka.

⁷Elangimi ami, aha olembe wʼuyuyu[3] mbanyufundelami, keli dimi lambunyufundela olembe wʼedjedja, waki la nyu uma lʼetatelu. Olembe wʼedjedja weli diui diakanyuki.

⁸Ntu, dimi lambunyufundela olembe wʼuyuyu weli mete le ndi ndu le nyu; ne dia udjima utsha nshila, yanyi ya mete yamboheta.

⁹Untu lata ati: Lu yanyi kemi, ku ndi mpetshaka unyandi, keti ndi eki lu udjima edja ndu kakiane.

¹⁰Untu lalanga unyandi, atuyalaka la yanyi, nduku engo ka ntakanya antu katuyalaka lu yanyi.

¹¹Keli untu lahetsha unyandi, ndi eki lu udjima, la atokendakendaka lu udjima. Ndi heyi lene atandatshu, ne dia udjima ambuwula ashu.

¹²Anʼami wa tshitshe, dimi lambunyufundela, ne dia kolo yanyu yambudimanyema ne dia lukumbu landi.

¹³Nyu washewo, dimi lambunyufundela ne dia nyu mbeyaka one laki uma lʼetatelu. Elongo wʼapami, dimi lambunyufundela ne dia nyu nyakaleki kanga kolo wulu. Anʼami wa tshitshe, dimi lambunyufundela ne dia nyu mbeyaka Shesu.

¹⁴Nyu washewo, dimi lakanyufundela ne dia nyu mbeyaka one laki uma lʼetatelu. Elongo wʼapami, dimi lakanyufundela ne dia nyu nyeko la wulu. Diui dia Unyashungu diatuyalaka lʼetema anyu, nyu nyakaleki kanga kolo wulu.

¹⁵Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema lʼutema andi.

¹⁶Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete.

¹⁷Akambu wa la kete la saki yawo wayushila. Keli one latutshaka lulangu la Unyashungu, atuyalaka pundju.

¹⁸Anʼami wa tshitshe, unya a ndjihelu utsha nkuka, la uku akanyuki ati: Utunyi a Kristu ukuya; ndu kakiane, atunyi wa Kristu efula wambuyakaka. Okone shu mbeyaka shati: Unya a ndjihelu utsha nkuka.

¹⁹Vo wakamo uma lʼatei asu, keli vo tawaki wasu mete. Utuwuyala wasu mete, tshiki vo watutshikala la su. Keli vo wakamo ne dia menyama vati: Waku tshe tawaki wasu mete.

²⁰Keli lʼEkila akanyukiti iso lʼete, ku nyu mbeyaka akambu tshe.

²¹Dimi kunyufundela ne dia nyu kumbeya akambu wa mete, keli dimi lakanyufundela ne dia nyu nyambuwaeyaka, la ne dia diui dia kashi hadiutumbi uma lu mete.

²²Untu akona eli kanga kashi, naka aha one languna ati: Jesu kema Kristu? One languna Shesu la Onʼandi, ndi keli utunyi a Kristu.

²³One languna Ona, kema la Shi. One letawo Ona eko ndu la Shi.

²⁴Keli nyetawo diui diakanyukaka uma lʼetatelu, dio diayalaki lʼetema anyu. Naka diui diakanyuki lʼetatelu diayuyala lu etema anyu, ku ndu nyu nyayuyala la utema wa Ona ndu wa Shesu.

²⁵Daka diakandatulaki dieli lumu la pundju.

²⁶Akambu ane mbakamanyufundela dia antu walanga nyunganyia.

²⁷Keli dia dikambu dianyu, ekitelu ka iso kakanyalungula uma le ndi, katuyalaka la nyu. Okone hanyuhumbi untu dia nyetsha. Keli ekitelu kene ka iso kambunyetsha akambu tshe. To keli mete, kaha kashi, uku akanyetsha iso kako, okone nyuyalaki lu utema andi.

²⁸Anʼami wa tshitshe, nyuyalaki lu utema andi, ne dia naka ndi ayene, shu katuyali la dihunga. Tatuyalaki la sonyi la ntundu kandi lamʼayunduya.

²⁹Naka nyu mbeyaka nyati: Ndi eko ololo, nyeyi nyati: Untu tshe latutshaka ololo, akuto uma le ndi.