Read tetala 1 Joani 5 Bible Online

1 Joani 5 - tetala bible

1 Joani 5

¹Untu tshe letawo ati: Jesu keli Kristu, ndi ambuto uma le Unyashungu. Untu tshe latulangaka umbutshi, atulangaka ndu lakuto uma le ndi.

²Dia dikambu ne mbeyasu shati: Shu tatulangaka ana wa Unyashungu, lamʼalangasu Unyashungu, ndu lamʼatshasu elembe andi.

³Ngandji ka Unyashungu kene, dia shu nama elembe andi:[11] ku elembe andi hawuleki wutshu.

⁴Ne dia untu tshe lambuto uma le Unyashungu, atulekaka akambu wa la kete wulu. Engo kuleki akambu wa la kete wulu eko mbetawo kasu.

⁵Untu akona atulekaka akambu wa la kete wulu, aha one letawo ati: Jesu eko Onʼa Unyashungu?

⁶Jesu Kristu ndʼako kakayi lʼashi la dikila; aha lʼashi atu, keli lʼashi la dikila.

⁷Nyuma eko omenyi ne dia Nyuma eli mete.

⁸Emenyi esatu mbeko: Nyuma, ashi la dikila, vo asatu weko kame.

⁹Naka shu tambetawo aui wata antu, aui wata Unyashungu mbuleki. Ne dia aui ane mbakatutela Unyashungu, ne dia ndi akatutela dikambu dia Onʼandi.

¹⁰Untu tshe letawo Onʼa Unyashungu eko la omenyi a dikambu diako lʼutema andi. Untu tshe lahetawo Unyashungu, ambuwete kanga kashi, ne dia ndi hetawo diui diakati Unyashungu dia Onʼandi.

¹¹Aui ane mbakandatutela ati: Unyashungu akatusha lumu la pundju, la lumu lako leko lʼutema wa Onʼandi.[12]

¹²One leli la Ona, eko la lumu; one laha la Onʼa Unyashungu kema la lumu.

¹³Dimi lambunyufundela akambu ane, dia nyu mbeya nyati: Nyu wane wetawo lukumbu la Onʼa Unyashungu nyeko la lumu la pundju.

¹⁴Dihunga ne mbeli la su le ndi shati: Naka shu tayolomba engo uku lulangu landi, ndi ayutukela.

¹⁵Naka shu tambeya shati: Ndi atutukelaka lu kene katutolombaka, shu mbeyaka shati: Shu tambulungula kene kakatalombe.

¹⁶Naka untu ambena unyandi atsha kolo kaha ka nyoi, ndi alombe, ku Unyashungu ayuwukela, dia mbisha wane wahatshi kolo ka nyoi lumu. Dikambu dia kolo dia nyoi dieko. Dimi halati nti: Ndi alombe dia dikambu diako.

¹⁷Akambu tshe waha ololo weko kolo, ndu dikambu dia kolo dieko, diaha dia nyoi.

¹⁸Shu mbeyaka shati: Untu tshe lambuto uma le Unyashungu, hatutshaka kolo. Keli one lambuto le Unyashungu, atuyalamaka, ku kanga kolo hawunanda.

¹⁹Shu mbeyaka shati: Wa Unyashungu mbesu, ku wa la kete tshe weko lu wulu wa kanga kolo.

²⁰Shu mbeyaka shati: Onʼa Unyashungu akayi. Ndi akatusha yimba ya nimbitela one leli mete. Shu teko lʼutema wa one leli mete, lʼutema wa Onʼandi Jesu Kristu. One eli Unyashungu a mete, ndu lumu la pundju.

²¹Anʼami wa tshitshe, nyewo dikishi.