Read tetala Embadi 1 Bible Online

Embadi 1 - tetala bible

Embadi 1

¹Lʼokongo wa nyoi ka Jashua, asi Isariyele wakambula Latuyalaka vati: Akona lʼatei asu ayutsho ntundu dia ntolo lʼasi Kanana ta?

²Latuyalaka akakaluya diui ati: Juda kayutsho. Enda, lambukimo kete lʼanya andi.

³Juda akatela Simeyona onangu ati: Yete tutshu utsha lʼetenyi kami kʼukito, dia ntolosha asi Kanana; ku dimi layutsho la ye utsha lʼetenyi kaye kʼukito. Okone Simeyona akatshu la ndi.

⁴Juda akatshu, ku Latuyalaka akakimo asi Kanana la asi Perizi lu anya awo. Vo wakatudiaka antu nunu dikumi la Bezeke.

⁵Vo wakatutana Adoni-Bezeke lʼusumba wa Bezeke, wakalo la ndi. Ku wakalembia asi Kanana la asi Perizi.

⁶Keli Adoni-Bezeke akalawo. Vo wakayelana la ndi, ku wakatuwunda, wakuhimbula pita ya waumi ya lʼanya ndu ya lʼekulu.

⁷Adoni-Bezeke akati ati: Khumi ya dikanga akumi esambeli yakahimbwama waumi wa pita wa lʼanya ndu wa lʼekulu, wakatongonaka fusa ya ma la tshina dia mesa ami. Unyashungu ambuntshela uku akamatshaka. Vo wakatshu la ndi la Jerusalema. Ku ndi akatuvo leko.

⁸Asi Juda wakatolosha usumba wa Jerusalema, wakolembia; wakadiaki antu la tombo, wakutshumbi.

⁹Ku lʼokongo diku asi Juda wakatshu la ntolo lʼasi Kanana wakadjashi lu ekungu wa Nengebe ndu lʼekidi, lu leke la diku dia kushi.

¹⁰Ku Juda akatshu la ntolo lʼasi Kanana wakadjashi la Heberona (kakawetaka ntundu vati: Kiriyate-Areba). Ndi akalembia Sheshai, Ahimana la Talamai.

¹¹Ku uma leko ndi akatshu la ntolo lʼasi Debire (diakawetaka ntundu vati: Kiriyate-Sefere).

¹²Kaleba akati ati: Dimi layusha untu layolembia Kiriyate-Sefere onʼami Akisa wadi.

¹³Otenyele, onʼa Kenaza, kushe Kaleba, akdlembia. Ku Kaleba akawusha onʼandi Akisa wadi.

¹⁴Lamʼakandayi laka Otenyele, ndi akosengasenga dia ndi ntolomba shi ekambo. Lamʼakahulo Akisa uma lu punda kandi, Kaleba akawumbula ati: Kahumbaye na?

¹⁵Ku ndi akûkaluya diui ati: Umbisha ushasha omotshi. We akakitsha lu kete ya Nengebe; umbisha ndu teko diʼashi. Ku Kaleba akawusha teko dia ladiku ndu dia lʼesi.

¹⁶Ana wʼusi Kene, ukilu a Mose, wakatshu kame la asi Juda uma lʼusumba wʼatuku utsha lʼusui wa shenga wa la Juda, weli lu leke la Nengebe, lasuki la Arada. Vo wakatshu, wakatudjase lʼatei wʼantu wa leko.

¹⁷Juda akatshu kame la Simeyona onangu. Vo wakatolembia asi Kanana, wakadjashi la Zefata. Vo wakalanya usumba ako tshe, ku vo wakawole vati: Horoma.

¹⁸Juda akalembia ndu Ngaza, la leke lawo, Ashikalona la leke lawo, la Ekerona la leke lawo.

¹⁹Latuyalaka aki la Juda, okone ndi akatshanya antu wakadjashi lʼekungu. Keli ndi kumbeya mbitshanya wane wakadjashi lʼekidi, ne dia vo waki la pusupusu ya ta ya mbulu.

²⁰Vo wakasha Kaleba Heberona uku akati Mose. Ndi akatshanya ana asatu wʼAnaka uma leko.[1]

²¹Asi Bendjamina kumbitshanya asi Jebusi wakadjashi la Jerusalema. Okone asi Jebusi wakadjase la Jerusalema kame la wo edja ndu elo.[2]

²²Ndu khumbu ka Josefu wakatshu la ntolosha Betele. Latuyalaka aki la wo.

²³Vo wakatutuma atopi la ntotopa Betele (kakawetaka ntundu vati: Luza).

²⁴Atopi wakenyi untu omotshi ayatumbi uma lʼusumba. Vo wakawumbula vati: Utenya eotwelo kʼusumba, ku shu tayukuhumuya lukulu lʼolo.

²⁵Ndi akawaenya eotwelo kʼusumba. Vo wakadiaki asi usumba la tombo, keli wakahandja untu ako, ndi la khumbu kandi tshe.

²⁶Ku untu ako akatshu lu kete yʼasi Hiti, akatuhika usumba leko. Ndi akawole lukumbu ati: Luza. Lukumbu loso mbatuwetaka usumba ako edja ndu elo.

²⁷Asi Manase kumbitshanya asi Bete-Shana, la wane waki lu esumba wa lʼokongo awo, asi Tanaka, la wane waki lʼokongo awo, asi Dora la wane waki lu esumba wa lʼokongo awo, asi Jebelame, la wane waki lu esumba wa lʼokongo awo, ndu asi Mengido, la wane waki lu esumba wa lʼokongo awo. Asi Kanana wakashikikala lu kete yako.

²⁸Lamʼakayala asi Isariyele la wulu efula, vo wakete asi Kanana ekambi awo, keli vo kumbatshanya.[3]

²⁹Asi Efarayima kumbitshanya asi Kanana wakadjashi la Ngezere. Okone asi Kanana wakadjase kame la wo la Ngezere.[4]

³⁰Asi Zebuluna kumbitshanya asi Kiterona, kuyanga asi Nahalola. Okone asi Kanana ako wakadjase lʼatei wʼasi Zebuluna, keli vo wakayala lʼokongo awo.

³¹Asi Ashere kumbitshanya asi Ako, asi Sidona, asi Alaba, asi Akizibe, asi Helebe, asi Afika, kuyanga asi Rehobe.

³²Okone asi Ashere wakadjase kame la asi Kanana, akanga a kete, ne dia vo kumbatshanya.

³³Asi Nafetali kumbitshanya asi Bete-Shemeshe la asi Bete-Anata wakayala lʼokongo awo.

³⁴Asi Amore wakakaluya asi Dane utsha lʼekungu. Vo kumbetawo dia vo mpulo lʼukidi.

³⁵Okone asi Amore wakadjase lu Hara-Heresa lu Adjalona, ndu lu Shalabima. Keli khumbu ka Josefu wakayala la wulu efula. Okone asi Amora wakayala lʼokongo awo.

³⁶Kete yʼasi Amora yakasimbimala umaka edelu ka Akarabima, uma la Sela pulu ndu la diku.