Read tetala Embadi 14 Bible Online

Embadi 14 - tetala bible

Embadi 14

¹Samisona akatshu la Timina, ku ndi akatena umuntu omotshi lʼatei wʼana amantu wʼasi Filistiya.

²Lamʼa-kandakalula, ndi akatutela shi la nyangu ati: Dimi lakatena umuntu omotshi la Timina lʼatei wʼana amantu wʼasi Filistiya. Okone nyutuntshukendi.

³Shi la nyangu wakawumbula vati: Undi, nduku umuntu omotshi lʼatei wʼana amantu wakuti ananyo kana lʼatei wa wudja asu tshe, mbambuyutsho dia ntosa wadi uma lʼatei wʼasi Filistiya, wane wahahemaka uhekeli? Samisona akatela shi ati: Utombosendi, ne dia ndi nkalangami.

⁴Keli shi la nyangu kumbeya vati: Dikambu ne diambuya uma le Latuyalaka. Ndi akayangi mbuka kukukindi mama lʼasi Filistiya. Lu nshi yako asi Filistiya wakuledi asi Isariyele.

⁵Samisona akahulo utsha la Timisa, ndi la shi la nyangu. Lamʼakawakumi lu dikambo dia vinyo diʼasi Timina, enyi ku osongo a tambwe one wayadikita uya le ndi.

⁶Nyuma ka Latuyalaka akawahema, ku ndi akatshatsha tambwe uku untu latshatsha yana ya mbudi. Ndi taki la engo lu lunya. Ndi kumvutela shi la nyangu dikambu diakandatshi.

⁷Ndi akahulo, akatusawula la umuntu ako. Ku umuntu akatekoya mbulanga.

⁸Lamʼaketi nshi motshi, ndi akakalula la Timina dia ntuwosa wadi. Ndi aketola dia ntenda dikandja dia tambwe, atani ku ului wa ndjui one la usanga lu dikandja diako.

⁹Ndi akose usanga lu anya andi, akatalekaka lu mbuka; akatusha shi la nyangu yema. Vo wakali, keli ndi kumbatela ati: Lakatawoshi uma lu dikandja dia tambwe.

¹⁰Ku shi akatshu utsha laka umuntu ako. Samisona akatukate dambu dia wuki leko; ne dia osoku mbaki etshelu ka elongo wʼapami lu nshi sho.

¹¹Lamʼakenyi antu Samisona, vo wakawetela anyandi akumi asatu, dia ndjala kame la ndi.

¹²Samisona akawatela ati: Nyuki diko; naka nyu nyayunkadimweladio lʼatei a nshi esambeli ya dambu, dimi layunyusha ahondo wa linene akumi asatu la ahondo akina akumi asatu.

¹³Keli naka nyu hanyeyi dikadimula, ku nyu mbishami ahondo wa linene akumi asatu la ahondo akina akumi asatu. Ku vo wakawutela vati: Utukedio.

¹⁴Ku ndi akawaukedio ati: Uma le one latolokaka, kakatumbi engo ka nde. Uma le kanga wulu, kakatumbi engo ka mpe. Lʼatei a nshi shatu, vo kumbeya nkadimula diko diako.

¹⁵Lu lushi la nei la dambu, vo wakatela wadi a Samisona vati: Olembelembe umeye dia ndi ntukadimwela diko. Naka aha osoku, shu tayukutshumba we la wa luudu la sho. Aha dia ndjutumba la diango, mbakanyateti?

¹⁶Ku wadi a Samisona akatulela la ntundu kandi ati: Mete, we ambuntuna, we hayunanga, we akuki asi wudja ami diko, keli we atankadimweladio. Ku ndi akûkaluya diui ati: Dimi latadikadimwela papa la nyomi, ku dimi ndjukukadimweladio we uka?

¹⁷Wadendi akalelaka la ntundu kandi nshi esambeli ya dambu diawo. Ku lushi lʼesambeli ndi akukadimwela diko diako, ne dia ndi akohenyahenya. Ku ndi akatudikadimwela asi wudja andi.

¹⁸Ku asi usumba wakawumbula lushi lʼesambeli, la ntundu ka unya atadji, vati: Engo kakona kuleki usanga mpe? Engo kakona kuleki tambwe wulu? Ku ndi akawatela ati: Utunduyala nyu kompenyahenya ngombe kami ka wadi, Tshiki nyu hanyeyi nkadimula diko diami.

¹⁹Nyuma ka Latuyalaka akawahema wulu. Ku ndi akahulo utsha lʼAsikalona; ndi akatudiaka antu akumi asatu leko, akose ahondo awo, akayusha wane wakakadimula diko diandi. Ndi akadunganela la kele, akatshu utsha lakawo.

²⁰Wakose wadi a Samisona wakawusha umbekesanedi a Samisona, wadi.