Read tetala Embadi 18 Bible Online

Embadi 18 - tetala bible

Embadi 18

¹Lu nshi sho, tawaki la khumʼekanga lu Isariyele. Asi Dane wakayangi dihuli dia mbidjase, ne dia edja ndu lushi loso, ku etenyi kawo kʼukito lʼatei a wedja wa Isariyele katakumi lu anya awo.

²Asi Dane wakasonola apami atanu wʼahunga uma lu khumbu yawo. Vo wakatumi uma la Zora la Eshitaole dia ntotopa kete, dia ntuyishishima. Vo wakawatela vati: Nyutshu, nyutukembi kete. Vo wakatukuma lu leke lʼakuna wa Efarayima pulu ndu lu luudu la Mika, wakatuhanga leko.

³Lamʼakawasukana la luudu la Mika, vo wakuki olongo a pami, usi Lewi, ateketa. Ku vo wakasukana utsha le ndi, wakatuwumbula vati: Akakela lindu na? atshaye lane na? Ulimu akona wakambaye lane?

⁴Ku ndi akakaluya diui ati: Mika akantshela ngane la ngane. Ndi akambotshiya lʼulimu, la dimi lambuyala olombedi andi.

⁵Vo wakosengasenga vati: Utumbweli Unyashungu, dia shu mbeya kana shu tayuhumo lukulu lʼolo lu lokenao lone latatatshu.

⁶Ku olombedi akakaluya diui ati: Nyutshu la ki; Latuyalaka ayutanyulamaka lu lokendo lanyu.

⁷Ku apami ako atanu wakatshu, wakatukuma la Laishi. Wakatutana antu wudjashi la ki ka mamba, uku asi Sidona. Vo waki la ki, ndu kumpumba engo, ne dia nduku umbuledi wakiko dia mbautsha sonyi. Vo waki etali uma le asi Sidona ndu kumbekesanela la antu akina.

⁸Vo wakakalula le anengewo la Zora la Eshitaole. Anengewo wakawambula vati: Lele akanyatshu, ngandi?

⁹Ku vo wakakaluya diui vati: Tutshu, tutalosha; shu takatena kete, mete yo yeko ololo efula. Kakanyakungi ntu? Tanyutshimbatshimbaki, nyuneli, nyutukiti kete yako.

¹⁰Lamʼayunyutsho, nyu nyayututana wudja wuyadjasedi ki. Kete ya wuki mbeyo. Unyashungu ambuyikimo lu anya anyu: dihuli diahahumbama nduku engo tshe ka la kete.

¹¹Apami a wulu kama shamalu wʼasi Dane wakunela uma la Zora la Eshitaole wukimedi diango diawo dia ta.

¹²Vo wakatshu, wakatuhanga la Kiriyata-Jarima ka la Juda. Okone vo mbetaka dihuli diako edja ndu elo vati: Mahane-Dane (kitshimudi ati: Pangu ka Dane). Dihuli diako dieko lu leke lʼedjelu ka unya ka Kiriyate-Jarima.

¹³Vo wakunela uma leko, wakatshu utsha lu leke lʼakuna wa Efarayima, wakatukuma pulu ndu lu luudu la Mika.

¹⁴Ku apami ako atanu wakatshu dia ntotopa kete ya Laishi, wakambula anengewo vati: Nyu hanyeyi nyati: etemolatemola kemotshi, tukishikishi tomotshi, ekishi ka losela la ka lolelola, dieko lu mvudu nye? Nyukani yimba wuhu wukukinyu ntsha.

¹⁵Vo wakasukana utsha leko, wakoto lu luudu lʼolongo a pami, usi Lewi, laka Mika; wakawumbula vati: We la wulu?

¹⁶Apami kama shamalu wʼasi Dane wakatemala lʼeotwelo wukimedi diango diawo dia ta.

¹⁷Ku apami atanu ako wakatshu dia ntotopa kete, wakoto lu luudu, wakose ekishi ka losela, etemolatemola, tukishikishi, la ekishi ka lolelola. Olombedi akemadi lʼeotwelo ka ngelu kame la apami kama shamalu wukimedi diango diawo dia ta.

¹⁸Lamʼakawoto lu luudu la Mika dia ntosa ekishi ka losela, etemolatemola, tukishikishi, la ekishi ka lolelola, olombedi akawumbula ati: Atshanyu na?

¹⁹Ku vo wakûkaluya diui vati: Tshikala ki, diha unyo! yete tutshu, uyali shesu la olombedi asu. Uleki ololo le ye na? Dia ndjala olombedi wa luudu la untu otoi, kana olombedi a wudja wʼutundu wa lʼatei wʼasi Isariyele?

²⁰Olombedi akangenangena efula. Ndi akose etemolatemola, tukishikishi, la ekishi ka losela, akatshu kame la wo.

²¹Okone vo wakamo uma leko, wakatshu. Vo waketsha anʼawo, dungalunga diawo, la diango diawo la ntundu.

²²Lamʼakawayala tshalula uma lu luudu la Mika, asukanyi wa Mika wakamote, wakayelana lʼasi Dane, wakatuwanda.

²³Vo waketi asi Dane lʼungumba a wulu. Asi Dane wakakadimo, wakambula Mika vati: Kambutumba na, kayayayelana la su okone na?

²⁴Ku ndi akakaluya diui ati: Nyu nyakatoshi dikishi diami diakamatshi la olombedi ami, ku nyu nyakunedi: kambutshikala la mi na? Ukundi amumbulanyu nyati: Kambutumba na?

²⁵Asi Dane wakûkaluya diui vati: Toteketaki nduku diui lʼatei asu. Naka aha osoku, akanga a kele wayukudiak ndu we, ndu wa lu luudu laye.

²⁶Asi Dane wakakolamela lokendo lawo. Lamʼakenyi Mika ati: Vo ntuleka wulu, ndi akakadimo, akakalula lakandi.

²⁷Vo wakatshu la diango diakatshi Mika la olombedi waki la ndi. Vo wakatukuma la Laishi, le wudja waki ki waki kumpumba engo. Ku vo wakadiaki la yombo, wakatshumbi usumba.

²⁸Vo kundjala la ushimbedi, ne dia dihuli diako diaki etali uma la Sidona, ndu vo kumbekesanela lʼantu akina. Dihuli diku diaki lʼukidi welanedi la Bete-Rehobe. Asi Dane wakahiki usumba, wakadjase loko.

²⁹Vo wakole usumba ako vati: Dane, lukumbu la shewo, lakuto le Isariyele. Keli ntundu waketaka usumba ako vati: Laishi.

³⁰Asi Dane wakayakitshiya ekishi kako ka losela. Jonatana, onʼa Ngereshome, onʼa Mose, ndi la anʼandi, waki elombedi a wudja wa Dane, edja ndu lamʼakatolama wudja awo lu fumbi.

³¹Okone vo wakatemolaka ekishi ka losela ka Mika kakandatshi nshi tshe yaki luudu la Unyashungu la Shilo.