Read tetala Embadi 2 Bible Online

Embadi 2 - tetala bible

Embadi 2

¹Ondjelo wa Latuyalaka akunela uma la Ngilingala utsha la Bokima. Ndi akati ati: Dimi lakanyutundja uma lʼEdjibitu, lakanyolombola uya lu kete yakamatshibi dia mbisha washenyu. Dimi lakati nti: Dimi halulanya sheki yakamadji la nyu.

²Dimi lakanyutela nti: Tanyudjaki lʼasi kete nye sheki, nyuhandjuli diakelu diawo.[5] Keli nyu kunkitanyia diui diami. Okoko wana wakanyatshi okone?

³Ku dimi lakati nti: Dimi haluwatshanya la ntundu kanyu. Vo wayuyala uku atende lu pandju yanyu, la ditemolatemola diawo diayuyala djunga le nyu.

⁴Lamʼakatela ondjelo Latuyalaka asi Isariyele tshe aui aso, antu wakadi tukuku, wakaleli wulu.

⁵Ku vo wakole dihuli diako vati: Bokima (kitshimudi ati: Alelu). Vo wakalambula Latuyalaka elambu laawo.

⁶Lamʼakadianganya Jashua asi Isariyele, vo tshe untu lʼuntu akatshu la ntukita etenyi kandi kʼukito lu kete yako.

⁷Asi Isariyele wakatemolaka Latuyalaka nshi ya lumu tshe ya Jashua, ndu nshi ya lumu tshe ya dihangamendi diakatshikala lʼokongo wa Jashua ndu diakeye akambu tshe wakatshi Latuyalaka dikambu dia Isariyele.

⁸Jashua, ona Nune, ukambi wa Latuyalaka, akavu lamʼakindi la deku lukama la dikumi.

⁹Ku wakukhunde la Timinate-Herese, lu kete yaki etenyi kandi kʼukito[6] keli lu ekungu wʼEfarayima, lu leke la ngelʼa kushi lʼukungu wa Ngasha.

¹⁰Lolonga lako tshe lakayeli washewo, ku lolonga lukina laki kumbeya Latuyalaka, kuyanga akambu wakandatshela Isariyele lakuli, lakakite.

¹¹Asi Isariyele wakatshi kolo lu ashu wa Latuyalaka, wakatendela WaBala.

¹²Vo wakaseke Latuyalaka, Unyashungu a washewo, lakatundja uma lu Edjibitu, wakatemola ditemolatemola dia wedja wakadingi. Vo wakadikusela adui, wakukia Latuyalaka kete.

¹³Vo wakaseke Latuyalaka, wakatemola Bala la WaAshitarota.

¹⁴Ku kele ka Latuyalaka akafulanela le asi Isariyele. Ku ndi akakimo lʼanya wʼananyishi wakalanya. Akasundja le atunyi wakadingi. Okone vo kumbeya nshikikala ntu la ntundu kʼatunyi awo.

¹⁵Latuyalaka akasuya lu ahuli tshe wakawatshu, uku akandawatela, ndu uku akandatshibela. Okone vo wakasuwi wulu.

¹⁶Latuyalaka akatundjiya embadi wakashimbela uma lʼanya a waku wakalanyaka.

¹⁷Vo kumbukela embadi awo, wakatendela ditemolatemola, wakadikuselaka adui. Vo waketola esadi uma lu mbuka kakakendakendaka washewo. Vo kunkitanyia elembe wa Latuyalaka uku akakitanyiaka washewo.

¹⁸Lamʼakatundjiya Latuyalaka embadi, Latuyalaka akayalaka kame lʼumbadi, akashimbela uma lʼanya wʼatunyi awo lu nshi tshe ya lumu lʼumbadi ako. Ne dia Latuyalaka akalembe utema lamʼakawakhumaka akhumu ne dia asui wakawasuyaka.

¹⁹Keli lamʼakavu umbadi, vo wakakadimo ntu, wakaleki washewo ntsha kolo, wakatendela ditemolatemola, wakadikusela adui. Vo wakashikikala lu ditshelu diawo ndu lu ahedia awo.

²⁰Kele ka Latuyalaka kakafulanela le asi Isariyele. Ndi akati ati: Lamʼambulanya antu ane sheki yakamadji la washewo, ndu lamʼahawakitanyisha diui diami,

²¹dimi halutshanya nduku wudja ukina ntu uma la ntundu kawo, lʼatei a wedja wakatatshiki Jashua lamʼakandavu.

²²Uma le wedja ene mbayumedika asi Isariyele dia mbeya kana vo wayokendakendaka lu mbuka kami, dimi Latuyalaka, uku akakendakendaka washewo, kana kema.

²³Okone Latuyalaka akatshiki wedja ako ki, kumbatshanya esadi kuyanga mbakimo lu anya wa Jashua.