Read tetala Embadi 20 Bible Online

Embadi 20 - tetala bible

Embadi 20

¹Asi Isariyele tshe, uma la Dane pulu ndu la Bere-Sheba, ndu uma lu kete ya Ngiliyade, wakunela, wakatusangana kame uku untu otoi la ntundu ka Latuyalaka la Mizipa.

²Ewandji wʼantu tshe wa wauhu tshe wa Isariyele wakasangana kame la ului wʼantu a Unyashungu, andoshi wa ta watokendakendaka lʼekulu wukimedi tombo. Vo waki antu nunu kama nyei.

³(Ku asi Bendjamina wakuki lukumu vati: Asi Isariyele wambomota la Mizipa). Ku asi Isariyele wakambula usi Lewi, umi a umuntu lakadiakema, vati: Ututeli, uku akayala dikambu ne dia kolo.

⁴Ku ndi akakaluya diui ati: Dimi lakakumi la usika ami la Ngibeya ka la Bendjamina, dia mbishama leko.

⁵Apami wa la Ngibeya wakunela dia ndo la mi, wakadingi luudu lakamahangi lʼutshu. Vo wakalangi ndjakami. Vo wakose useka ami, wakeyana la ndi la kudu, ku ndi akavu.

⁶Dimi lakose udu wʼuseka ami, lakosese lu betshi, lakaditumi lu kete tshe yʼukito lu Isariyele, ne dia vo wakatshi dikambu dia sonyi ndu dia wononyi lu Isariyele.

⁷Nyu asi Isariyele ane tshe weli lane, nyututeli tukanyi tanyu ndu esangweyu kanyu lu dikambu ne.

⁸Antu tshe wakemala kame uku untu otoi, wakati vati: Nduku untu uma lʼatei asu layutsho lu luudu landi la dipema, ndu nduku untu layukalula lakandi.

⁹Keli shu tayutshela asi Ngibeya okone: uma lʼeukelu kʼuwali, mbayutosonola wane wayutsho dia ntalosha.

¹⁰Shu tayosonola apami dikumi uma lu lukama lʼatei a wedja tshe wa Isariyele, lukama uma lu kinunu, kinunu, kinunu uma lu nunu dikumi; dia membela antu mbu ya nde. Okone lamʼayuwukuma la Ngibeya ka la Bendjamina, vo wayeya nsomboya akambu wa sonyi tshe wakawatshi lu Isariyele.

¹¹Okone asi Isariyele wakamote kame uku untu otoi dia ndosha usumba.

¹²Ku wedja wa Isariyele wakatumi antu lʼatei a khumbu ya Bendjamina, wakawambula vati: Na kolo kene kakanyatshi?

¹³Kakiane ayukimo antu ane wa kolo weli la Ngibeya dia shu mbadiaka, la minya kolo uma lʼatei wa Isariyele. Keli asi Bendjamina kumbetawo nunga aui wʼanengewo, asi Isariyele.

¹⁴Asi Bendjamina wakatumbi uma lʼesumba awo, wakasangana la Ngibeya dia ndjolo la asi Isariyele.

¹⁵Lushi lako vo wakasangana, andoshi wa ta wʼasi Bendjamina, apami nunu akumi ahendi la samalu uma lʼesumba awo. Aso waki ladiku diʼalimbi kama esambeli wa la Ngibeya.

¹⁶Lʼatei a wudja one andoshi wa ta kama esambeli waki akanga a lomoso. Vo tshe wakeyaka mbuka ave, kumpandjaka kuyanga wondji a divu.

¹⁷Apami wa Isariyele wakeyaka ndo la tombo, aha mbala asi Bendjamina waki antu nunu kama nyei. Vo tshe waki andoshi wa ta.

¹⁸Asi Isariyele wakunela; wakatumbula Unyashungu la Betele vati: Akona lʼatei asu ayutsho ntundu dia ntolosha asi Bendjamina? Ku Latuyalaka akakaluya diui ati: Juda katshu ntundu.

¹⁹Asi Isariyele wakunela; wakatuhanga lasuki la Ngibeya.

²⁰Vo wakatumbi dia ntolosha asi Bendjamina, ku vo wakatuhumana la wo lasuki la Ngibeya.

²¹Asi Bendjamina wakatumbi uma la Ngibeya, wakadiaki asi Isariyele nunu akumi ahendi la pendi lushi lako.

²²Ku asi Isariyele wakakeketsha etema, wakatuhumana la wo ntu lu dihuli diakawalo lushi la ntundu.

²³Asi Isariyele wakatshu, wakatolela la ntundu ka Latuyalaka edja ndu dikolo. Vo wakambula Latuyalaka vati: Kawo shu ntsho, dia ntolo la anengesu, asi Bendjamina, ntu? Ku Latuyalaka akakaluya diui ati: Nyutshu dia ntolo la wo.

²⁴Asi Isariyele wakasukana lushi la hendi dia ndo la asi Bendjamina.

²⁵Ku lushi lako, asi Bendjamina wakatumbi uma la Ngibeya dia ntuhumana la wo. Vo wakakitsha asi Isariyele nunu dikumi la enanei kedikedi, vo tshe wakeyaka ndo ta la tombo.

²⁶Ku wudja wʼutundu tshe wa Isariyele wakatshu la Betele, wakatulela, wakatudjase la ntundu ka Latuyalaka, wakakili ma lushi lako edja ndu dikolo. Vo wakalambula elambu wa lutshimba la elambu wa ki la ntundu ka Latuyalaka.

²⁷Vo wakambula Latuyalaka (ne dia lu nshi sho oshete wa sheki wa Unyashungu waki leko,

²⁸la Finehasi, onʼa Eleazara, onʼa Arona, akemalaka la ntundu kʼoshete ako lu nshi yako) vati: Kawo shu ntsho dia ntolo la anengesu asi Bendjamina ntu, kana ntutshiki dikambu? Latuyalaka akakaluya diui ati: Kanyutshu, ne dia lui dimi layakimo lu anya nyu.

²⁹Asi Isariyele wakakitsha lalu lʼutshimba wa Ngibeya.

³⁰Asi Isariyele wakatshu dia ntolosha asi Bendjamina lushi la satu. Vo wakayalonge lasuki la Ngibeya uku tena dikina.

³¹Ku asi Bendjamina wakatumbi dia ndjolo la wo, wakakutwama etali uma lʼusumba. Vo wakatatela ndjaka asi Isariyele, uku akawadiaki tena dikina lu esese weli omotshi utsha la Betele, la ukina utsha la Ngibeya lʼusui, wakadiaki lasuki la antu akumi asatu.

³²Ku asi Bendjamina wakati vati: Enda, shu tamtalembia uku akatalembia etena ka ntundu. Keli asi Isariyele wakati vati: Talawo, tumo la wo uma lʼusumba uya lʼesese.

³³Asi Isariyele tshe wakunela uma lu dihuli diakiwo, wakatemala dia ndo la wo la Bala-Tamara. Asi Isariyele waki lu lalu wakakhunguso uma lu dihuli diakiwo, lʼukidi wa Ngibeya.

³⁴Apami nunu dikumi wakawasonola uma lʼatei wʼasi Isariyele tshe wakatolosha Ngibeya. Ta diakayala wulu, keli asi Bendjamina kumbeya vati: Diasu ku elo!

³⁵Latuyalaka akalembia Bendjamina la ntundu ka Isariyele. Lushi lako asi Isariyele wakadiaki asi Bendjamina antu nunu akumi ahendi la tanu la lukama, waku tshe wakeyaka ndo ta la tombo.

³⁶Okone asi Bendjamina wakenyi vati: Vo wambutolembia. Asi Isariyele wakadimbiya ndawo asi Bendjamina, ne dia vo wakalungamela asi lalu wakawatshiki lasuki la Ngibeya ndo la wo.

³⁷Asi lalu wakatasemasemaka utsha la Ngibeya, wakatukhunguso utsha lʼusumba. Vo wakadiaki antu tshe waki loko la tombo.

³⁸Asi lalu wakatalaki asi Isariyele djimbitelu, vati: Nyu nyayena dinga efula diambumbela lʼusumba.

³⁹Asi Isariyele wakakadimo, wakalawo, ku asi Bendjamina wakatatela mbalembia. Vo wal adiaki lasuki lʼantu ak jmi asatu. Vo wakati vati: Mete, shu tambalembia uku akatalembia lu ta dia ntundu.

⁴⁰Lamʼakatuto usumba dinga, asi Bendjamina wakakadimo. Enyiwo ku usumba tshe wambutuwo dinga.

⁴¹Ku asi Isariyele wakatukana. Ku asi Bendjamina wakandama la nindi; wakenyi vati: Diasu diambushila elo!

⁴²Vo wakuki asi Isariyele ekokonga, wakalawo utsha lʼusui wa shenga. Keli asi Isariyele wakatukana, wakayelana la wo. Ndu waku wakatumbi uma lʼusumba, wakadiaki efula lʼatei awo.

⁴³Vo wakahake asi Bendjamina lʼatei, wakayelana la wo, wakawatshanya uma le Noha pulu ndu lu welelo wa Ngibeya, lu leke lʼehutwelu ka unya.

⁴⁴Vo wakadiaki asi Bendjamina nunu dikumi la enanei. Aso tshe waki apami a wulu.

⁴⁵Vo wakakadimo, wakalawo utsha lʼusui wa shenga pulu ndu lu dive dia Rimona. Asi Isariyele wakadiaki nunu tanu lu mbuka. Vo wakayelana la wo edja ndu la Ngidome, wakadiaki nunu pendi.

⁴⁶Okone lushi lako, wadiaki asi Bendjamina nunu akumi ahendi la tanu wakeyaka ndo ta la yombo. Aso tshe waki apami a wulu.

⁴⁷Keli antu kama shamalu wakakadimo, wakalawo utsha lʼusui wa shenga, pulu ndu la dive dia Rimona, wakatushama lu dive diako dia Rimona ngondo nyei.

⁴⁸Ku asi Isariyele wakatukalula dia ndosha asi Bendjamina wakatshikala. Vo wakadiaki ndu vo ndu ngombe la tombo. Vo wakalanya usumba la diango tshe diaki loko. Wakatatshumbaka esumba tshe wakawatatanaka.