Read tetala Embadi 21 Bible Online

Embadi 21 - tetala bible

Embadi 21

¹Asi Isariyele wakatadji dokoloko la Mizipa, vati: Untu uma lʼatei asu, tetawoki usi Bendjamina ntshuka onʼandi.

²Ku antu wakakumi la Betele, wakatshikala la ntundu ka Latuyalaka edja ndu la dikolo, wakatundo la alelu;

³wakaleli wulu vati: Latuyalaka, Unyashungu wa Isariyele li, ukundi ambuyala dikambu ne lu Isariyele, dia Isariyele mpumba wudja omotshi?

⁴Ku wedi a pindju antu waketo la kesekese, wakahiki ediakelu leko. Vo wakalambula elambu wa lutshumba la wa ki.

⁵Vo wakambwana vati: Diuhu diakona lʼatei a wauhu tshe wa Isariyele diahayi lu lusanganya la ntundu ka Latuyalaka? Ne dia vo wakatadji dokoloko vati: Diuhu diahayi le Latuyalaka la Mizipa, diayudiakema.

⁶Asi Isariyele wakalembe utema dikambu diʼanengewo, asi Bendjamina. Vo wakati vati: Wambunya diuhu dimotshi uma lʼatei wa Isariyele elo.

⁷Kayututsha na, diʼasi Bendjamina wutshikadi ndjala la wadi, ne dia shu takatshibi le Latuyalaka shati: Shu hatetawo vo ntshuka anʼasu?

⁸Ku vo wakambwana vati: Lʼatei a wauhu tshe wa Isariyele diuhu diakona diahayi le Latuyalaka la Mizipa? Enda, nduku otoi akayi lu lusanganya uma la Jabeshe ya la Ngiliyade.

⁹Lamʼakawali antu, vo kumena nduku untu otoi, usi Jabeshe ya la Ngiliyade.

¹⁰Ku ului wʼantu wakatumi apami wakaleki wulu nunu dikumi la pendi, wakawatela vati: Nyutshu, nyutudiaki asi Jabeshe ya la Ngiliyade la tombo, kame la wadiewo la anʼawo wa tshitshe.

¹¹Nyutshi okone. Kanyushili apami tshe la amantu wakeyana la apami ushiki.

¹²Lʼatei wʼasi Jabeshe ya la Ngiliyade, vo wakatani esekaseka wʼamantu kama nyei wahateyana la apami. Vo wakayi la wo uya la pangu la Shilo keli lu kete ya Kanana.

¹³Ku ului tshe wʼantu wakatumi akendji le asi Bendjamina, waki lu wuku wa dive dia Rimona dia ntuwatela aui wa mbasha ki.

¹⁴Etena keso asi Bendjamina wakakalula. Ku asi Isariyele wakawasha amantu wʼasi Jabeshe ya la Ngiliyade wakawatshiki la lumu. Keli amantu ako kunkuka la wo tshe.

¹⁵Asi Isariyele wakalembe etema dikambu dia Bendjamina, ne dia Latuyalaka akatshiki dihuli dia diuhu dimotshi hwe lʼatei a wauhu wa Isariyele.

¹⁶Ku dihangamendi diʼului wʼantu wakambwana vati: Kayututsha dia nkundjiya apami wutshikadi wadi lamʼakashili amantu wʼasi Bendjamina ushiki?

¹⁷Vo wakati vati: Dieli la asi Bendjamina wutshikadi dia ntana etenyi kawo kʼukito, ne dia diuhu dimotshi diatukushisho lʼatei wʼasi Isariyele.

¹⁸Keli shu hatetawo vo ntshuka anʼasu, ne dia shu asi Isariyele takatshiki dokoloko shati: Mananu kayali le untu layetawo usi Bendjamina ntshuka onʼandi.

¹⁹Vo wakati vati: Enda, dambu dia Latuyalaka diatuyalaka lu eleku lʼeleku la Shilo yeli lu leke la ngelʼa kushi la Betele, yeli lu leke lʼehutwelu ka unya lʼosese wʼuma la Betele utsha la Shekeme, ndu yeli lu leke la diku dia kushi la Lebona.

²⁰Vo wakatela asi Bendjamina vati: Nyutshu nyutuhulami lu dikambo dia vinyo.

²¹Kanyutendi, naka ana amantu wa la Shilo wambutumbi dia ndjono wenye, kanyutumbi uma lu dikambo. Untu lʼuntu kayandeli wadi uma lʼatei wa ana amantu wa Shilo, kakaluli lu kete ya Bendjamina.

²²Ku lamʼayuya washewo kana anengewo le su dia ndjama la su, shu tayuwatela shati: Nyakimwelewo, ne dia shu kumbakundjiya vo tshe untu lʼuntu wadi uma lu ta. Ndu nyu kumbetawo vo ntshuka anʼanyu. Okone nyu kema la unungu lu dikambu ne.

²³Asi Bendjamina wakatshi osoku. Vo wakayaosela wadi uku efula kawo uma lʼatei wʼamantu wakanokaka wenye. Vo wakatshu la wo, wakakalula utsha lu kete yawo, wakatuhika esumba, wakadjase loko.

²⁴Lʼetena keso, asi Isariyele wakamo uma leko. Vo tshe untu lʼuntu akatshu lu diuhu diandi la lu khumbu kandi, ndu lu etenyi kandi kʼukito.

²⁵Lu nshi sho, tawaki la khumʼekanga lu Isariyele. Untu lʼuntu akatshaka uku akandalangaka.[16]