Read tetala Embadi 4 Bible Online

Embadi 4 - tetala bible

Embadi 4

¹Lʼokongo wa nyoi ka Ehude, asi Isariyele wakatshi kolo lu ashu wa Latuyalaka ntu.

²Ku Latuyalaka akakimo lu anya wa Jabina, khumʼekanga ka Kanana, lakuledi la Hazora. Sisera, olombodi wʼalimbi andi, akadjashi la Harosheta-Ngoyima.

³Asi Isariyele wakaleli le Latuyalaka ne dia Jabina aki la pusupusu ya ta ya mbulu kama divwa. Ndi akasuyaka asi Isariyele wulu deku akumi ahendi.

⁴Debora, umvutshi a umuntu, wadi a Lapidote, aki umbadi wa Isariyele lu nshi yako.

⁵Ndi akadjaseka la tshina dia tuku dia Debora, diaki lʼasa Rama la Betele lu leke lʼakuna wa Efarayima. Ku asi Isariyele wakatshokaka le ndi dia ntusambulaka akambu awo.

⁶Ndi akatumi dikendji dia nteta Baraka, onʼa Abinoama, uma la Kedeshe-Nafetali. Ndi akayuwumbula ati: Undi, Latuyalaka, Unyashungu wa Isariyele, kunkudjangela ati: Uneli, utshu lʼUkungu a Tabora, utshu la apami nunu dikumi wʼasi Nafetali la wʼasi Zebuluna?

⁷Dimi layukusukanyia Sisera, olombodi wʼalimbi wa Jabina kame la alimbi andi la pusupusu ya ta uya lʼukidi wa Kishona. Ku dimi layuyukimo lu anya aye.

⁸Baraka akatela Debora ati: Naka we ayutsho la mi, ku dimi layutsho. Keli naka we hutsho la mi, dimi halutsho.

⁹Debora akûkaluya diui ati: Kawo, layutsho la ye. Keli lokendo lone hukukundjiya nemo, ne dia Latuyalaka ayukimo Sisera lu anya wa umuntu. Ku Debora akunela, akatshu la Baraka utsha la Kedeshe.

¹⁰Baraka akasanganya asi Zebuluna la asi Nafetali la Kedeshe. Ku apami nunu dikumi wakatshu la ndi, ndu Debora akatshu kame la ndi.

¹¹Hebere, usi Kene, lakayatula uma le asi Kene, ana wa Hobaba ukilu wa Mose, akatahikaka luudu landi la dipema pulu ndu lʼutamba wʼulungu wa la Zananima, weli lasuki la Kedeshe.

¹²Wakatutela Sisera vati: Baraka, onʼa Abimoama, ambelela utsha lʼukungu wa Tabora.

¹³Sisera akamotsha pusupusu yandi ya ta ya mbulu tshe kama divwa, la antu tshe waki lʼokongo andi uma la Harosheta-Ngoyima. Vo wakayi uya lʼukidi wa Kishona.

¹⁴Debora akatela Baraka ati: Uneli ne dia Latuyalaka ambukimo Sisera lu anya aye elo. Undi, Latuyalaka hatatshu la ntundu kaye uka? Okone Baraka akahulo uma lʼUkungu a Tabora la apami nunu dikumi.

¹⁵Latuyalaka akahenyahenya Sisera la alimbi andi, la pusupusu yandi ya ta tshe, akahandjula la yombo la ntundu ka Baraka. Sisera akakiti uma lu pusupusu kandi, akalawo lʼekulu.

¹⁶Baraka akayelana lʼalimbi andi la pusupusu ya ta pulu ndu la Harosheta-Ngoyima. Ku vo wakadiaki alimbi tshe wa Sisera la tombo, kuntshika nduku otoi.

¹⁷Sisera akalawo lʼekulu, akatoto lu luudu la dipema la Jaele, wadi a Hebere, usi Kene, ne dia Hebere usi Kene la khumbu kandi wakukanaka la Jabina, khumʼekanga ka Hazora.

¹⁸Ku Jaele akatumbi dia ntulungula Sisera, akawutela ati: Khumemi, yaka, uyoto lu luudu lami; tukaki woma. Ndi akoto lu luudu landi la dipema, ku Jaele akawushe lu ukelengu.

¹⁹Sisera akosengasenga ati: Umbisha tema tʼashi no; lambuvo pusa. Ku ndi akafula uteka wʼawele, akawusha dia ndi no. Ku ndi akawushe.

²⁰Sisera akawutela ati: Emali la suku dia luudu la dipema. Endaki, naka untu ambukumbula ati: Pami kemotshi keko lane? Kukaluya diui wati: Kema.

²¹Sisera akatshudungo lu djo ya wulu, ndu dimba diakakomo. Ku Jaele, wadi a Hebere, akose utamba a sodi wa luudu la dipema ndu uhumo. Ndi akasukana okoke utsha la ndi, akokokome utamba a sodi lu luhakatui, ku sodi kʼutamba kakatumbi, kakatukama ndu lu kete. Ku ndi akavu.

²²Lamʼakayayelaka Baraka Sisera, Jaele akatumbi dia ntuhumana la ndi. Ndi akawutela ati: Yaka ndjukenya pami kayayayangi. Ndi akoto lu luudu landi, atane ku Sisera one ukalemi udu la utamba a sodi wukami lu luhakatui.

²³Okone Unyashungu akalembia Jabina, khumʼekanga ka Kanana, lushi lako lu ashu wʼasi Isariyele.

²⁴Asi Isariyele wakatakolamelaka mpenyahenya Jabina, khumʼekanga kʼasi Kanana, edja ndu lamʼakawudiaki.