Read tetala Embadi 5 Bible Online

Embadi 5 - tetala bible

Embadi 5

¹Lushi lako Debora la Baraka, ona Abinoama, wakimbi usambu one vati:

²Elombodi wakalombola wudja wa Isariyele, Ku antu wakayakimo lʼongenongeno lu ta. Okone nyutumbuli Latuyalaka.

³Nyulungi, nyu khumi ya dikanga; nyuhuhe atui, nyu ewandji! Dimi layimbela, ee, layimbela Latuyalaka usambu, Dimi layimbela Latuyalaka, Unyashungu wa Isariyele, usambu wa diandu.

⁴Latuyalaka li! lamʼakayatumbi uma la Seire, Ndu lamʼakayayayakaka lʼusui wa Edome, Kete yakadidima, ulungu akakungo, Ndu angi wakatshula ashi.

⁵Ekungu wakadidima la ntundu ka Latuyalaka, Ndu ukungu uku wa Sinai la ntundu ka Latuyalaka, Unyashungu wa Isariyele.[7]

⁶Lu nshi ya Shamengare, ona Anata, Ndu lu nshi ya Jaele, esese wakasekama, Ambetshetshi waketaka paka lu tuwuka ta akutu akutu.

⁷Ewandji wa Isariyele kundjala la wulu; ee, vo kundjala la wulu Edja ndu lamʼakamunela, dimi Debora; Edja ndu lamʼakamunela uku nyangu Isariyele.

⁸Vo wakasonola ditemolatemola diʼeyuyu, Ku ta diakayala lu asuku a ngelu yawo; Undi, engawu kana dikonga akenamaka Lʼatei wa nunu akumi anei lu Isariyele uka?

⁹Utema ami weko le elombodi wa Isariyele, Waku wakayakimo lʼongenongeno dia ndo ta. Nyutumbuli Latuyalaka!

¹⁰Nyu wane watahemaka lu punda ya wema, Nyu wane watudjaseka lu atuhu wʼamena, Ndu nyu wane watokendakendaka lu mbuka, nyusanyaki dia dikambu ne!

¹¹Etali uma lu lundju lʼambuki wʼeta, lu ahuli watuwuduwulaka ashi, Mbatuwutaka dia etsha wʼololo wa Latuyalaka, Etsha wʼololo wʼelombwelo kandi lu Isariyele. Ku antu wa Latuyalaka wakahulo utsha lu asuku wʼesumba.

¹²Emo, emo Debora! Emo, emo, imbi usambu! Eto Baraka, onʼa Abinoama, otole fumbi yaye!

¹³Ku atshikadi wa ewandji ndu wa wudja wakahulo, Ndu Latuyalaka akasukana uya le mi, dia ndwelami la akanga a wulu.

¹⁴Asi Efarayima wakadjashi lʼAmaleka wakahulo, Wayakuyeli we Bendjamina, we la asikaye. Ewandji wakahulo uma la Makira, La elombodi uma la Zebuluna.

¹⁵Ewandji wa Isakara waki kame la Debora, La Isakara wakamamema Baraka, Wakatatuyelaka lu wanya utsha lʼukidi. Lʼatei a khumbu ya Rubena, Antu wakayatshumuya wulu!

¹⁶Ukundi akanyatshikala lʼatei a ekutu, Dia nungaka ndjawi yʼekoko? Lʼatei a khumbu ya Rubene, Antu wakayatshumuya wulu!

¹⁷Ngiliyade wakatshikala la wedi wa Jorodana, Dikambu kuna diakatshikala Dane lu mashua awo? Ashere wakadjase ki lʼumamu wʼashi, Wakumuya lu abungu awo.

¹⁸Keli Zebuluna eli wudja waketawo nsundja nyumu yawo, Ndu Nafetali pupu, Lu akuna wa lʼusui.

¹⁹Khumi ya dikanga wakayi dia ndjolo ta, Khumi ya dikanga ya Kanana wakayolo Lasuki la Tanaka, lʼumamu wʼashi wa Mengido; Keli vo kombosa diango dia dimbu dia fesa.

²⁰Toto ta lʼulungu takalosha, To takako uma lu ahuli ato, takayolosha Sisera.

²¹Okedi wa Kishona akakedya, Ee, okedi oso wʼedjedja, okedi wa Kishona. Utema ami uyali la dihunga!

²²Kindu ya falasa yawo yakukema Lamʼakayatafusulaka la luwangu.

²³Nyudji Meroze mananu, mbakati dikendji dia Latuyalaka, Nyudji, ee, nyudji antu a wo mananu ya wulu, Ne dia vo kundja la ndjukimanyia Latuyalaka, Dia nkimanyia Latuyalaka lʼatei wʼapami a wulu.

²⁴Jaele, wadi a Hebere, usi Kene Atshokwami lʼatei wʼamantu, Ndi atshokwami lʼatei wʼamantu watudjaseka lu mvudu yʼapema!

²⁵Sisera akolombe ashi, ku ndi akawusha awele, Ndi akawela awele wʼekama lu donga dia khumʼekanga.

²⁶Ndi akose utamba a sodi lu lunya, La uhumo lu lunya landi la pami, Ndi akahiki Sisera, akutundula ote, Ndi akutundula luhakatui pulu ndu la wedi.

²⁷Ndi akakolama, akako, aketama ki lu ekulu wa Jaele; Lu ekulu andi kakandakolami, kakandako; Lu dihuli diakandakolami, laawo kakandako udu.

²⁸Nyangu Sisera akendaka uma lu didishi, Ndi akaleli lʼedya ukalamandji ati: Okoko wana wahayi pusupusu kandi ka ta esadi? Ukundi ambutshimbatshimba pusupusu yandi ya ta?

²⁹Akanga a yimba lʼatei wʼekambi andi wʼamantu wakûkaluya diui, Ndu ndi ndame akeyi ekadimwelu ka umbula:

³⁰Vo hawutanyi diango dia dimbu, hawudikahanya uka? Usekaseka a umuntu, ee, esekaseka ehendi la usika pami tshe, Sisera hakundja dimbu diʼahondo wa dangi; Diʼahondo wa dangi wakadjama asangu ne dia kingu kami?

³¹Latuyalaka li! atunyi aye tshe walanyemi osoku! Keli wane watukukaka ngandji, wayali uku unya Lamʼatuwuwaleka wulu. Ku kete yakatshikala ki deku akumi anei.