Read tetala Embadi 8 Bible Online

Embadi 8 - tetala bible

Embadi 8

¹Ku asi Efarayima wakambula Ngidiyona vati: Na dikambu ne diambuyututshela? Ngandi akiye kunteta lamʼa-kayatshu dia ntolo la Midiyana? Ku vo wakadji la ndi lundju la wulu.

²Ku ndi akakaluya diui ati: Dikambu diutshemi mbedima la akambu watunyutshaka? Undi, dinela diʼelua diʼEfarayima hadiuleki dinela dia Abiyezere uka?

³Lu anya anyu kakakimo Unyashungu ewandji wa Midiyana, Oreba la Zebe, na dikambu diakamatshi laku diedimi la akambu watunyutshaka? Lamʼakandati osoku, kele kawo akakitakita le ndi.

⁴Ngidiyona akakumi la Jorodana, akateho ndi la antu kama shatu waki la ndi. Kuyanga mbakawakomo, vo wakatayelanaka la wo.

⁵Ndi akalombe asi Sukota ati: Nyusha wane wayayi la mi mbu ya nde. Vo wambokomo, keli dimi lakatayelana la Zeba, la Zalamuna, khumi ya dikanga ya la Midiyana.

⁶Ewandji wa Sukota wakawumbula vati: Zeba la Zalamuna wambuyala lu anya aye mbashasu alimbi aye ma?

⁷Ku Ngidiyona akakaluya diui ati: Kawo! Ku lamʼayukimo Latuyalaka Zeba la Zalamuna lu anya ami, dimi layatshatsha emunyi anyu la atende wa lʼusui wa shenga, ndu la ahangulakoi.

⁸Ndi akunela uma leko utsha la Penuele; akatutela ndu asi Penuele pupu. Ku vo wakûkaluya aui uku akûkaluya asi Sukota.

⁹Ku ndi akatela asi Penuele ati: Lamʼayumukalula la ki, dimi layuhandjula etangelu kene.

¹⁰Zeba la Zalamuna waki la Karakoro, vo la alimbi awo lasuki la nunu dikumi la tanu. Alimbi asu tshe weli wane wakatshikala uma lʼatei wʼalimbi tshe wʼuma lu leke lʼehutwelu. Apami nunu lukama la akumi ahendi waku wakasomola tombo, wakadiakema.

¹¹Ngidiyona aketi lu mbuka ka waku wudjashi lu mvudu yʼapema lu leke lʼehutwelu ka Noba la ka Jongebeha, akatolembia alimbi ako, ne dia vo kumbulungamela.

¹²Zeba la Zalamuna wakalawo; Ngidiyona akayeli. Ndi akandi Zeba la Zalamuna, khumi ya dikanga yako hyendi yʼasi Midiyana, akahandjula ului wʼalimbi tshe.

¹³Ngidiyona, onʼa Joasha, akakalula uma lu ta, uma lʼedelu ka Herese.

¹⁴Ndi akandi olongo a pami wʼusi Sukota, akawumbula. Ku olongo ako akufundela kumbu yʼewandji la dihangamendi diʼasi Sukota akumi esambeli la esambeli.

¹⁵Ndi akayi le asi Sukota. Ndi akawatelaati: Nyendi, aha Zeba la Zalamuna ane, wakanyansokaka nyati: Zeba la Zalamuna wambuyala lu anya aye, mbashasu antu aye wambokomo ma?

¹⁶Ndi akandi dihangamendi dia lʼusumba wa Sukota, akasuya lʼatende wʼuma lʼusui wa shenga, la ahangulakoi.

¹⁷Ndi akahandjula etangelu ka Penuele, akadiaki asi usumba ako.

¹⁸Ku Ngidiyona akambula Zeba la Zalamuna ati: Wuhu akona waki antu wakanyadiaki la Tabora? Ku vo wakûkaluya diui vati: Vo waki uku we, untu lʼuntu akafani la ona khumʼekanga.

¹⁹Ndi akawatela ati: Vo waki analingu wakuto la mi etoi utema. Uku eli Latuyalaka la lumu! dimi lambunyutela nti: Utunduyala nyu nyakatshiki la lumu, tshiki dimi haleyi nyudiaka.

²⁰Ku ndi akatela onʼandi enundu Jetere ati: Uneli, adiaki! Keli dikenda diako konsomola yombo yandi. Ndi akuki woma, ne dia ndi eki dikenda.

²¹Zeba la Zalamuna wakatela Ngidiyona vati: Uneli, utudiaki weme, ne dia uku eli pami mbeli ndu wulu andi. Ku Ngidiyona akunela; akadiaki Zeba la Zalamuna. Ndi akanya ehakito waki lu kingu ya kamelo yawo.

²²Asi Isariyele wakasengasenga Ngidiyona vati: Ututeli, we la onʼaye la ukana aye, ne dia we akatushimbela uma lu anya wʼasi Midiyana.

²³Ngidiyona akakaluya diui ati: Dimi hanyulela, ndu onʼami hunyelela pupu. Latuyalaka ndame kayunyulelaka.

²⁴Ngidiyona akawatela ati: Dimi nangaka nyolomba engo kemotshi: nyumbisha untu lʼuntu ashingu wakanyose dimbu. (Atunyi awo waki la ashingu wa paunyi efula, ne dia asi Ishamele mbakiwo.)

²⁵Vo wakûkaluya diui vati: Shu takayakimo lʼongenongeno. Vo wakali dihondo, ku untu lʼuntu akakitsha ashingu wakandose lu dimbu.

²⁶Ushinga wʼashingu wa paunyi wakandalombe, aki shekele kinunu la kama esambeli ya paunyi. Aso waki ladiku dia ahakito, tungunga tʼatui, la ahondo wa tilili wakalotaka khumi ya dikanga ya Midiyana ndu ladiku dia molola waki lu kingu ya kamelo yawo.

²⁷Ngidiyona akatshi etemolatemola lʼashingu ako, akakekitsha lʼusumba andi wa Ofara. Asi Isariyele tshe wakaseke Latuyalaka, wakakitemola. To kakayala djunga le Ngidiyona la wa lu luudu landi.

²⁸Okone asi Isariyele wakalembia asi Midiyana tshe. Nduku untu lakunyiya ote ntu. Ku kete yakatshikala ki deku akumi anei lu nshi ya Ngidiyona.

²⁹Jerubala, letawo vati: Ngidiyona, onʼa Joashi, akatudjase lu luudu landi.

³⁰Ndi akuti ana apami akumi esambeli, ne dia ndi aki la wadi efula.

³¹Ndu usika andi laki la Shekeme, akuti la ndi ona pami. Ndi akawole lukumbu ati: Abimeleke.

³²Ngidiyona, ona Joashi, akavu aya usumbi a lukusumbi. Wakukhunde lu diumbu dia Joashi, shi lu Ofara wʼasi Abiyezere.

³³Lamʼakavu Ngidiyona, asi Isariyele wakaseke Latuyalaka, wakatendela Wa-Bala, wakete Bala-Berite, etemolatemola kawo.

³⁴Asi Isariyele kumbuho Latuyalaka, Unyashungu awo, lakashimbela uma lu anya wʼatunyi awo wakadingi.

³⁵Vo kuntshela luudu la Jerubala, letawo vati: Ngidiyona, ololo, uku ololo wakandatshela Isariyele.