Read tetala Embadi 9 Bible Online

Embadi 9 - tetala bible

Embadi 9

¹Abimeleke, onʼa Jerubala, akatshu utsha le anangu nyangu, la Shekeme. Ku ndi akasengasenga, vo la khumbu ka shi nyangu ati:

²Nyumbuli asi Shekeme tshe nyati: Uleki ololo nyulela, ana apami tshe akumi esambeli wa Jerubala, kana untu otoi utu? Okone nyuho nyati: Dimi leli weka anyu la emunyi anyu.

³Ku anangu nyangu wakatatelaka asi Shekeme tshe aui aso. Ku etema awo wakekama le Abimeleke, ne dia vo wakati vati: Ndi eko onengesu.

⁴Vo wakawusha tenyi dia fesa akumi esambeli uma lʼetemwelo ka Bala-Berite. Ku Abimeleke akafuti akanga a dinginya la diyokayoka diakatuyelaka fesa yako.

⁵Ndi akatshu la Ofara, akatoto lu luudu la shi, akadiaki anangu wakuto la ndi shi otoi akumi esambeli ladiku dia dive diame. Keli Jotama, ona la kushi, lakuti Jerubala utu kakatshikala, ne dia ndi akashami.

⁶Ku asi Shekeme tshe wakamote kame la wa lu luudu la Milo; wakatudja Abimeleke khumʼekanga lasuki lʼutamba wʼulungu wakawuni la Shekeme.

⁷Antu wakatusanyia Jotama dikambu diako. Ku ndi akatshu, akatemala lʼUkungu a Ngarizime. Ndi akahangohango wilu ati: Nyu asi Shekeme, nyumbukeli, ku Unyashungu ayunyukela!

⁸Etamba wakatshu dia ntosonola khumʼekanga, dia mbaulela. Vo wakatela uweli vati: Utuleli.

⁹Ku uweli akakaluya diui ati: Undi, dimi tshiki iso kami katomongenyangenyaka Unyashungu la antu, dia dimi mpakakala ladiku diʼetamba?

¹⁰Ku etamba wakatela utamba a fingu vati: Yaka, uyutuleli.

¹¹Ku utamba a fingu akakaluya diui ati: Dimi tshiki pe kami la elua ami wʼololo, dia dimi ndjahakakala ladiku diʼetamba?

¹²Ku etamba wakatela okodi wa vinyo vati: Yaka, uyutuleli.

¹³Ku okodi wa vinyo akakaluya diui ati: Dimi tshiki ashi ami wʼelua watongenyangenyaka Unyashungu la antu, dia dimi ndjahakakala ladiku diʼetamba?

¹⁴Ku etamba tshe wakatela utamba wʼatende vati: Yaka, uyutuleli.

¹⁵Utamba wʼatende akakaluya etamba diui ati: Naka nyu nangaka mbidjami khumʼekanga kanyu, nyuyi, nyuyushami la tshina dia dedi diami. Naka aha osoku, dja yayutumba uma le utamba wʼatende, yayutshumba esasi wa la Lebanona.

¹⁶Undi, lu mete la etema wʼololo, mbakanyadji Abimeleke khumʼekanga uka? Nyu nyakatshela Jerubala la luudu landi ololo uku akanyahumbi mbutshela, ne dia akambu andi wʼololo?

¹⁷Mete, papa akanyolwela ta, akasundja lumu dia nyutshungula uma lʼanya wʼasi Midiyana.

¹⁸Ku elo kene, nyu nyambunela dia ndo la luudu la papa, nyambudiaka anʼandi wʼapami akumi esambeli ladiku dia dive otoi. Nyu nyambudja Abimeleke, onʼa ukambi andi a umuntu, khumʼekanga kanyu, nyu asi Shekeme, ne dia ndi eko onengenyu.

¹⁹Naka lu mete la etema wʼololo mbambunyutshela Jerubala la luudu landi elo, nyongenengene lu dikambu dia Abimeleke, ndu ndi angenengene lu dikambu dianyu.

²⁰Keli naka aha osoku, dja yatumbi uma le Abimeleke, yatshumbi asi Shekeme la wa lu luudu la Milo. Ndu dja yatumbi uma le asi Shekeme ndu uma le wa lu luudu la Milo, yatshumbi Abimeleke!

²¹Jotama akayaomola, akalawo. Ndi akatshu utsha la Bere, akatudjase leko, ne dia woma wa Abimeleke, onangu.

²²Abimeleke akulela Isariyele deku satu.

²³Ku Unyashungu akatumi odienge a kolo lʼasa Abimeleke la Shekeme. Asi Shekeme wakasondjasondja Abimeleke,

²⁴dia unungu wa dikila diʼanangu akumi esambeli, ana wa Jerubala, mbahema le Abimeleke lakadiaki, ndu le asi Shekeme waku wakukimanyia dia ndi ndjaka anangu.

²⁵Asi Shekeme wakakitsha antu lalu lu ekungu dia mbutungela enungu. Vo wakahotolaka wane tshe waketaka lu mbuka lasuki la wo diango. Ku antu wakayutela Abimeleke dikambu diako.

²⁶Ngala, onʼa Ebede, akatshu ndi la anangu utsha la Shekeme. Ku asi Shekeme wakawekama.

²⁷Vo wakatshu lu dikambo diawo dia vinyo, wakatumba elua, wakayuwamula. Ku vo wakayala la dambu. Wakoto lu luudu lʼetemolatemola kawo, wakali, wakano, wakadji Abimeleke mananu.

²⁸Ngala, onʼa Ebede, akawambula ati: Akona eli Abimeleke? Ndu kakona keli Shekeme dia shu nkambela Abimeleke ulimu? Aha onʼa Jerubala kendi? Zebulu kema olohe andi uka? Nyukambeli asi Hamora shi Shekeme, ulimu. Keli shu, dikambu kuna diukukisinkambela Abimeleke ulimu?

²⁹Yee! utunduyala ndjali umbuledi a wudja one, tshiki dimi lutunya Abimeleke! Ku ndi akati dia Abimeleke ati: Abimeleke ufudia alimbi aye, utumbi!

³⁰Lamʼakuki Zebulu, olohe wa lʼusumba, aui wa Ngala, onʼa Ebede, ndi akuki kele.

³¹Ndi akatumi akendji le Abimeleke la Arma ati: Enda, Ngala onʼa Ebede, la anangu wambuya la Shekeme; vo wambotombosha asi usumba dia vo ndo la ye.

³²Okone uneli lʼutshu, we la antu weli la ye, nyutuyali lalu lʼusui.

³³Kuneli la pindju lamʼayuhuto unya, kuyoto lʼusumba shashimuya. Ku lamʼayuya Ngala la wane weli la ndi dia ndjolo la ye, kutsheli uku ayuyala wulu aye.

³⁴Abimeleke la antu tshe waki la ndi wakunela lʼutshu, wakatuyala lalu lasuki la Shekeme, wakakahanyema lu elui enei.

³⁵Ngala, onʼa Ebede, akatumbi; akayemala lʼeotwelo ka suku diʼusumba. Ku Abimeleke la antu tshe waki la ndi wakunela uma lu dihuli diakawashami.

³⁶Ngala akatatela mena antu, ku ndi akatela Zebulu ati: Enda, antu wayahulo uma lʼete wʼekungu. Zebulu akûkaluya diui ati: Kema, aledi wʼekungu aku wakanaye wati: Antu.

³⁷Ngala akawutela ntu ati: Enda, mete antu aku wayahulo uma lʼete wʼekungu; la ului ukina wuyayi lu mbuka kʼutamba wʼulungu wa dunga.

³⁸Ku Zebulu akawumbula ati: Kakiane, lendʼeli unyo aye, we lakataka wati: Akona eli Abimeleke, dia shu mbukambela ulimu? Aha antu wakayonyolaka aku? Kakiane utumbi, olo la wo!

³⁹Ngala akayala olombodi wʼasi Shekeme, akalo la Abimeleke ta.

⁴⁰Abimeleke akayelana la ndi, ku Ngala akulawo. Antu efula wakavu edja ndu lʼeotwelo kʼusumba.

⁴¹Abimeleke akadjase la Aruma. Zebulu akatshanya Ngala la anangu. Vo kumbeya ntshikala la Shekeme.

⁴²La wedi a pindju, antu wakatumbi utsha lʼusui, ku Abimeleke akuki lukumu lako.

⁴³Ndi akakahanya alimbi andi lu elui esatu, ku vo wakayuyala lalu lʼusui. Lamʼakandenyi antu wayatumbi uma lʼusumba, ndi akalo la wo, akalembia.

⁴⁴Abimeleke la antu waki la ndi wakalawo utsha la ntundu, wakatemala lʼeotwelo kʼusumba. Ndu elui ehendi wʼalimbi wakakhunguso utsha le waku tshe waki lʼusui, wakalembia.

⁴⁵Abimeleke akalosha usumba yanyi tshe. Ndi akolembia, akadiaki antu waki loko. Ndi akediedia usumba, akawete elanyelu ketu.

⁴⁶Lamʼakuki antu waki lʼetangelu ka la Shekeme lukumu loso, vo wakoto lu lukumbu la wulu la luudu la Ele-Berite.

⁴⁷Wakatutela Abimeleke vati: Apami tshe watudjaseka lʼetangelu ka la Shekeme, wambomota kame leko.

⁴⁸Ku Abimeleke akunela, ndi la antu tshe waki la ndi; wakambela lʼukungu a Zalamuna. Abimeleke akose kenge, akahimbuia lutahi lʼutamba, akaledia, akalukitsha lu diheka. Ku ndi akatela antu tshe waki la ndi ati: Nyu nyakenyi okone akamatshi, nyusamanya dia ntsha uku utshemi.

⁴⁹Ku vo tshe untu lʼuntu akahimbuia lutahi lʼutamba, akayeli Abimeleke. Vo wakateke tahi yako lu lukumbu, wakalutshumbi kame la wane waki loko. Osoku mbakavu antu tshe waki lʼetangelu ka la Shekeme, ndu apami ndu amantu, lasuki lʼantu kinunu.

⁵⁰Ku Abimeleke akatshu la ntolosha asi Tebeze. Ndi akadingi usumba a Tebeze, akolembia.

⁵¹Keli etangelu ka wulu kaki lʼusumba ko. Asi usumba tshe wakalawo leko, ndu apami ndu amantu; wakayadihi lʼatei; wakambela ladiku diato.

⁵²Abimeleke akakumi lʼetangelu, akalosha. Ndi akasukana la suku diʼetangelu dia mbidja dja loko.

⁵³Ku umuntu omotshi akakosha dive diʼohelo lʼote wa Abimeleke, ku dio diakawuli lombo.

⁵⁴Ku ndi aketi olongo a pami lakatawembelaka dihumo diandi dia ta esadi ati: Osomole yombo yaye, undjaki, watukumvuta vati: Umuntu kudiaki. Olongo a pami akuhiki yombo, ku ndi akavu.

⁵⁵Lamʼakenyi asi Isariyele vati: Abimeleke ambuvo, vo wakatshu untu lʼuntu utsha lakandi.

⁵⁶Osoku mbakasomboya Unyashungu Abimeleke, ne dia kolo kakandatshela shi lamʼakandadiaki anangu akumi esambeli.

⁵⁷Unyashungu akasomboya ndu asi Shekeme kolo tshe yakawatshi. Osoku mbakashidiyama mananu yakawadji Jotama, onʼa Jerubala.