Read tetala 3 Joani 1 Bible Online

3 Joani 1 - tetala bible

3 Joani 1

¹Ekumanyi ambufundela ulangimi Ngayo[1] lalangami lu mete.

²Ulangimi ami, dimi lambukolombela dia we nduwana lu akambu tshe, ndu dia we ndjala la wulu lu dimba, uku wuluwanyi utema aye.

³Dimi lakangenangena utamanya, lamʼakayi anyasu, ndu lamʼakawayumvutela dia akambu wa mete wa lumu laye, uku akendakendaye lu mete.

⁴Dimi kema la ongenongeno ukina wuleki one, dia mbuka nti: Anʼami watokendakendaka lu mete.

⁵Ulangimi ami, we ambutsha ulimu wa kolamelu lamʼakimanyiaye anyasu, djekeleka ku dia angendangenda.

⁶Vo watutelaka antu dia ngandji kaye la ntundu ka ekelizia. We ayutsha ololo dia mbatuma lu lokendo lawo uku alanga Unyashungu.

⁷Ne dia vo wakadiangana dia Lukumbu, vo kunungula diango uma le asi wedja.

⁸Okone dieli la su dia mbalungula la ongenongeno, dia shu ndjala ekambi kame la wo lu akambu wa mete.

⁹Dimi lakafundela ekelizia akambu efula, keli Diyoterefe, latulangaka ndjala ladiku diawo, hetawo aui ami.

¹⁰Okone, naka dimi lambuya, layunyuhula akambu watundutshaka, ndu aui wa kolo watundoteketaka le mi. Ndi ndame hangenangena dia ntsha dikambu dia wuhu one. Ndi ntunaka dia nungula anyasu, ku ndi nshimbaka wane walanga mbalungula, ndu mbatundjaka uma lʼekelizia.

¹¹Ulangimi ami, tukuyaki kolo, keli ukuyaki ololo! One latutshaka ololo, eko la Unyashungu. One latutshaka kolo, atenyi Unyashungu.

¹²Antu tshe mvutaka dia Demeteriyo; akambu wa mete mbatuwutaka. Ndu dimi lambuta dikambu diandi. We mbeyaka wati: Aui ami mete kewo.

¹³Dimi laki la akambu efula wa nkufundela, keli halangi nkufundela lʼashi a mukanda la lukala.

¹⁴Dimi lambulungamela dia nkena esadi, dia shu mvutanela akambu lu elundji lʼelundji.

¹⁵Ki kayali la ye! Engenyi wakutumela moyo. Usha engenyi moyo, untu lʼuntu lʼatei awo.