Read tetala Enyelo 12 Bible Online

Enyelo 12 - tetala bible

Enyelo 12

¹Djimbitelu ya wuki yakenama lʼulungu. Umuntu akalote unya; ngondo kaki la tshina diʼekulu andi; dembo dia kusu diaki la toto dikumi la tuhendi diaki lʼote andi.

²Ndi aki la diemi. Ndi akawana, akatatela lono lʼeutelu.

³Ku djimbitelu kina yakenama lʼulungu, menyi ku ului a wuki wa tilili one, waki la ete esambeli la seki dikumi,[111] la alembo wa kusu esambeli lʼete awo.

⁴Wela awo akakutula etenyi ka satu ka toto ta lʼulungu, akatokosha la kete.[112] Ului ako akemala la ntundu ka umuntu lakayangi mbuta; akalungamela ati: Kandi onʼandi lamʼayunduwuta.

⁵Ku ndi akuti ona pami,[113] diaki la ndi dia mbulela wedja tshe lʼukalimba a luwulu.[114] Onʼandi akosama utsha le Unyashungu lu kiti kandi ka diulelu.

⁶Ku umuntu ako akalawo lʼusui, lene akalongosola Unyashungu dihuli, dia vo mbusha mbu ya nde nshi kinunu la kama hyendi la akumi asamalu.

⁷Ta diaki lʼulungu. Mikaele[115] la andjelo andi wakatshu dia ntolosha ului ako ta. Ului ako la andjelo andi wakalo ta.

⁸Keli vo kumbaleka wulu; vo kuntana dihuli ntu lʼulungu.

⁹Wakakadja ului ako a wuki wʼedjedja,[116] wetawo vati: Uhimbanyi, Satana, ukeshi a wa la kete tshe — wakawukadja la kete[117] ndi la andjelo andi.

¹⁰Ku dimi lakuki diui dia wulu lʼulungu diata ati: Kakiane panda kambuyala ndu wulu, ndu diulelu dia Unyashungu, ndu luwandji la Kristu kandi, ne dia osongwedi wa anyasu[118] ambukadjema, one latasongwelaka la ntundu ka Unyashungu ndu la yanyi ndu lʼutshu.

¹¹Vo wakuleki wulu ne dia dikila dia Ona-Okoko, ndu dia diui diawo. Vo kumbuka nyumu yawo ngandji edja ndu lu nyoi.

¹²Ulungu li, ongenengene, ndu wane watudjaseka loko. Fono kayuyala la kete ndu lʼashi a wuki, ne dia uhimbanyi akayi le nyu. Ndi eko la kele ka wuki; ndi mbeyaka ati: Etena kami kambusukana.

¹³Lamʼakenyi ului oso a wuki ati: Dimi lambukadjema utsha la kete, ku ndi akasuya umuntu lakuti ona pami ako.

¹⁴Wakasha umuntu ahafu ahendi wa pungu ka wuki dia ndi nfumbo utsha lʼusui, lene aki dihuli diandi, lene atundulungulaka mbu ya nde etena kemotshi, ndu tena dimotshi, ndu etenyi ka hendi kʼetena.[119]

¹⁵Ului a wuki akahongola ashi uku ndjali ka wuki lʼokongo a umuntu, dia ashi ako mbokeloya.

¹⁶Kete yakakimanyia umuntu; yo yakase unyo, yakamene ndjali ka wuki kakahongola ului a wuki uma lʼunyo awo.

¹⁷Ku ului akuki umuntu kele, akatshu dia ntolosha anʼandi wakatshikala ta, wane watukitanyiaka elembe wa Unyashungu, watulamaka diui dia Jesu.