Read tetala Enyelo 17 Bible Online

Enyelo 17 - tetala bible

Enyelo 17

¹Ondjelo omotshi uma lʼatei wʼandjelo esambeli waki la akoho akayi; akayumvutela ati: Uyi lindu keli ndjukenya elumbwelu ka umuntu kanga munanyi efula, ludjashi ladiku dia ashi efula.[151]

²Khumi ya dikanga ya la kete wakunana la ndi, ku wa la kete wakadjo la ndi wanu wa luseka.[152]

³Ndi akantole lu Nyuma lʼusui omotshi. Dimi lakenyi umuntu ahemi ladiku dia nyama ka tilili, kaki la ete esambeli la seki dikumi,[153] yuludi la kumbu ya ntenga Unyashungu.

⁴Umuntu oso akalote ahondo wa belaa la wa tilili, akalengama la diango dia paunyi la mboko yʼushinga a wulu la mboko yʼakeso. Ndi aki la dikoho dia paunyi[154] diuludi too la akambu wa ndjetete lu lunya landi, waki akambu wa mindu la wa luseka landi.

⁵Ndi aki la lukumbu lufundami lu usheshe lu fumu kandi, ati: “Babilona ka Wuki, Nyangu Amantu wa Luseka la Akambu wa Ndjetete wa la Kete.”

⁶Dimi lakenyi umuntu ako ambudjo dikila dia ekilami, ndu dia emenyi wa Jesu. Lamʼakamawenyi, dimi lakambi efula.

⁷Ku ondjelo akamumbula ati: Ambaye na? Dimi layukutela dikambu diushami dia umuntu one, ndu dia nyama katawembe lʼokongo, keli la ete esambeli la seki dikumi.

⁸Nyama kakayenyi kakiko, kemako. To kaya ka ntumba uma lu difuku diaha la ekumelu,[155] dia to ntsho lʼelanyelu. Wa la kete waha la kumbu yawo yufundami lu buku dia lumu[156] umaka etatelu ka kete, wayamba lamʼenawo nyama, uku akiko, la kemako, ndu kaya ka ndja.

⁹Tukanyi ta kanga yimba tone. Ete esambeli weli ekungu esambeli wudjashi umuntu loko.

¹⁰Ekungu ako weli khumi ya dikanga esambeli, atanu wambokokaka, ukina eko, ukina atayi. Lamʼayunduya, dieli la ndi dia ntshikala yema.

¹¹Nyama kako kakiko, kemako, keli uku khumʼekanga kʼenanei, keli uma lʼesambeli. To kayutsho lʼelanyelu.

¹²Seki dikumi yakayenyi, yeli khumi ya dikanga dikumi,[157] wahatalungula diulelu. Keli yo yatulungulaka diulelu uku khumi ya dikanga kame la nyama ushidi otoi.

¹³Vo weli la utema otoi, watukimoka wulu awo la diulelu diawo le nyama kako.

¹⁴Vo wayolosha Ona-Okoko ta, ku Ona-Okoko ayalembia, ne dia ndi keli Khumi ka wakhumi, uku Khumʼekanga ka khumi ya dikanga. Ku wane weli la ndi, wane waketama ndu wakosama, ndu weli la kolamelu, wayalembia.

¹⁵Ndi akamvutela ati: Ashi wakayenyi umuntu a luseka udjashi, weli uku wehu wʼantu, la elui wʼantu, la wedja, la eteketa.

¹⁶Seki dikumi yakayenyi, ndu nyama, yayuhetsha umuntu a luseka. Yo yayuhandjula, yayutshika utakataka, yayole umunyi andi, yayutshumba ushiki.

¹⁷Ne dia Unyashungu akotshiya dikambu ne lʼetema awo dia vo ntsha uku lulangu landi, la dia vo ndjala la utema otoi, la dia vo nkimwela nyama kako diulelu diawo, edja ndu lamʼayushidiyama aui wa Unyashungu.

¹⁸Umuntu lakayenyi, eli usumba a wuki ako, wuledi khumi ya dikanga ya la kete.