Read tetala Enyelo 18 Bible Online

Enyelo 18 - tetala bible

Enyelo 18

¹Lʼokongo wʼakambu aso, dimi lakenyi ondjelo ukina ayahulo uma lʼulungu aki la diulelu dia wuki. Ku kete yakahete la lutumbu landi.

²Ndi akahangohango la diui dia wulu ata ati: Babilona ka wuki kambunyuko, kambunyuko![158] To kambuyala edjaselu kʼedienge, la ka djimu tshe dia kolo, Ndu ka fudu tshe ya kolo, ndu yahetshawo,[159]

³Ne dia wedja tshe wakalana Ne dia wanu wa kele ka munanyi kandi.[160] Khumi ya dikanga tshe ya la kete wakunana la ndi. Ndu ambetshetshi wʼekanda wa la kete wakangone Uma lu wulu wa diango diandi efula.

⁴Dimi lakuki diui dikina uma lʼulungu, diata ati: Antu ami, nyutumbi uma lʼatei ato,[161] Nyutukuyoto lu kolo yato, Ndu nyutukulungula asui ato.

⁵Ne dia kolo yato yambukuma pulu ndu lʼulungu,[162] Ku Unyashungu akuho kolo yato.

⁶Nyukitsheli uku akatatshela akina,[163] Wuleki tena pendi, uku weli etsha ato. Lu dikoho diakatasohanya diango, Nyukisohanyia loko tena pendi.

⁷Uku akandayatumbula, ndu uku akandayaenya olo, Wawusha wuki wa asui la delu wuhu ako, Ne dia to kakati lʼutema ato ati: Dimi lambudjase uku wadi a khumʼekanga. Dimi kema wadi aki udu; Dimi halena utanda edja ndu pundju.

⁸Ne dia akambu aso, asui ato wayuya lushi otoi,[164] Nyoi la utanda la ndjala ka kasha. To kayutshumbama ushiki, Ne dia Khumadiondjo Unyashungu lakilumbuya eko la wulu.

⁹Khumi ya dikanga ya kete wakunanaka la to, la wakenyi olo la to, wayukilela, wayuda tukuku lamʼayuwena edinga wetshumbamelu kato.

¹⁰Vo wayemala tshalula ne dia woma a fono kato, wayuta vati: Hai! hai! usumba a wuki wa Babilona, usumba a wulu! elumbwelu kaye kambuya lʼushidi otoi![165]

¹¹Ambetshetshi wʼukanda wa la kete wambuyilela, wambuyikumbula, ne dia nduku untu ukina lasumba diango diato ntu;[166]

¹²diango dia paunyi ndu dia fesa, ndu mboko yʼushinga a wulu, ndu mboko yʼakeso ndu ahondo wa linene, ndu wʼengingi, ndu wa ngedingedi, ndu wa tilili, ndu etamba wa tuino, ndu diango tshe diʼewanga diakawasele, ndu diango diʼetamba diʼushinga a wulu diakawasele, ndu diango diʼehotela ndu dia mbulu, ndu dia ave wa awadi awadi;

¹³kalafulu, ndu diango dia binyi, ndu mura, ndu iso ka nshinula, ndu malashi, ndu wanu, ndu iso, ndu shima, ndu epunga, ndu ngombe, ndu ekoko; ndu falasa, ndu pusupusu ya ta, ndu fumbi, ndu nyumu yʼantu.[167]

¹⁴Diango diakayakumbula diambumo uma le ye; Diango diaye diʼamena tshe dia lukumu diambukushisho, Hadiutanema ntu pundju!

¹⁵Ambetshetshi wʼekanda wa diango so, wakangonyama le to, wayemala tshalula, ne dia woma wa asui ato wakilela ndu wakikumbula,[168]

¹⁶wata vati: Hai! hai! usumba a wuki Waki uku untu lolotshishawo ahondo wa linene, wʼengingi la wa tilili, Wolengami la diango dia paunyi La mboko yʼushinga a wulu la mboko yʼakeso!

¹⁷Ongonyi ako tshe akahadjwama lʼushidi otoi. Akanga a watu tshe ndu wane watokendakendaka lu watu ndu akanga a yenda, ndu ambetshetshi wʼukanda wa lʼashi a wuki, wakemala tshalula,[169]

¹⁸wakahangohango lamʼakawenyi etshumbamelu kato wata vati: Usumba akona wufanyi la usumba a wuki one?[170]

¹⁹Vo wakayatela ditshu lʼete awo, wakahangohango walela la wakumbula la tukuku, wata vati: Hai! hai! usumba a wuki Wambuyalaka akanga a mashua tshe wa lʼashi a wuki engonyi dia wuki awo! Wambuhandjula lʼushidi otoi.[171]

²⁰We, ulungu, ndu nyu ekilami, Ndu nyu atumami, ndu nyu amvutshi, Nyongenengene dia dikambu diawo![172] Ne dia Unyashungu ambulumbula lʼelumbwelu kanyu.

²¹Ondjelo omotshi a wulu akose dive diʼohelo dia wuki, akaditambiya lʼashi a wuki ata ati: Wayuhandjula Babilona, usumba a wuki,[173] Ku hawutana ntu.[174]

²²Hawuka diui dia apumi wa sese La dia amimbi wʼesambu la dia amvudi wa tuhungi Ndu dia amvudi wa pungi lʼatei aye ntu;[175] Hawutana asedi a diango lʼatei aye ntu; Hawuka lundju la dive diʼohelo lʼatei aye ntu;

²³Ndu tala hadiuyoheta lʼatei aye ntu; Hawuyuka diui dia utshuki a wadi Kuyanga dia umuntu lutshukami lʼatei aye ntu,[176] Ne dia ambetshetshi wʼukanda waki antu a waki wa la kete, Ne dia wedja tshe wakakesama lʼekanga aye.

²⁴Wakatani dikila diʼamvutshi la dia ekilami, La dia tshe wakadiakema la kete lʼatei awo.[177]