Read tetala Enyelo 2 Bible Online

Enyelo 2 - tetala bible

Enyelo 2

¹Ufundeli ondjelo wʼekelizia ka lʼEfeso wati: Aui wa one latukimelaka toto esambeli lu lunya landi la pami, latokendakendaka lʼatei a dikitshelu dia paunyi esambeli diʼatala ane.

²Dimi mbeyaka etsha aye, ndu ulimu aye, ndu etetemalu kaye. Dimi mbeyaka nti: We hetawo akanga wa kolo, we akahimbi wane watuyaetaka vati: Atumami mbesu, ku vo kema atumami, we akawaenyi la lukesu.

³We aki la etetemalu, akasuwi ne dia lukumbu lami, we kumpeko.

⁴Keli dimi la ye dikambu! ne dia we akakimo ngandji kaye ka ntundu.

⁵Okone uho lene akayako, ukadimuli utema, utshi uku etsha aye wa ntundu. Naka aha osoku, dimi layuya le ye esadi, layunya ekitshelu kaye ka tala uma lu dihuli diato, naka we hakadimula utema.

⁶Keli we eko la dikambu ne, we atuhetshaka ditshelu diʼasi Nikolao, ndu dimi katudihetshaka.

⁷One leli la tui, uki aui watela Nyuma ekelizia. One laleka akambu wa kolo wulu, dimi layuwusha dia ndi nde uma lʼutamba a lumu[17] weli lʼatei a Paradisu ka Unyashungu.[18]

⁸Ufundeli ondjelo wʼekelizia wa la Smurina wati: One laki uma lʼetatelu edja ndu lʼekumelu,[19] lakavu, keli akayala la lumu ntu, kata akambu ane ati:

⁹Dimi mbeyaka asui aye, ndu wula aye (keli we eko kanga ongonyi), ndu tengo ya wane wata vati: Asi Juda mbesu, keli vo kema asi Juda, weli uku etemwelo ka Satana.

¹⁰Tukaki akambu wayangaye nsuwa woma. Ulungi, uhimbanyi uyanga mbidja amotshi anyu lu lukanu dia nyuhimba, keli nyu nyayusuwa nshi dikumi. Utetemali edja ndu lu nyoi, ku dimi layukusha dembo dia kusu dia lumu.

¹¹One leli la tui, uki akambu watela Nyuma ekelizia. One laleka akambu wa kolo wulu, hasuyama lu nyoi ka hendi.[20]

¹²Ufundeli ondjelo wʼekelizia ka la Perengamo wati: One leli la yombo ya diesa wedi ehendi kata akambu ane:

¹³Dimi mbeyaka dihuli diudjashiye, lene eli kiti ka diulelu ka Satana. We ambumamema lukumbu lami wulu, kumanguna mbetawo kami ndu lu nshi yaki Atipa omenyi ami, kanga kolamelu, lakadiakema lʼatei anyu, lene udjashi Satana.

¹⁴Keli dimi la ye akambu amotshi, ne dia we la amotshi leko watetawoka wetshelu wa Balama, wakandetsha Balaka dia nkitsha utamba a ntakanya la ntundu ka Isariyele[21] dia vo nde diango diakawadiakela dikishi, la dia vo munana.[22]

¹⁵Ndu we eko pupu la amotshi watetawoka wetshelu wʼasi Nikolao.

¹⁶Okone ukadimuli utema. Naka aha osoku, dimi layuya le ye esadi, layolo la wo ta la yombo yʼuma lʼunyo ami.

¹⁷One leli la tui, uki okone atela Nyuma ekelizia. Dimi layusha one laleka akambu wa kolo wulu mana[23] yakashama; layuwusha ndu dive dia wema, dieli la lukumbu lʼuyuyu[24] lufundami loko. Nduku untu layeya, tshikima lulungudi.

¹⁸Ufundeli ondjelo wʼekelizia ka la Tuyatira wati: Onʼa Unyashungu, leli la ashu uku lumbi la dja, la ekulu uku ohotela wakalongoswama, kata akambu ane.

¹⁹Dimi mbeyaka etsha aye, la ngandji kaye, la mbetawo kaye, la ekambelu kaye, la etetemalu kaye. Ndu dimi mbeyaka nti: Etsha aye wa lʼokongo wambuleka wa la ntundu waki.

²⁰Keli dimi la ye dikambu, ne dia we ambetawo umuntu uku Jezebele,[25] latuyataka ati: Umvutshi a umuntu mbemi. Ndi atetshaka, atunganyiaka ekambi ami dia vo munana, ndu dia vo nde diango diadiakelawo dikishi.

²¹Dimi lakawusha etena ka ndi nkadimula utema, ku ndi hetawo nkadimula utema uma lu munanyi.

²²Nyulungi, dimi lutsha mbukitsha lu tangi, ndi la wane watunanaka la ndi, lu fono ka wulu, tshikima vo wambukadimula etema uma lu etsha andi.

²³Dimi layudiaka anʼandi. Ekelizia tshe kaweyi vati: Dimʼako katushishimaka ashu wʼekongo ndu etema,[26] ku layunyufuta untu lʼuntu uku etsha anyu.[27]

²⁴Keli dimi lambunyutela, nyu wane weli la Tuyatira, wahatayala la wetshelu one, ndu wahateyi akambu a waki wa Satana, uku watawo. Dimi halanyahatanyia wutshu ukina.

²⁵Keli kanyukimeli akambu anyu wulu edja ndu lamʼayumuya.

²⁶One laleka akambu wa kolo wulu, ndu lalama etsha ami edja ndu lʼekumelu, dimi layuwusha wulu wa mbulela wedja.

²⁷Ndi ayuwaulela la ukalimba a luwulu, uku atuwulaka puki ya diwumba vwa,[28] uku akamalungula wulu uma le Papa.

²⁸Ku dimi layuwusha sunga yoto.

²⁹One leli la tui, uki okone atela Nyuma ekelizia.