Read tetala Enyelo 5 Bible Online

Enyelo 5 - tetala bible

Enyelo 5

¹Dimi lakenyi buku diufundami lʼatei ndu uma lʼokongo,[47] diukelekami wulu la tulimbitelu esambeli lu lunya la pami la one lakadjashi lu kiti ka diulelu.

²Dimi lakenyi ondjelo a wulu ahangohango la diui dia wulu ati: Untu akona ukuki mbifula wombo a buku one, la ndjihula tulimbitelu teli loko?

³Nduku untu lʼulungu, kuyanga la kete, kuyanga la tshina dia kete, lakeyi mbifula wombo a buku oso, kuyanga menda loko.

⁴Ku dimi lakaleli efula, ne dia nduku untu lakatanema lukuki mbifula wombo a buku ako, kuyanga menda loko.

⁵Ku ekumanyi kemotshi akamvutela ati: Tulelaki. Enda, Tambwe ka lu wudja wa Juda,[48] khumbu kʼuma le Davidi,[49] lakaleki akambu wa kolo wulu, ambukuka dia mbifula wombo a buku uku la dia ndjihula tulimbitelu tawo esambeli.

⁶Lʼatei a kiti ka diulelu, ndu wa nyama nyei, ndu wa dikumanyi, dimi lakenyi Ona-Okoko emadi uku akandadiakema.[50] Ndi aki la seki esambeli la ashu esambeli,[51] weli nyuma esambeli ya Unyashungu, yakandatumi lu kete tshe.

⁷Ku ndi akayi, akose wombo a buku uma lu lunya la pami la one lakadjashi lu kiti ka diulelu.

⁸Lamʼakandose wombo a buku, nyama sho nyei la dikumanyi akumi ahendi la nei wakakhusamela Ona-Okoko. Untu lʼuntu aki la losese, ndu alonga wa paunyi wakaludiami la malashi, weli dombelo diʼekilami.[52]

⁹Ku vo wakimbi usambu wʼuyuyu,[53] wata vati: We kukuki dia nungula wombo a buku one, Ndu dia ndjihula tulimbitelu tawo, Ne dia we akadiakema, Akasumbela Unyashungu antu la dikila diaye: Wʼuma lu wauhu tshe ndu wʼeteketa tshe, Ndu wʼuma lu wehu tshe, la waulelu tshe.

¹⁰We kawaete uku diulelu la elombedi le Unyashungu asu;[54] Vo wayulelaka la kete.

¹¹Ku dimi lakendi, lakuki aui wʼandjelo efula wudingi kiti ka diulelu ndu dikumanyi. Efula kawo kaki nunu akumi wa nunu akumi, ndu nunu dia nunu,[55]

¹²wahangohango vati: Ona-Okoko lakadiakema kukuki dia nungula wulu, ndu ongonyi, ndu yimba, ndu diulelu, ndu kenemo, ndu lutumbu, ndu otshoko.

¹³Dimi lakuki diango tshe diakatungama ndu lʼulungu ndu la kete, ndu la tshina dia kete, ndu lʼashi a wuki ndu diango tshe dieli loko, wata vati: Otshoko, la kenemo, la lutumbu, la diulelu, wayali le one ludjashi lu kiti ka diulelu, ndu le Ona-Okoko pundju pundju!

¹⁴Ku nyama yako nyei yakati vati: Ayali osoku! Ku dikumanyi wakakhusama, wakotemola.