Read tetala Enyelo 7 Bible Online

Enyelo 7 - tetala bible

Enyelo 7

¹Lʼokongo wʼakambu aso, dimi lakenyi andjelo anei wemadi lu atshuku anei wa kete, wukimedi pepe nyei[68] ya la kete, ne dia lopepe talopepaki la kete, kuyanga lʼashi a wuki, kana ladiku diʼetamba.

²Dimi lakenyi ondjelo ukina atambela utsha lʼulungu uma lene atutumbaka unya, ukimedi djimbitelu ya Unyashungu a lumu. Ndi akawelela andjelo ako anei, wane wakawasha wulu wa nanya kete ndu ashi a wuki,

³ata ati: Tanyutshelaki kete kolo, kuyanga ashi a wuki, kuyanga etamba, edja ndu lamʼayutudja ekambi a Unyashungu asu tulimbitelu lu fumu yawo.[69]

⁴Dimi lakuki okone aki efula ka wane wakadjama tulimbitelu. Wane wakadjama tulimbitelu waki nunu lukama la akumi anei la nei uma lu wauhu tshe wʼasi Isariyele:

⁵Uma lu diuhu dia Juda, wakadji antu nunu dikumi la pendi tulimbitelu; uma lu diuhu dia Rubena, nunu dikumi la pendi; uma lu diuhu dia Ngada, nunu dikumi la pendi;

⁶uma lu diuhu dia Ashere, nunu dikumi la pendi; uma lu diuhu dia Nafetali, nunu dikumi la pendi; uma lu diuhu dia Manase, nunu dikumi la pendi;

⁷uma lu diuhu dia Simeyona, nunu dikumi la pendi; uma lu diuhu dia Lewi, nunu dikumi la pendi; uma lu diuhu dia Isakara, nunu dikumi la pendi;

⁸uma lu diuhu dia Zebuluna, nunu dikumi la pendi; uma lu diuhu dia Josefu, nunu dikumi la pendi; uma lu diuhu dia Bendjamina, nunu dikumi la pendi, wakadjama tulimbitelu.

⁹Lʼokongo wʼakambu aso, dimi lakendi, lakenyi ului a wuki wʼantu waheyama mbala, uma lu wedja tshe, ndu uma lu wauhu tshe ndu uma lu weuhu wʼantu tshe, ndu wʼeteketa tshe, wemadi la ntundu ka kiti ka diulelu ka Ona-Okoko, wolotshi ahondo a wema, la wanga wʼatuku lʼanya awo.

¹⁰Ku vo wakahangohango la diui dia wulu vati: Panda keko ka Unyashungu asu, latudjaseka lu kiti ka diulelu, ndu ka Ona-Okoko!

¹¹Ndu andjelo tshe wakemadi, wudingi kiti ka diulelu ndu dikumanyi la nyama sho nyei. Vo wakakhusama la ntundu ka kiti ka diulelu watemola Unyashungu,

¹²wata vati: Ayali osoku! Otshoko, la lutumbu, la yimba, la lusaka, la kenemo la wulu, la diulelu, wayali le Unyashungu asu pundju pundju! Ayali osoku!

¹³Ekumanyi kemotshi akankaluya diui ati: Wane wolotshi ahondo a wema, wa na wewo? uma lendi uyewo?

¹⁴Dimi lakawutela nti: Khumadiondjo, weme keya. Ndi akamvutela ati: Vo weli wane wambuya uma lu pa ka wuki,[70] wakotsha ahondo awo, wakawaedia la dikila dia Ona-Okoko.

¹⁵Diako mbemadiwo la ntundu Ka kiti ka diulelu ka Unyashungu. Vo watukambelaka ulimu ndu la yanyi Ndu lʼutshu lu etemwelo kandi. One ludjashi lu kiti ka diulelu, Ayuwakumba la eyalelu kandi.

¹⁶Vo hawuka ndjala ntu, hawuka pusa ntu; Yanyi ya wulu hayahetela, Kuyanga edungu ka wulu.[71]

¹⁷Ne dia Ona-Okoko leli lu kiti ka diulelu, Ayuyala ulami awo,[72] Ayalombola utsha la teko diʼashi a lumu.[73] Unyashungu ayakitula asoi tshe uma lu ashu awo.[74]