Read tetala Enyelo 9 Bible Online

Enyelo 9 - tetala bible

Enyelo 9

¹Ondjelo a tanu akadi, ku dimi lakenyi yoto yʼuma lʼulungu yayako la kete. Wakawusha sapi ka difuku diaha la ekumelu.

²Ndi akadihula lukuki la difuku so diaha la ekumelu, ku edinga wakatumbi uma lu difuku uku edinga wʼuma lu khuka ka wuki.[83] Unya la loheledi wakafulema la edinga wʼuma lu difuku diako.

³Endjo wakatumbi uma lʼedinga ako;[84] wakawasha wulu uku wa kutu ya la kete.

⁴Wakawatela vati: Tanyulanyaki adiyu wa la kete, kuyanga engo kʼuyuyu, kuyanga utamba, paka antu waha la djimbitelu ya Unyashungu lu fumu yawo.[85]

⁵Vo kunungula wulu wa mbadiaka, paka wa mbasuya ngondo tshanu. Sui diawo diaki uku sui dia kutu lamʼalumatato untu.

⁶Lu nshi sho, antu wayuyanga nyoi, keli vo hawukitana; wayuyanga mvo, ku nyoi ayalawo.[86]

⁷Etundu wʼendjo waki uku falasa yambolongoswama dia ndo ta.[87] Lu ete awo kaki alembo wa kusu uku paunyi; dundji diawo diaki uku dundji dia antu.

⁸Vo waki la divu uku dia amantu; anyu awo waki uku wa tambwe.[88]

⁹Waki la eloto wa ta lu tulu uku eloto wa mbulu. Luhelu lʼahafu awo laki uku luhelu la pusupusu ya ta,[89] ndu la falasa efula lamʼatawatshu utsha lu ta.

¹⁰Vo waki la wela uku wanga wa kutu; waki la wulu lu wela awo dia nsuya antu ngondo tshanu.

¹¹Ondjelo a difuku diaha la ekumelu kaki khumʼekanga kawo. Lukumbu landi lʼoteketa wʼasi Heberu leli Abadona, keli lʼoteketa wʼasi Ngirika leli Apoliyona (kitshimudi ati: Unanyishi).

¹²Fono ka ntundu kambeta. Enda, fono kina hyendi yayayi lʼokongo.

¹³Ondjelo a samalu akadi, ku dimi lakuki diui diʼuma lu seki nyei yʼediakelu ka paunyi[90] keli la ntundu ka Unyashungu,

¹⁴diatela ondjelo a samalu laki la pungi ati: Ukelekuli andjelo ane wukelekami lʼumamu a ndjali ka wuki ka Eyufarate.

¹⁵Okone andjelo ako anei wakakelekwama, wakalongoswama dia ushidi uku la lushi luku, la ngondo keku, la eleku keku, dia ndjaka etenyi ka satu kʼantu.

¹⁶Elui wʼalimbi wakahemi ladiku dia falasa waki nunu akumi ahendi tena nunu dikumi. Dimi lakuki uku aki efula kawo.

¹⁷Lʼenelo kakamenyi falasa la wane wakayahemi, vo waki la eloto lu tulu uku dja, la uku ave wʼedima ndu uku mboko ya dja. Ete wa falasa waki uku ete wa tambwe; dja la edinga wa tsho wakatumbi uma lʼenyo awo.

¹⁸Etenyi ka satu kʼantu kakadiakema la asui asatu ane: dja, edinga, la mboko ya dja wakatumbaka uma lʼenyo awo.

¹⁹Ne dia wulu wa falasa sho eko lu enyo ayo ndu lu wela ayo. Wela ayo waki uku elui, ndu waki la ete; la wo mbakawasuyaka antu.

²⁰Antu akina waki kundjakema la asui aso asatu, kunkadimula etema uma lʼelimu wʼanya awo. Vo kunkimo ntemola edienge, ndu dikishi dia paunyi, ndu dia fesa, ndu diʼehotela, ndu dia ave, ndu diʼetamba, wane waheyi mena kuyanga mbuka, kuyanga nkendakenda.[91]

²¹Vo kunkadimula etema uma lu diakanelu diawo kuyanga uma lʼekanga awo, kuyanga uma lu munanyi la evi awo.