Read tetala Ruta 1 Bible Online

Ruta 1 - tetala bible

Ruta 1

¹Lu nshi ya embadi, ndjala ka kasha kakavala lu kete. Ku pami kemotshi, usi Betelehema ka la Juda, akatshu ndi la wadendi la anʼandi ahendi wʼapami dia ntudjase lu kete ya Moaba.

²Lukumbu la pami kako laki Elimeleke. Lukumbu la wadendi laki Naomi. Kumbu ya anʼandi ahendi wʼapami yaki Malona la Kiliyona. Vo waki asi Efarate, uma la Betelehema ka la Juda. Vo wakakumi lu kete ya Moaba, wakatudjase leko.

³Elimeleke, umi a Naomi, akavu. Ku Naomi akatshikala ndi la anʼandi ahendi wʼapami atu.

⁴Anʼandi wakatshuki amantu wʼasi Moaba. Lukumbu la omotshi laki Oropa, la lukumbu la ukina laki Ruta. Vo wakadjase leko lasuki la deku dikumi.

⁵Ku lʼokongo diku, ndu Malona la Kiliyona wakavu vo ahendi. Okone Naomi akashisha umendi la anʼandi ahendi wʼapami.

⁶Ku ndi akunela ndi la alokai andi, dia mumo uma lu kete ya Moaba. Ndi akuki lukumu ati: Latuyalaka ambotshokola wudja andi, ambuwasha mbu ya nde.

⁷Ndi akunela uma lu dihuli diakandadjashi ndi la alokai andi ahendi. Vo wakakimela mbuka dia nkalula utsha lu kete ya Juda.

⁸Ku Naomi akatela alokai andi ako ahendi ati: Nyuyeti nyukaluli untu lʼuntu utsha lu luudu la nyangu. Latuyalaka kanyutsheli ololo uku akanyatshelaka wane wakavu, ndu uku akanyantshelaka dime.

⁹Latuyalaka kanyutanya ki untu lʼuntu lu luudu lʼumi layu-tshukana la ndi. Ndi akashana la wo moyo. Ku vo wakatundo lʼalelu, wakaleli.

¹⁰Vo wakûkaluya diui vati: Kema, shu tayutsho la ye utsha lakanyu.

¹¹Ku Naomi akawatela ati: Anʼami, nyukaluli! Dikambu kuna dialanganyu ntsho la mi? Undi, ana apami amotshi mbeki la mi lʼutema, dia vo ndjala waumi anyu?

¹²Anʼami, nyeso nyukaluli. Dimi laya usumbi, handjukuka ntshukama ntu. Ndu naka layuta nti: Dimi la elungamelu. Naka layutshukama utshu one, kuyanga layuta ana apami,

¹³undi, nyu nyayakungela, aha ntshukama lʼakina, edja ndu vo wambula? Kema, anʼami, uma lu dikambu dianyu, mbemi la lunyangu la wulu, ne dia Latuyalaka akasimbula lunya landi dia ndo la mi.

¹⁴Vo wakatundo lʼalelu, wakaleli ntu. Ku Oropa akalakana la ukilu andi, keli Ruta akumamema.

¹⁵Ku Naomi akatela Ruta ati: We henyi, wadideye ambukalula utsha lakawo, utsha le etemolatemola kawo. Ukaluli ndu we, uku ambukalula wadideye.

¹⁶Ruta akakaluya diui ati: Tuntshutshiyaki dia dimi nkutshika kuyanga mamitwana la ye. Lene ayuyutsho, kayumutsho ndu dimi. Lane ayuyutudjase, kayumutudjase ndu dimi. Wudja aye, wayuyala wudja ami, ndu Unyashungu aye, ayuyala Unyashungu ami.

¹⁷Lene ayuyutuvo, kayumutuvo ndu dimi, ndu leko kayuwunkhunde. Latuyalaka kandjaki, naka dikambu dikina diaha nyoi diayutanganya.

¹⁸Lamʼakenyi Naomi ati: Ndi ambukeketsha utema dia ntsho la ndi, ndi akatshiki dikambu.

¹⁹Vo ahendi wakakimela mbuka, wakatukuma la Betelehema. Lamʼakawakumi, la Betelehema, asi usumba tshe wakasakanela; wakambwana vati: Aha Naomi uku?

²⁰Ku Naomi akakaluya diui ati: Tanyumbetaki ntu nyati: Naomi (kitshimudi ati: Mpe) keli nyumbetaki nyati: Mara (kitshimudi ati: Ululu), ne dia Kanga-Wulu-Tshe akandudia too la ululu.

²¹Laki la efula lamʼakamatshu, keli Latuyalaka ambunkaluya anya atu. Ukundi ambetanyu nyati: Naomi, lamʼenanyu nvati: Latuyalaka akalo la mi, Kanga-Wulu-Tshe akansuya?

²²Osoku mbakakalula Naomi uma lu kete ya Moaba ndi la Ruta, olokai andi, usi Moaba. Vo wakakumi la Betelehema lʼetatelu ka dinela diʼepunga.