Read tetala Ruta 2 Bible Online

Ruta 2 - tetala bible

Ruta 2

¹Naomi aki la untu omotshi la lukumu ndu kanga ongonyi, lakuto lu khumbu ka umendi Elimeleke. Lukumbu landi Boaza.

²Ruta, usi Moaba, akasengasenga Naomi ati: Unkimo ntshu, ntatongonaka washa[1] lu ekambo ka untu layetawo dimi ntongona. Ku ndi akûkaluya diui ati: Kawo, onʼami, tshoka.

³Ndi akatshu, akatotongona washa wakatakoshaka amunyi. Uku diese, ku ndi akatukuma lu ekambo ka Boaza, laki lu khumbu ka Elimeleke.

⁴Etena kako, Boaza akayi uma la Betelehema, akemula amunyi ati: Latuyalaka ayali la nyu! Ku vo waketawo vati: Latuyalaka ako-tshokole!

⁵Ku Boaza akambula kapita kandi kʼamunyi ati: Kanga usekaseka a umuntu uku na?

⁶Ku kapita kʼamunyi akûkaluya diui ati: Usekaseka a umuntu wʼusi Moaba mbendi, lakayi la Naomi uma lu kete ya Moaba.

⁷Ndi akasengisengi ati: Lambukolomba wulu wa dimi ntatongonaka washa watako uma lu dikanda lʼokongo wʼamunyi. Ku umaka pindju kakandayi, paka wemema etu edja ndu kakiane, ndi atumuya kuyanga yema ya tshitshe.

⁸Ku Boaza akatela Ruta ati: Onʼami, uhukami, tutshokaki lʼekambo kekina dia ntotongona washa. Tumoki uma lane. Utshikali kame la ekambi ami wʼamantu.

⁹Utendaka lene atawani lu ekambo, utatshokaka lʼokongo awo. Dimi lakadjedi ekambi ami wʼapami olembe nti: Tanyohenyahenyaki. Ku lamʼayuyuka pusa ashi, kutono ashi lʼehundi wakaduwudi ekambi ami wʼapami.

¹⁰Ku Ruta akako ekhukhumadi, akukhusamela, akawutela ati: Ngandi amumuhumo lukulu lʼolo lu ashu aye, dia we nkanelami dimi ongendangenda?

¹¹Ku Boaza akûkaluya diui ati: Wakamvutedi akambu tshe watuyu-tshelaka ukilu aye umaka nyoi kʼumeye, ndu uku akayatshiki sho la nyo la kete yakayuto, dia ndja lu wudja wahayateyaka.

¹²Latuyalaka akutsheli uku akayatshi. Latuyalaka, Unyashungu wa Isariyele, kanga ahafu wuyeye dia ndjushama, akafuti difutu diaye tshe!

¹³Ku ndi akûkaluya diui ati: Khumemi li, we ambuntshela ololo efula, ne dia we ambusamba utema ami. We ambumvutela aui wʼololo, dimi ukambi aye a umuntu, kuyanga dimi kema otoi omotshi lʼatei wʼekambi aye wʼamantu.

¹⁴Lʼetena ka nde ma, Boaza akatela Ruta ati: Yaka, yuli ma. Umbia ukama aye lʼushi. Ndi akadjase kame lʼamunyi. Vo wakawusha ahoho wa lufumba. Ndi akali, akaluti, akete dimotshi wumbu.

¹⁵Lʼokongo diku, ndi akunela dia ntatongona washa. Ku Boaza akadjangela ekambi andi wʼapami ati: Nyuwete, atatongonaka washa kuyanga lʼatei a dikanda. Tanyuwushaki hyasu.

¹⁶Ntu, nyudianganya washa amotshi uma lu dikanda, nyutshikeliwo dia ndi mbatongona, tanyuhangwelaki.

¹⁷Ndi akatatongonaka washa edja ndu dikolo. Ku ndi akasusula wane wakandatatongonaka, waki lasuki la efa otoi kʼepunga.

¹⁸Ndi akakiembe, akakalula lʼusumba. Ndi akatenya ukilu andi epunga wakandatatongonaka; akawusha etenyi ka wumbu kakandatshiki.

¹⁹Ku ukilu andi akawumbula ati: Lendi akayatukamba, akayatotongona washa elo? One lakaketawi, atshokwami! Ku Ruta akalimbitshiya ukilu andi laka untu lakandatukamba ati: Untu lakamatukamba lakandi elo, lukumbu landi Boaza.

²⁰Naomi akatela olokai andi ati: Untu one latutshelaka wasena ndu wakavu ololo atshokwami le latuyalaka! Untu one mbutoka la su. Ndu ndi keli lʼului a waku wukuki nkitana la ye.[2]

²¹Ruta, usi Moaba, akûkaluya diui ati: Ndi akamvutedi ntu ati: Utshikali lasuki la ekambi ami wʼapami edja ndu lamʼayuwushidiya muna epunga ami tshe.

²²Naomi akatela olokai andi Ruta ati: Kawo efula onʼami. Kutshokaki la ekambi andi wʼamantu. Untu takutanaki lu ekambo kekina.

²³Okone ndi akatshikala la ekambi wʼamantu wa Boaza dia ntatongonaka washa edja ndu ekumelu ka dinela diʼepunga wa yelela, ndu wa menge. Ndi akadjaseka kame la ukilu andi.