Read tetala 1 Samuele 11 Bible Online

1 Samuele 11 - tetala bible

1 Samuele 11

¹Nahashi usi Amona akatshu la ntolosha asi Jabesha ya la Ngiliyade. Ku asi Jabeshe tshe wakatela Nahashi vati: Udji la su sheki dia shu ndjala ekambi aye.

²Ku Nahashi usi Amona akakaluya diui ati: Dimi haletawo mbidja la nyu sheki, tshikima lambunyula nyu tshe untu lʼuntu su diandi dia lupami. Layutsha dikambu so, dia dio ndjala sonyi lu Isariyele tshe.

³Diha-ngamendi dia la Jabeshe wakûkaluya diui vati: Utusha diasu nshi esambeli, dia shu ntuma akendji lu beke tshe dia Isariyele. Ku naka hatewi untu lukuki ntukimanyia, tayuyakimo lu anya aye.

⁴Akendji wakakumi la Ngibeya ka Saulu, wakatutela antu aui aso tshe. Ku vo tshe wakatundo lʼalelu, wakaleli wulu.

⁵Etena kako, Saulu akayayakaka uma lʼusui ayasukuya ngombe. Ku ndi akambula ati: Na dikambu diambutumba, dialela antu na? Ku wakasanyia aui wakati asi Jabeshe.

⁶Kamʼakuki Saulu aui aso, Nyuma ka Unyashungu akawahema. Ku ndi akandanganela la kele.

⁷Ndi akadiaki ngombe yako yakakelekami lu lokoho, akayisese; akatumi funda yayo lu anya wʼakendji lu beke tshe dia Isariyele la diui ati: Wuhu one mbayuwutshela ngombe yʼantu tshe lahuyela Saulu la Samuele. Wudja wakandama la woma wa Latuyalaka. Ku vo tshe wakakimela mbuka uku untu otoi.

⁸Saulu akali antu la Bezeke. Asi Isariyele waki antu nunu kama shatu, la asi Juda nunu akumi asatu.

⁹Vo wakatela akendji wakayi vati: Kanyututeli asi Jabeshe ya la Ngiliyade okone nyati: Lui, lamʼayuyala yanyi kandji, nyayutshungwama. Akendji wakatutela asi Jabeshe aui aso, ku vo wakangenangena.

¹⁰Okone asi Jabeshe wakatela asi Amona vati: Lui, shu tayuyakimo lu anya anyu, kanyututsheli uku alanganyu.

¹¹Wedi a pindju, Saulu akakahanya antu lu elui esatu. Vo wakoto lu pangu kʼasi Amona la hyutshihutshi, wakalo la wo edja ndu lamʼakayala yanyi kandji. Wane wakahandi, wakahandjo vwa, nduku ahendi awo wakatanema kame.

¹²Ku wudja wakambula Samuele vati: Lendʼeli antu wakataka vati: Saulu kayutulela uka? Utundja antu ako, tadiaki.

¹³Keli Saulu akakaluya diui ati: Nduku untu ayudiakema lushi lone, ne dia Latuyalaka ambushimbela Isariyele elo.

¹⁴Samuele akatela wudja ati: Nyuyeti tutshu la Ngilingala, tutushikike diulelu leko.

¹⁵Ku wudja tshe wakatshu la Ngilingala, wakatudja Saulu khumʼekanga la ntundu ka Latuyalaka. Vo wakalambula elambu wa ki la ntundu ka Latuyalaka. Ku Saulu la asi Isariyele tshe wakatamanya ngenangena.