Read tetala 1 Samuele 13 Bible Online

1 Samuele 13 - tetala bible

1 Samuele 13

¹Saulu aki la deku … lamʼakandayala khumʼekanga. Ndi akulela Isariyele deku … la pendi.

²Saulu akasonola apami nunu satu wʼasi Isariyele. Nunu pendi diawo waki kame la Saulu la Mikimashi ndu lu leke lʼakuna wa Betele, la kinunu kawo waki kame la Jonatana la Ngibeyona ka la Bendjamina. Ku ndi akakaluya apami akina tshe utsha la wakawo.

³Jonatana akalembia alimbi wʼasi Filistiya, waki la Ngibeya. Ku asi Filistiya wakuki lukumu lako. Saulu akadja amama lu beke tshe dia kete ati: Asi Heberu tshe wuki lukumu lone.

⁴Asi Isariyele wakuki lukumu vati: Saulu ambolembia alimbi wʼasi Filistiya, ndu asi Isariyele wambuyaete atunyi a wulu le asi Filistiya. Vo wakamote lasuki la Saulu la Ngilingala.

⁵Asi Filistiya wakamote kame dia ndosha Isariyele. Vo waki la pusupusu ya ta nunu akumi asatu, ambahemi wa falasa nunu samalu. Alimbi wakakendakendaka lʼekulu waki efula kaheyama mbala, uku seke ya losenga la lʼumamu wʼashi a waki. Ku vo wakayi, wakayuhanga la Mikimashi lu leke lʼehutwelu ka unya la Bete-Avena.

⁶Lamʼakenyi asi Isariyele vati: Diasu diambukume (ne dia vo wakadingama hwi), vo wakayashe lu weuku, lu akanda, lu ave, lu tangelu, ndu lu afuku.

⁷Asi Heberu amotshi wakateho Jerodana utsha lu kete ya Ngada ya la Ngiliyade, laso ku Saulu eki la Ngilingala. Antu tshe waki la ndi wakadidima.

⁸Ndi akakungi nshi esambeli uku diui dia Samuele.[20] Keli Samuele kunkuma la Ngilingala. Antu wakadiangana etali uma le Saulu.

⁹Ku Saulu akati ati: Nyumbela ulambu wa lutshumba la ulambu wa ki. Ku ndi akalambula ulambu wa lutshumba.

¹⁰Kamʼakandashidiya nambula ulambu wa lutshumba, endi ku Samuele one ayayi. Ku Saulu akatshu dia ntulungula.

¹¹Samuele akawumbula ati: Katsheye na? Saulu akûkaluya diui ati: Dimi lakenyi nti: Antu wambudiangana etali uma le mi, la we kundja lʼetena kakayasonola, ndu asi Filistiya wambomota kame la Mikimashe.

¹²Okone dimi lakatshi nti: Kakiane, asi Filistiya wutsha mpulo la Ngilingala dia ndjondosha, ku dimi latasengasenga Latuyalaka, diako mbakamadiaki olembe, mbakamalambudi ulambu wa lutshumba one.

¹³Samuele akakaluya Saulu diui ati: We ambutsha uku enginya. We kunama olembe wakakundjela Latuyalaka, Unyashungu aye. Latuyalaka akalangi nshikike diulelu diaye lu Isariyele pundju.

¹⁴Keli kakiane, diulelu diaye hadiutshikala edja ntu. Latuyalaka ambuyayangela untu lufanyi la ndi lʼutema.[21] Latuyalaka ambosonola dia ndi ndjala uwandji wa wudja andi, ne dia we kunama olembe wakandakudjela.

¹⁵Samuele akunela uma la Ngilingala, akatshu la Ngibeya ka la Bendjamina. Saulu akali antu waki la ndi. Vo waki lasuki la apami kama shamalu.

¹⁶Saulu, onʼandi Jonatana, la antu waki la wo, wakatshikala la Ngeba ka la Bendjamina, keli asi Filistiya wakahangi la Mikimashe.

¹⁷Akanga somboki wakatumbi elui esatu uma lu pangu kʼasi Filistiya: ului omotshi wakakimela mbuka ka Ofara kʼutsha la Shuala.

¹⁸Ku ului ukina waketi lu mbuka ka Bete-Horona; ku ukina ntu waketi lu mbuka keli lʼulelu welanedi lʼukidi wa Zeboyima, lu leke lʼesui wa shenga.

¹⁹Lu nshi sho, nduku utshudi a mbulu akatanema lu kete tshe ya Isariyele; ne dia asi Filistiya wakukaka woma vati: Asi Heberu watukuyatshulela tombo la akonga.

²⁰Okone usi Isariyele tshe akahumbaka ntsho le asi Filistiya dia ntoketemola lungu landi, kaku kandi, kenge yandi la lukasu landi.

²¹Vo waki ndu la tupa dia nketemola kasu, kaku, somo la tokenge tambutshuna, ndu dia nongosola weulu.

²²Okone lamʼakakuki lushi la ta, nduku untu laki kame la Saulu la Jonatana laki la yombo kuyanga dikonga lu lunya landi. Tshikima Saulu la onʼandi Jonatana mbaki la dio.

²³Alimbi wʼasi Filistiya wakatshu, wakatemala lu mbuka kʼutsha la Mikimashe.