Read tetala 1 Samuele 14 Bible Online

1 Samuele 14 - tetala bible

1 Samuele 14

¹Lushi lomotshi, Jonatana onʼa Saulu akatela omembi andi a dihumo ati: Yeti tuteho utsha lu pangu keku kʼalimbi wʼasi Filistiya keli la wedi. Keli ndi kuntatedi shi dikambu diako.

²Saulu akatemala la kuma ka Ngibeya la tshina diʼutamba wʼokomi la Mingirona. Antu waki kame la ndi waki uku apami kama shamalu.

³Ahidja, onʼa Ahitube, onangu Ikaboda, onʼa Finehasi, onʼa Eli, olombedi wa Latuyalaka wa la Shilo, akalote ukutu wa nemo. Antu kumbeya vati: Jonatana akunedi.

⁴Lu wuku ako wakâyangi Jonatana mbeta utsha la pangu kʼasi Filistiya kaki elui ehendi wʼave wa sodisodi: ului omotshi wedi omotshi la ului ukina wedi ukina. Lukumbu lʼului omotshi wʼave wa sodisodi laki Bezera, la ukina Sene.

⁵Ului omotshi wʼave waki lu leke la ngelʼa kushi welanedi la Mikimashe, la ukina lu leke la diku dia kushi welanedi la Ngeba.

⁶Jonatana akatela olongo a pami wakatembaka dihumo diandi ati: Yeti tuteho utsha lu pangu ka wane wahatahemaka uhekeli aku. Undu Latuyalaka ayutukimanyia, ne dia nduku lukuki mbushimba dia ntushimbela la ului one wa tshitshe uku ului a wuki.

⁷One lakatembaka dihumo diandi akûkaluya diui ati: Utshi kene tshe keli lʼutema aye. Uyeli paka tukanyi taye. Dimi leko kame la ye, layukuyela.

⁸Ku Jonatana akati ati: Kawo, tuteho utsha le antu ane, tutenami le wo.

⁹Naka vo wayututela vati: Nyemali leku, edja ndu shu tambuya le nyu! Ku shu tayemala laawo, hatotshu utsha le wo.

¹⁰Keli naka vo wayututela vati: Nyuyi le su, shu tayutsho, ne dia Latuyalaka ambakimo lʼanya asu. Oso ayuyala djimbitelu le su.

¹¹Vo ahendi wakenama le alimbi wʼasi Filistiya, ku asi Filistiya wakati vati: Nyendi, asi Heberu wambutumba uma lu afuku wakawashami.

¹²Ku alimbi wakatela Jonatana la omembi andi wa dihumo vati: Nyuyi uya le su, tuyunyenya dikambu dimotshi. Jonatana akatela omembi andi wa dihumo ati: Yaka, undjeli, ne dia Latuyalaka ambakimo lu anya wa Isariyele.

¹³Ku Jonatana akatayakutulaka lʼanya iʼekulu, omembi andi a dihumo atuyeli. Asi Filistiya wakako la ntui du ka Jonatana, ku one lakatawembelaka dihumo akayadiakaka lʼokongo andi.

¹⁴Lu ta diako dia ntundu, Jonatana la omembi andi a dihumo wakadiaki apami uku akumi ahendi lu hyuli ya tshitshe, ya wanya akumi atanu lʼutali.

¹⁵Woma a wuhi wakayala lu pangu, lu wudja ndu lʼatei wʼantu tshe. Alimbi waki lu pangu wakandama la woma. Kete yakadidima; woma wa mamba wakaluli lu leke lako.

¹⁶Alami wa Saulu waki la Ngibeya ka la Bendjamina wakedia ashu, wenyi ku ului a wuki wʼantu wambuhandjo vwa, watalawo amotshi lene amotshi lene.

¹⁷Ku Saulu akatela antu waki la ndi ati: Nyali antu, nyeyi wane wakamwi uma lʼatei asu. Lamakawali antu, ku Jonatana la omembi andi a dihumo kema.

¹⁸Saulu akatela Ahidja ati: Ela oshete wa sheki wa Unyashungu! Lʼetena kako, oshete wa Unyashungu waki kame lʼasi Isariyele.

¹⁹Lamʼakasawulaka Saulu la olombedi, lufungusu lakatamanya efula lu pangu kʼasi Filistiya. Saulu akatela olombedi ati: Ukaluya lunya laye.

²⁰Saulu lʼantu tshe waki la ndi wakamote kame, wakatshu lu dihuli dia ta; watani ku asi Filistiya vame wukana tombo, la ufutanu a wuki wambuyala leko.

²¹Lʼatei wʼasi Filistiya kaki asi Heberu amotshi wakawaotwela ntundu, wakayi kame la wo lu pangu, uma lu kete yawo ya lʼutshimba. Ku ndu vo wakakadimo, wakayoto lu leke lʼasi Isariyele waki kame la Saulu la Jonatana.

²²Ndu apami tshe wa Isariyele wakashami lu leke lʼakuna wa Efarayima, lamʼakawuki lukumu vati: Asi Filistiya wambulawo, vo wakatumbi, wakayelana la wo wulu lu ta.

²³Okone Latuyalaka akashimbela Isariyele lushi lako. Ta diakakolamela pulu ndu la wedi a Bete-Avena.

²⁴Apami wa Isariyele wakakomo alimba lushi lako, ne dia Saulu akatadjedi wudja dokoloko ati Mananu kayali le untu layole ma ntundu unya atadji, ndu ntundu latasomboya atunyi ami! Ku nduku untu akali ma.

²⁵Antu tshe wakakumi lʼukunda omotshi, lene akawatani usanga lu kete.

²⁶Lamʼakakumi antu lʼukunda, watani ku usanga one wasela apopo. Nduku untu aikolombola, ne dia antu wakuki dokoloko woma

²⁷Jonatana kumbuka lamʼakadji shi dokoloko. Okone ndi akatshumi sodi kʼukalimba waki lu lmya landi, akosohe lu ehihi kʼusanga. Ndi akela lunya lʼunyo, ku ashu andi wakasene ololo.

²⁸Untu omotshi akawutela ati: Sho akadjedi wudja dokoloko ati: Mananu kayali le untu layole ma elo! Antu wakakomo la ndjala.

²⁹Ku Jonatana akati ati: Papa ambohenyahenya wudja elo. Nyei di okone ambosena ashu ami ololo lamʼambumolombola yema yʼusanga.

³⁰Mete utunduyala antu wakali diango dia dimbu elo diakawatanyi laka atunyi awo, tshiki elembielo kʼasi Filistiya tututuyala wuki uka?

³¹Vo wakatadiakaka asi Filistiya lushi lako uma la Mikimashe pulu ndu la Adjalona. Antu wakaleki nkomo efula.

³²Vo wakose diango dia dimbu; wakose ekoko, ngombe la ana wa ngombe, wakayidiaki ladiku dia kete, ku wakayile eyuyu.

³³Wakatutela Saulu vati: Uki, antu wambutsha kolo lu ashu wa Latuyalaka, wambole nyama uyuyu.[22] Ku ndi akûkaluya diui ati: Nyu nyambutsha uhedia. Kakiane, nyungituli dive dia wuki uya le mi.

³⁴Saulu akawatela ati: Nyudiangani lʼatei a wedja. Nyutatelaka antu dia untu lʼuntu mbela ngombe kandi kana okoko andi. Kawuyuyidiaki lane. Kawuyile, diaha vo ntsha kolo ka nde nyama uyuyu. Ku lʼutshu, untu tshe lʼatei a wudja akayakimedi ngombe kandi lu lunya dia ndi ndjukidiaka ladiku dia dive.

³⁵Saulu akatshela Latuyalaka ediakelu. Oso aki ediakelu ka ntundu kakandatshela Latuyalaka.

³⁶Saulu akati ati: Nyeso tuyelani lʼasi Filistiya lʼutshu one. Tutuwambi edja ndu unya ambuhuto, aha tshika nduku untu la lumu lʼatei awo. Ku vo wakûkaluya diui vati: Utshi uku alangaye. Ku olombedi akati ati Tusukani le Unyashungu kakiane.

³⁷Saulu akambula Unyashungu ati: Ololo dimi ndjela asi Filistiya? We ayakimo lʼanya wa Isariyele? Keli ndi kumbukaluya nduku diui lʼetena kako.

³⁸Saulu akati ati: Nyu ewandji tshe wa wudja, nyusukani lane. Nyuyangi, nyushuli uma lendi akatumbi kolo kene elo.

³⁹Uku eli Latuyalaka, utshungudi wa Isariyele, la lumu, kuyanga onʼami Jonatana kutshi dikambu ne, mete, ndi ayuvo. Keli nduku untu lʼatei a wudja lakukuluya diui.

⁴⁰Ku ndi akatela Isariyele tshe ati: Nyemali wedi omotshi, ku dimi la onʼami Jonatana temali wedi ukina. Ku wudja wakatela Saulu vati: Utshi uku alangaye.

⁴¹Okone Saulu akati ati: Latuyalaka, Unyashungu wa Isariyele li, na dikambu diahayakalusha ukambi aye diui elo? Latuyalaka, Unyashungu wa Isariyele li, naka unungu weko le mi, kana le Jonatana, onʼami a pami, ukimo Usasi; keli naka unungu weko le wudja aye, Isariyele, ukimo Uluwanyi.[23] Ku Jonatana la Saulu wakandama uwali, keli wudja wakahandi.

⁴²Saulu akati ati: Nyutuki uwali, dimi la onʼami Jonatana. Ku Jonatana akandama.

⁴³Saulu akambula Jonatana ati: Umvuteli dikambu diakayatshi. Ku Jonatana akûkaluya diui lu dikambu diako ati: Dimi lakunganedi yema yʼusanga la kuma kʼukalimba waki lu lunya; dimʼone, kamvu.

⁴⁴Saulu akati ati: Unyashungu antsheli dime dikambu so ndu akinaladiku; mete, Jonatana, we ayuvo!

⁴⁵Ku wudja wakakaluya Saulu diui vati: Hai! Jonatana lakatungi etshungwelu kene ka wuki lu Isariyele, ku ndi mvo? Aha osoku! uku eli Latuyalaka la lumu; nduku wondji andi a divu wayoko lu kete, ne dia ndi akakambi kame la Unyashungu elo. Osoku mbakashimbela wudja Jonatana, mbakindi kumvo.

⁴⁶Saulu akakimo ndjelana la asi Filistiya, ku vo wakakalula la wakawo.

⁴⁷Lamʼakayala Saulu uwandji wa diulelu dia Isariyele, ndi akalokaka la atunyi andi tshe wakudingi: asi Moaba, asi Amona, asi Edome, khumi ya dikanga ya la Zoba, ndu asi Filistiya. Lu ahuli tshe wakandatshokaka, ndi akatalembiaka.

⁴⁸Ndi aki la dihunga efula. Ndi akalembia asi Amaleka. Ndi akatshungula Isariyele uma lu anya a waku wakahenyahenyaka.

⁴⁹Kumbu ya ana apami wa Saulu nye: Jonatana, Ishivi, Malakishua. Kumbu ya anʼandi wʼamantu nye: Ona lʼenundu, Merabe, ndu la kushi Mikale.

⁵⁰Lukumbu la wadi Saulu laki Ahinoama, onʼa Ahimase. Abinere, onʼa Nere onangu shi Saulu kaki olombodi wʼalimbi.

⁵¹Kishi aki shi Saulu, Nere, shi Abinere, aki onʼa Abiyele.

⁵²Nshi ya lumu tshe ya Saulu, ta dia wulu diakayalaka lʼasawo lʼasi Filistiya. Tena tshe, lamʼakenaka Saulu pami ka wulu kana ka dihunga, ndi akawudji lʼulimu andi.