Read tetala 1 Samuele 15 Bible Online

1 Samuele 15 - tetala bible

1 Samuele 15

¹Samuele akatela Saulu ati: Latuyalaka akantumi dia dimi nkudja khumʼekanga ka wudja andi Isariyele,[24] okone kakiane, uki aui wa Latuyalaka ololo.

²Latuyalaka, Kanga lulimbilimbi, kata ati: Dimi lambuho kene tshe kakutshela Amaleka Isariyele, uku akandadihela mbuka lamʼakawatumbi uma lʼEdjibitu.[25]

³Utshu kakiane dia ntolosha asi Amaleka. Utulanya diango diawo tshe. Tuwaukaki ketshi, keli uwashili, apami la amantu, akenda la ana washashi, ngombe la ekoko, kamelo la punda, ushiki.

⁴Saulu aketi wudja, akali antu la Telayima. Apami wakatakendakendaka lʼekulu waki nunu kama hyendi, la pami nunu dikumi uma la Juda.

⁵Saulu akatshu edja ndu lʼusumba wa Amaleka, akatukitsha lalu lʼukidi.

⁶Ndi akatela asi Kene ati: Nyuneli, nyumo, nyutumbi uma lʼatei wʼasi Amaleka, dimi ntukuyunyudiaka kame la wo, ne dia nyu nyakatshela asi Isariyele tshe ololo, lamʼakawayayakaka uma lu Edjibitu. Okone asi Kene wakamo uma lʼatei wʼasi Amaleka.

⁷Saulu akalosha Amaleka uma lu Havila edja ndu la Shura, yeli lu welelo wa Edjibitu.

⁸Ndi akandi Anganga, khumʼekanga kʼAmaleka, akutshiki la lumu. Ndi akadiaki wudja andi tshe la yombo.

⁹Saulu la wudja andi wakatshiki Anganga la lumu, wakatshiki ndu ekoko, ngombe, esongo wa ngombe, la ana wʼekoko wuleki amena, la kene tshe kaki ololo. Vo wakalanya kene tshe kaki wondju la shema.

¹⁰Ku diui dia Latuyalaka diakayi le Samuele ati:

¹¹Dimi lambuyatshumuya ne dia lakadji Saulu khumʼekanga, ne dia ndi ambukadimo uma le mi, hayukitanyia elembe ami. Samuele akuki kele, akaleli utshu tshe la ntundu ka Latuyalak

¹²Ku Samuele akunela kʼolomo la pindju dia ntuhumana la Saulu. Wakatela Samuele vati: Saulu akayi la Karamela. Enda, ndi akayahikela euhwelu, ku ndi akamo uma leko, akahulo utsha la Ngilingala.

¹³Samuele akayi le Saulu, ku Saulu akawutela ati: Otshokwami le Latuyalaka! Dimi lakalami olembe wa Latuyalaka.

¹⁴Ku Samuele akawumbula ati: Na ndjawi yʼekoko la ngombe yukami sho?

¹⁵Saulu akûkaluya diui ati: Wudja mbakayela uma le asi Amaleka, ne dia vo wakatshiki ekoko la ngombe yuleki amena, dia ndjilambula Latuyalaka, Unyashungu aye. Keli takalanya kina tshe.

¹⁶Samuele akatela Saulu ati: Ulungi, nkuteli kene kakamvutedi Latuyalaka lʼutshu one. Ndi akawutela ati: Otekete!

¹⁷Samuele akawutela ati: Kuyanga we akayaenaka engo ka tshitshe lu ashu aye, we kundjala uwandji a wauhu wa Isariyele? Latuyalaka kunkukita iso dia we ndjala khumʼekanga ka Isariyele?

¹⁸Latuyalaka akakunyia ati: Tshoka, tudiaki atshi wa kolo, asi Amaleka. Utole la wo ta, edja ndu we amtashila ushiki.

¹⁹Okoko wana wakiye kunkitanyia diui dia Latuyalaka, wakayakhunguso utsha lu diango dia dimbu, ndu wakayatshi wuhu waki kolo lu ashu wa Latuyalaka?

²⁰Saulu akuk iluya diui ati: Kema, dimi lakakitanyia diui dia Latuyalaka, lakayeli mbuka kakandantumi. Dimi lakayi la Anganga, khumʼekanga kʼasi Amaleka, keli lakashili asi Amaleka ushiki.

²¹Keli wudja mbakose diango dia dimbu, ekoko la ngombe yuleki amena, dia ndjuyilambula Latuyalaka, Unyashungu aye, la Ngilingala.

²²Samuele akawumbula ati: Kakona kuleki ngenyangenya Latuyalaka lu elambu la elambu wa lutshumba, Uku lu nkitanyia diui dandi? Ulungi, ukitanyia ndeka ulambu ololo. La elamelu ka diui diandi, ndeka wata wʼekoko ololo.

²³Uhedia eli uku kolo ka endjelu ka diwulu. Ote wulu eli uku etendelo ka dikishi la pingu. We akatuni diui dia Latuyalaka, Diako mbambundukutuna ndu we lu khumʼekanga.

²⁴Saulu akakaluya Samuele diui ati: Dimi lakatshi kolo, ne dia dimi lakadiaki olembe wa Latuyalaka, ndu lakahedia aui aye. Dimi lakuki antu woma, mbakametawo aui awo.

²⁵Kakiane lambukosengasenga nti: Unyimanyia kolo kami. Uyali kame la mi ntu, dia dimi ntemola Latuyalaka.

²⁶Samuele akûkaluya diui ati: Dimi handjuyala kame la ye ntu, ne dia we akatuni diui dia Latuyalaka, ndu Latuyalaka akakutuni. We huyala khumʼekanga ka Isariyele ntu.

²⁷Lamʼakakadimo Samuele dia mumo uma la le ndi, Saulu akukimela lʼuhimbu wa ukutu andi, ku vo wakate.

²⁸Samuele akawutela ati: Latuyalaka ambukohotola diulelu dia Isariyele elo, ambudisha unyaye lukuleki ololo.

²⁹One leli Wulu wa Isariyele, hatutaka kashi, hatukadimulaka diui; ne dia ndi kema untu, dia ndi nkadimula diui.

³⁰Ku Saulu akûkaluya diui ati: Dimi lakatshi kolo, kakiane lambukosengasenga nti: Onemia la ntundu ka dihangamendi dia wudja ami ndu la ntundu ka Isariyele. Uyali kame la mi ntu, dia dimi ntemola Latuyalaka, Unyashungu aye.

³¹Okone Samuele akayala kame la Saulu ntu, ku Saulu akatemola Latuyalaka.

³²Samuele akati ati: Nyumbela Anganga, khumʼekanga kʼasi Amaleka. Ku Anganga akayi le ndi la ongenongeno. Anganga akati ati: Mete, wanga a nyoi ambeta.

³³Samuele akawutela ati: Uku akatshikia yombo yaye ana anyengewo, osoku mbayutshikala nyo lʼatei wʼamantu aha la ona. Samuele akatshatsha Anganga betshi betshi la Ngilingala, la ntundu ka Latuyalaka.

³⁴Lʼokongo diku, Samuele akatshu la Rama, ku Saulu akatshu lakandi la Ngibeya ka Saulu.

³⁵Samuele kuntsho ntu la ntenana la Saulu edja ndu lushi landi la nyoi. Keli Samuele akalelaka lu dikambu dia Saulu. Ndu Latuyalaka akayatshumuya, ne dia ndi akadji Saulu khumʼekanga ka Isariyele.