Read tetala 1 Samuele 17 Bible Online

1 Samuele 17 - tetala bible

1 Samuele 17

¹Asi Filistiya wakamotsha elui awo wʼalimbi, wakasangana la Soko keli lu kete ya Juda. Vo wakatuhanga la Efese-Damima, lʼasa Soko lʼAzeka.

²Saulu la asi Isariyele wakamote kame, wakahangi lʼukidi wa Ela. Vo wakayalongosola dia ndo la asi Filistiya ta.

³Asi Filistiya wakemala lʼukungu omotshi, la asi Isariyele lʼukungu ukina, ku ukidi aki lʼatei.

⁴Dihuka dia wulu diakatumbi uma lu pangu kʼasi Filistiya, lukumbu landi Ngoliyate, usi Ngata. Ndi aki utali wa wanya asatu la nana otoi dia pita.

⁵Ndi aki la lufuli lʼohotela lʼote. Ndi akalote koti dia mbulu diʼakamba akamba, diaki la wutshu wa kilo lukama.

⁶Ndi aki la ekumbo wʼohotela lʼekulu, ndu dikonga diʼohotela lu aheka andi.

⁷Ulanga wa dikonga diandi waki uku ukanda watuwotokaka asami. Eselenge ka dikonga diandi aki wutshu wa kilo enanei. Omembi andi wʼengawo akatatshokaka la ntundu kandi.

⁸Ndi akemala, akedia diui utsha le elui wʼalimbi wʼasi Isariyele, akawambula ati: Ukundi ambunyutumba dia ndjalongosola uya lu ta? Undi, aha usi Filistiya kemi, la nyu aha fumbi ya Saulu mbenyu? Nyosonole pami kemotshi aye uya le mi!

⁹Naka ndi ayolo la mi, ayundjaka, ku shu tayuyala lʼokongo anyu. Keli naka dimi layolembia, layudiaka, nyu nyayuyala lʼokongo asu, nyayutukambelaka ulimu.

¹⁰Usi Filistiya ako akati ati: Dimi lambudja alimbi wa Isariyele tofwefwe elo nti: Nyumbisha pami kemotshi, tolo, dimi la ndi.

¹¹Lamʼakuki Saulu la Isariyele tshe aui wa usi Filistiya, wakate asulu, wakandama la woma wa mamba.

¹²Davidi aki onʼa Jese, usi Efarayima, wa la Betelehema ka la Juda. Jese aki la ana apami enanei. Ndi aki usumbi a lukusumbi lu nshi ya Saulu.

¹³Anʼandi asatu wʼapami wa nundu wakayeli Saulu lu ta. Lukumbu la ona lʼenundu lakatshu lu ta laki Eliyabe, one lakahenyi la ndi aki Abinadaba, ona la satu aki Shama.

¹⁴Davidi kaki ukala lʼatei awo. Ana wa nundu wakayeli Saulu.

¹⁵Davidi akatshokaka uma le Saulu utsha la Betelehema dia ntulama ekoko wa shi.

¹⁶Usi Filistiya ako akayakaka la pindju ndu la dikolo, akayemalaka la ntundu kawo nshi akumi anei.

¹⁷Jese akatela onʼandi Davidi ati: Osa saka diʼahoho wa lufumba la ekama ene wa ma dikumi. Ulawo esadi utsha lu pangu, otolele anʼanyo.

¹⁸Otolele olombodi awo wʼalimbi kinunu ekama ene dikumi wʼawele wʼekamu. Utendi kana anʼanyo la wulu. Kumbela lukumu la djimbitelu motshi uma le wo.

¹⁹Vo weko kame la Saulu la alimbi wa Isariyele lʼukidi wa Ela, lu ndo lʼasi Filistiya ta.

²⁰Davidi aketo kʼolomo la pindju, akatshiki ekoko le ulami omotshi. Ndi akembe diango diakawusha shi, akatshu uku akandawutela. Lamʼakandakumi lu pangu, ku alimbi wambunela utsha lu ta, watahangohango utsha lu ta.

²¹Asi Isariyele la asi Filistiya wakayalongosola, wakelanela dia ndo ta.

²²Davidi akatatshiki utshumu andi lu anya wa ulami a diango, akalawo utsha lu enongo wʼalimbi, akatemula anangu.

²³Lamʼakandasawulaka la wo, enyi ku dihuka diako diakawetaka vati: Ngoliyate, usi Filistiya ka la Ngata, ayatumbi uma lʼenongo wʼalimbi wʼasi Filistiya. Ndi akayuta aui wakandati ntundu, ku Davidi akawauki.

²⁴Lamʼakenyi asi Isariyele pami kako, vo wakulawo. Vo tshe wakuki woma efula.

²⁵Asi Isariyele wakambwana vati: Undi, nyu hanyenyi pami keku kaki lu ndjayi? Mete, dia ndjudja Isariyele tofwefwe mbuyendi! Naka untu ayudiaka, khumʼekanga ayongonya, ayuwusha onʼandi wadi. Ndi ayusha khumbu ka shi ndjadjasela lu Isariyele.

²⁶Davidi akambula apami wakemadi lasuki la nti ati: Kayuwutshela untu lavudiaka usi Filistiya uku, ndu layunya Isariyele lu sonyi? Na usi Filistiya uku laki kumbahema uhekeli, ladja elui wʼalimbi wa Unyashungu a lumu tofwefwe?

²⁷Ku antu wakawutela aui aka vati: Osoku mbayuwutshela untu layudiaka.

²⁸Eliyabe, onangu lʼenundu, akuki lamʼakandateketaka lʼapami ako, ku ndi akawuki kele ka wulu; akawumbula ati: Dikambu kuna diakayayi lindu? Akona akayatatshikedi djui yʼekoko ku lʼusui wa shenga? Dimi mbeyaka utaku aye la osemo aye. We akayi lindu, paka dia ndjena ta.

²⁹Ku Davidi akûkaluya diui ati: Kutshimi na? aha mumbula tshu mbumbudimi?

³⁰Ku ndi akakadimo uma le ndi utsha le ukina, akawumbula umbula pupu. Ku antu wakûkaluya diui uku etena ka ntundu.

³¹Lamʼakawuki aui wakati Davidi, vo wakatuwata la ntundu ka Saulu, ku ndi akatumi untu dia ntuweta.

³²Davidi akatela Saulu ati: Untu tukaki woma dikambu dia usi Filistiya uku. Ukambi aye ayutsho dia ntolo la ndi.

³³Saulu akatela Davidi ati: We hakuki ntsho la ntolo la usi Filistiya uku. We eki dikenda, la ndi akayala ondoshi wa ta umaka nshi yandi ya dikenda.

³⁴Davidi akûkaluya diui ati: Ukambi aye akalamaka ekoko wa papa. Ku lamʼakayakaka tambwe kana laundu dia ndjunda yana yʼokoko motshi uma lu limba,

³⁵dimi lakakiyeli, lakakikomola, lakahatula yana yʼokoko yaki lʼunyo ato. Naka to kambukhunguso uya le mi, ku dimi nkekimela lu kingu, ku nkihina la nkidiaka.

³⁶Ukambi aye akadiaki tambwe la laundu, usi Filistiya one, laki kumbahema uhekeli, ayuyala uku kemotshi lʼatei ayo, ne dia ndi ambudja elui wʼalimbi wa Unyashungu a lumu tofwefwe.

³⁷Ku Davidi akati ntu ati: Latuyalaka lakanshimbela uma lu kala ya tambwe la ya laundu, ayunshimbela ndu uma lu anya wʼusi Filistiya uku. Ku Saulu akatela Davidi ati: Tshoka, Latuyalaka ayali la ye!

³⁸Saulu akalotsha Davidi eloto andi wa ta wa mbulu. Ndi akawahe lufule lʼohotela lʼote, akolotsha koti dia ta.

³⁹Davidi akalote yombo ya Saulu ladiku dia ahondo andi. Ndi akahimbi nkendakenda, ne dia ndi hatolotaka eloto ako. Davidi akatela Saulu ati: Dimi haleyi ntsho la eloto ene, ne dia dimi hatelotaka. Ku Davidi akekulula.

⁴⁰Ndi akakimela ukalimba andi lu lunya, akasonola mboko yʼave tshanu uma lʼokedi, akayidji lu diwete diandi diʼulami wʼekoko, ndu lu tapa diandi. Ndi akakimela yuka ave lu lunya, akatshu utsha le usi Filistiya.

⁴¹Usi Filistiya akayasukanaka yema yema uya le Davidi la omembi andi wʼengawu, akayakendakendaka la ntundu kandi.

⁴²Lamʼakedia usi Filistiya ashu, ndi akenyi Davidi, akawonyola, ne dia ndi eki dikenda, aki la elundji ka ngaingai ka dimena.

⁴³Ku usi Filistiya akambula Davidi ati: Undi, fo kemi, mbayayayi le mi la tukalimba? Ndi akadji Davidi mananu le ditemolatemola diandi.

⁴⁴Ku ndi akawutela ati: Yaka ndjusha fudu ya lʼulungu la nyama ya lʼusui emunyi aye.

⁴⁵Davidi akûkaluya diui ati: We ambuya uya le mi la yombo, dikonga la osongo, keli dimi lambuya le ye paka lu lukumbu la Latuyalaka, Kanga lulimbilimbi, Unyashungu kanga alimbi wa Isariyele, wambuyudja tofwefwe.

⁴⁶Elo, Latuyalaka ayukukimo lu anya ami Dimi layukudiaka, layukuhimbula ote. Elo, layukimo edu wʼalimbi wʼasi Filistiya le fudu ya lʼulungu la nyama ya lʼusui; dia antu tshe mbeya vati: Unyashungu eko lʼatei wa Isariyele.

⁴⁷Ku ului one tshe wʼantu wayeya vati: Aha la yombo kana la dikonga, mbatushimbelaka Latuyalaka antu, ne dia ta ne dieli dia Latuyalaka. Ndi ayunyukimo lu anya asu.

⁴⁸Kamʼakatatela usi Filistiya nkendakenda utsha le Davidi, Davidi akalawo dia ntuhumana la ndi.

⁴⁹Davidi akadji lunya lu diwete diandi, akose lowoko lomotshi, akaluki la yuka ave, akalokomola usi Filistiya lu fumu. Lo lakawoto lu fumu, ku ndi akako ekhukhumadi la kete.

⁵⁰Okone Davidi akalembia usi Filistiya la yuka ave la lowoko. Ndi akokomola, akudiaki; nduku yombo yaki lu lunya la Davidi.

⁵¹Ku Davidi akalawo, akatahema usi Filistiya. Ndi akosomola yombo yandi, akusihula, akuhimbula ote. Lamʼakenyi asi Filistiya vati: Dihuka diawo ambuvo, vo wakalawo.

⁵²Asi Isariyele la asi Juda wakunela watahangohango, wakayelana lʼasi Filistiya edja ndu la Ngata, ndu lʼasuku wa Ekerona. Asi Filistiya wakahumo, wakatakokaka edu lu mbuka kʼutsha la Sharayima, pulu la Ngata, ndu la Ekerona.

⁵³Asi Isariyele wakakalula uma la ntayelana lʼasi Filistiya. Vo wakambi diango diawo diaki lu pangu.

⁵⁴Davidi akose ote wʼusi Filistiya, akawela uya la Jerusalema, keli ndi akatakitshisha dihumo diʼusi Filistiya lu luudu landi la dipema.

⁵⁵Lamʼakenyi Saulu Davidi utatshu dia ntolo lʼusi Filistiya, ndi akambula Abinere, olombodi wa ta, ati: Abinere, olongo a pami uku, onʼa a endi? Ku Abinere akûkaluya diui ati: Khumʼekanga li, uku weye la lumu! dimi haleyi.

⁵⁶Khumʼekanga akawutela ati: Umbuli antu dia mbeya untu lakuti olongo uku.

⁵⁷Lamʼakakalula Davidi uma lene akandadiaki usi Filistiya, Abinere akawose, akayi la ndi la ntundu ka Saulu ayakimedi ote wa usi Filistiya lu lunva.

⁵⁸Saulu akawumbula ati: Olongo, onʼa na eye? Ku Davidi akûkaluya diui ati: Onʼa ukambi aye Jese, usi Betelehema, kemi!