Read tetala 1 Samuele 2 Bible Online

1 Samuele 2 - tetala bible

1 Samuele 2

¹Hana akalombe ati: Utema ami ambongenangena le ye we Latuyalaka. We ambumeme lunya. Unyo ami ambudiho utsha la atunyi ami, Ne dia dimi lambongenangena lu ekimanyelu kaye.

²Nduku leli ekila uku we Latuyalaka; Nduku Unyashungu ukina, paka we, Nduku dive dieli uku we Unyashungu asu.

³Toteketaki ntu la utaku. Aui wa djaudi tawutumbaki uma lʼunyo aye; Ne dia Latuyalaka eli Unyashungu leya akambu tshe, Ndi katedikaka etsha wʼantu.

⁴Ndi katowediawediaka eta wʼakanga a wulu. Ndi katusukelaka waku weli wodu.

⁵Wane wakalutaka, wayuyasundja dia nduta ma, La waku waki la ndjala, wayuluta. Kanga ekumba ambuta ana esambeli, La umuntu lakuti ana efula, ambolombo.

⁶Latuyalaka katudiakaka ndu katululaka. Ndi katotolaka antu utsha lu dihuli diʼEdu, ndu katakaluyaka uma leko.

⁷Latuyalaka katetaneka wulu, ndi katongonyanyaka. Ndi katukitshakitshanyaka, ndi katumbiyanyaka.

⁸Ndi katunyiaka usi wula uma lu ditshu, Ndi katunyaka uhumbi uma lu diala, Dia mbadjasha kame la ewandji, La dia vo nkita lu kiti ka lutumbu kame la wo. Dikoho dia kete dieli diaye, we Latuyalaka, Ladiku adio kakayakitsha andja.

⁹We ayulamaka ekulu wa ekilami aye. Keli antu wa kolo wayulanyema lu udjima. Ne dia untu heyi ndjala la elembielo uma lu wulu andi.

¹⁰We Latuyalaka ayatshatsha wane watosemanelaka la ye. We ayatumela dikhungula uma lʼulungu, Ayulumbuya wa la kuma ya kete. We ayusha khumʼekanga kaye wulu, Ayeme lunya la one lakayakiti iso.[2]

¹¹Elekana akakalula utsha lakandi la Rama. Ku ona akatshikala lʼulimu wa Latuyalaka lasuki la olombedi Eli.

¹²Ana apami wa Eli waki antu wa kolo. Vo konemiaka Latuyalaka.

¹³Elombedi waki la etshelu kakawatshaka lu ashu wʼantu okone: lamʼakawalambulaka ulambu, ukambi wa olombedi akayakaka la somo ka sodi shatu lu lunya landi lene akawakateka nyama.

¹⁴Ndi akatakihikiahikiaka lu panu, lu puki, lu lukinga, kana lu donga. Ku olombedi akosaka kene tshe kakasomamaka somo. Osoku mbakawatshaka la Shilo lu ashu wʼasi Isariyele tshe wakatshokaka leko.

¹⁵Kuyanga la ntundu watatshumbi wata, ukambi wa olombedi akayakaka le one lala-mbula ulambu, wakawutela ati: Ukimo umunyi wa nfumbela olombedi. Ndi hulungula nyama ka lukate uma le ye, paka kʼuyuyu katundulangaka.

¹⁶Naka untu ako ayukaluya diui ati: Utukukunga, watatshumbi wata, kuyose kene kayuyulanga, ku ukambi ayukaluya diui ati; Kema, umbisha kakiane, naka aha osoku, dimi layosa la wulu.

¹⁷Elongo wʼapami ene wakayala la unungu a wuki la ntundu ka Latuyalaka, ne dia vo wakonyola ulambu wa Latuyalaka.

¹⁸Keli Samuele akatshaka ulimu la ntundu ka Latuyalaka eki dikenda. Ndi akalotaka ukutu wa nemo wa linene.

¹⁹Nyangu akotelelaka ukutu wa tshitshe lʼeleku lʼeleku, ku ndi akawelakawo lamʼakandayakaka la umendi dia ndjulambula ulambu lʼeleku lʼeleku.

²⁰Eli akatshokolaka Elekana la wadendi, ata ati: Latuyalaka akusha ona ukina uma le umuntu one, dia vo nkita one lakayakimo le ndi! Ku vo wakakalula utsha lakawo.

²¹Latuyalaka akatshokola Hana, ndi akatshokaka waemi, akuti ana apami asatu la ana amantu ahendi. Ku onʼone Samuele akuli la ntundu ka Latuyalaka.

²²Eli akayala usumbi a lukusumbi, akuki uku akatshaka anʼandi lu ashu wʼasi Isariyele tshe. Ndi akuki ndu uku akaweyanaka la amantu wakakambaka ulimu lʼeotwelo ka luudu lʼesanganelu la dipema.

²³Ndi akawambula ati: Okoko wana watshanyu akambu wa wuhu one? ne dia dimi mbukaka kumu yanyu ya kolo uma le antu tshe.

²⁴Kema, anʼami, kumu yatumukaka kema ololo. Nyu nyatunganyiaka antu wa Latuyalaka.

²⁵Naka untu ayutshela unyandi kolo, Unyashungu ayulumbuya. Keli naka untu ayutshela Latuyalaka kolo, akona ayoteketela? Vo kununga diui dia shewo, ne dia Latuyalaka akalangi mbadiaka.

²⁶Samuele akatakolamelaka mbula. Ndi aki dikenda diʼololo le Unyashungu ndu le antu.

²⁷Dikendji dia Unyashungu diakayi le Eli, diakawutela ati: Latuyalaka kata ati: Undi, dimi kundjaenya le luudu la sho lamʼakiwo lʼEdjibitu, lu luudu la lohombo la Farayo uka?

²⁸Dimi lakosonola uma lʼatei a wedja tshe wa Isariyele dia ndjala lʼulimu ami wʼolombedi, dia mumbelaka lʼediakelu kami, dia ntshumbaka malashi, la dia ndotaka ukutu wa nemo la ntundu kami.[3] Dimi lakasha sho elambu tshe wa lutshumba wakalambulaka asi Isariyele.[4]

²⁹Okoko wana watunyulanyaka elambu ami la eshasha ami, wakamadjanga dia vo nambulaka lu luudu lami? Uma lendi ambuya etshelu kene ka we nemiaka anʼaye uleki dimi, dia nyu nuna la elambu tshe wa wudja ami wa Isariyele?

³⁰Okone Latuyalaka, Unyashungu wa Isariyele, kata ati: Dimi lakataka nti: Mete, wa lu luudu laye la wa lu luudu la sho wayokendakendaka la ntundu kami pundju. Keli kakiane dimi Latuyalaka, kata nti: Kanyi sho yeko etali uma le mi. Wane watonemiaka, mbayumolemia, la wane watomonyolaka, wayonywama.

³¹Enda, etena kaya suki ka dimi minya wulu aye ndu wa lu luudu la sho, edja ndu nduku ekumanyi ka pami kayutshikala lu luudu laye.

³²We ayena utunyi lu luudu lami, lamʼayena asi Isariyele olo uma le mi, dimi Latuyalaka. Keli lu khumbu kaye kayalaki usumbi a pami pundju.

³³Dimi layutshika usikaye omotshi lʼediakelu kami, dia ndi nkelula ashu, la nyangia utema aye. Keli wane tshe wa lu luudu laye, wayuvokaka weki elongo wʼapami.

³⁴We ayena djimbitelu le anʼaye wʼapami ahendi ane: Hofeni la Finehasi. Vo ahendi wayuvo lushi otoi.

³⁵Dimi layuyadjela olombedi wa kolamelu one layutshaka akambu tshe wakamasonola lʼutema ami ndu lu yimba yami. Layushikike luudu landi shikaa, ku ndi ayokendakendaka nshi tshe la ntundu ka one layumukita iso lʼote.

³⁶Ku untu tshe layutshikala lu luudu laye, ayuya dia ndiuhkusamela, dia mbolomba etenyi ka fesa la yema ya ma. Ndi ayosengasenga ati: Unkimanyia dia mbidjami lʼulimu omotshi wʼolombedi, dia dimi ndeka yema ya ma.