Read tetala 1 Samuele 21 Bible Online

1 Samuele 21 - tetala bible

1 Samuele 21

¹Davidi akatshu le olombedi Ahimeleke la Nobo.[31] Ahimeleke akayalawoka la woma la ndjuhumana la Davidi. Ndi akawumbula ati: Dikambu kuna diayayi weme, ku nduku ntu layayi la ye?

²Davidi anukaluya diui ati: Khumʼekanga akambisha okende, akamvutela ati: Tutelaki untu dia okende one wambumukusha ndu dia aui ane wamumukutela. Dimi lakashili ndakana la elongo wʼapami lu dihuli la dihuli.

³Kakona keli laye kakiane? Umbisha ekama etanu wa ma, kana engo kekina keli la ye.

⁴Ku olombedi akûkaluya diui ati: Nduku ma dikina, tshikima ma diʼekila mbeli lane. Dio nkukaka tshikima le apami waki kumbeyana lʼamantu.

⁵Davidi al akaluya diui ati: Mete, aya nshi shatu lamʼakamunela, shu tateyana lʼamantu. Naka elongo wʼapami ndjakidiaka lu kendo yʼanyanya, keti lokendo lone?

⁶Okone olombedi akawusha ma diʼekila, ne dia nduku ma dikina diakiko, tshikima ma dia Eyalelu,[32] diakawanya uma la ntundu ka Latuyalaka, dia nkitsha dikina diʼuyuyu lu dihuli diakidio.

⁷Pami kemotshi lʼatei wʼekambi wa Saulu aki leko lushi lako. Wakushimbi dia ndi nkunga la ntundu ka Latuyalaka. Lukumbu la pami kako laki Doenge, usi Edome, olombodi wʼelami wa dungalunga wa Saulu.

⁸Davidi akambula Ahimeleke ati: We kema la dikonga kana yombo? Dimi kumbela yombo yami kana dihumo diami, ne dia ulimu one wa khumʼekanga mpumbamaka ntshama esadi.

⁹Olombedi akûkaluya diui ati: Yombo yaki Ngoliyate, usi Filistiya, lakayadiaki lʼukidi wa Ela tshu mbeko.[33] Yo ku yombami dihondo ledia ukutu wa nemo. Naka we nangaka, uyiose, ne dia nduku kina yeko lane. Ku Davidi akawutela ati: Nduku kina yeli uku yo, umbishayo.

¹⁰Davidi akunela, akalawo etali lushi lako ne dia woma wa Saulu. Ndi akatukuma le Akishi, khumʼekanga ka Ngata.

¹¹Ku ekambi wa Akishi wakawutela vati: Aha Davidi uku, khumʼekanga ka wudja? Aha ndi kakawatimbaka watano wenye vati: Saulu akadiaki kinunu kinunu, Keli Davidi nunu dikumi dikumi?[34]

¹²Davidi akumbi aui aso tshe lʼutema andi, akuki Akishi, khumʼekanga ka Ngata, woma.[35]

¹³Ndi akakadimula ditshelu la ntundu kawo, akadimbiya dadi lʼatei awo.[36] Akafundaka ufundafunda lu kuki, akatakediaka losoyi lu loledu.

¹⁴Ku Akishi akatela ekambi andi ati: Nyu menaka nyati: Pami kene kema la yimba, okoko wana wambunyumbelandi?

¹⁵Undi, akanga wa aladi, mbahumbami, mbakanyambelandi, dia ndi ndjomenya akambu andi wa dadi? Ndi mbeyaka mboto lu luudu lami uka?