Read tetala 1 Samuele 24 Bible Online

1 Samuele 24 - tetala bible

1 Samuele 24

¹Lamʼakakalula Saulu uma lene akandatayelanaka lʼasi Filistiya, wakayuwutela vati: Davidi eko lʼusui wa shenga wa Ene-Ngedi.

²Ku Saulu akasonola apami nunu satu, alimbi wa wulu uma lʼatei wa Isariyele tshe. Ndi akatshu la ntuyanga Davidi la alimbi andi lʼatei wʼave watuyalaka peli.

³Ndi akakumi la kumbu yʼekoko yaki lʼumamu a mbuka, wuku waki laawo. Saulu akoto loko la ntumuya yema. Etena kako, Davidi la alimbi andi wakadjashi la kuma ka wuku ako.[41]

⁴Alimbi wa Davidi wakawutela vati: Lushi lone, mbeli lushi lakakutela Latuyalaka ati: Enda, layukimo utunyi aye lu anya aye, dia we mbutshela uku alangaye. Ku Davidi akunela, akatata yetshi yʼukutu wa Saulu okoke.

⁵Lʼokongo diku Davidi akanyangi efula, ne dia ndi akati yetshi yʼukutu wa Saulu.

⁶Ku ndi akatela alimbi andi ati: latuyalaka anshimbi diaha dimi ntshela khumemi lakandakiti iso dikambu dia wuhu one, ne dia ndi eli ukitami wʼiso wa Latuyalaka.

⁷Uma lʼaui aso ml aneme Davidi alimbi andi, mbakandashimbi diaha vo mumamela Saulu. Ku Saulu aketo, akatumbi uma lu wuku, akakimela mbuka.

⁸Lʼokongo diku, ndu Davidi akatumbi uma lu wuku, wakahangohango lʼokongo wa Saulu ati: Khumemi, khumʼekanga li! lamʼakewo Saulu, Davidi akakolama, akukhusamela.

⁹Ndi akambula Saulu ati: Dikambu kuna diatuyulungaka aui wʼantu watutaka vati: Davidi nangaka nkutshela kolo?

¹⁰Kakiane weme ambena lʼashu aye wati: Latuyalaka akakukimwi lu anya ami lu wuku one. Antu amotshi wakamvutedi dia dimi nkudiaka. Keli dimi lakakuhandjisha, lakatshi nti: Dimi halahe khumemi lunya, ne dia ndi eli ukitami wʼiso wa Latuyalaka.

¹¹Papa li, enda yetshi yʼukutu aye nye lu lunya lami. Dimi lakayatshi uma lʼukutu aye, keli dimi hakudiaki. Okone eyi, ndu ulimbiteli wati: Le mi kema kolo kuyanga fyungi. Dimi kunkutshela kolo, keli we katankitshiya lalu dia ndjakami.

¹²Latuyalaka utu kayutusambula shu ahendi. Ndi kayukosomboya lu dikambu diami. Keli dimi halukahe lunya.

¹³Uku atuwutaka lu yukedi yʼedjedja vati: Uma le antu wa kolo, katutumbaka kolo, keli dimi hakaheki lunya.

¹⁴Uya le na ayayi khumʼekanga ka Isariyele? Akona atandayeli? ndu wa fo? tshambi?

¹⁵Latuyalaka ayali usambudi, atusambuli. Ndi endi, anteketele, antshunguli uma lu lunya laye.

¹⁶Okone lamʼakashidiya Davidi mvutela Saulu aui aso, Saulu akawumbula ati: Aha diui diaye we onʼami Davidi so? Ku Saulu akatundo la delu, akaleli.

¹⁷Ndi akatela Davidi ati: We ndekami ololo ne dia we akantshedi ololo lamʼakamakutshela kolo.

¹⁸Elo, we ambomenya uku akayantshedi ololo lamʼakankimwi Latuyalaka lu anya aye, ku we handjaki.

¹⁹Lamʼayunda untu utunyi andi, undi, ndi ayukimo dia ndi ntsho la ki? Latuyalaka akutsheli ololo lu dikambu diambuyuntshela elo.

²⁰Ulungi, dimi mbeyaka nti: We ayuyala khumʼekanga. Lu lunya laye kayushikikala diulelu dia Isariyele.

²¹Kakiane, untshibeli le Latuyalaka diaha we nshila tukanula tami ushiki, la diaha nshisha lukumbu lami uma lu luudu la papa.

²²Davidi akatshibela Saulu. Saulu akatshu lakandi, ku Davidi la alimbi andi wakatshu dia ntushama lu dihuli dia wulu.